Makko 4:1-41 LGCB2014 - Bible AI

¹Ate era nʼatandika okuyigiriza ku lubalama lwʼennyanja. Ekibiina kyʼabantu kinene nnyo ne bakuŋŋaana okumwetooloola. Kyeyava alinnya mu lyato nʼayigiriza ngʼatudde omwo.

²Yabayigirizanga ebintu bingi mu ngero. Nʼabayigiriza ngʼagamba nti,

³“Muwulirize. Waaliwo omulimi eyafuluma okusiga ensigo.

⁴Bwe yali ngʼazimansa ngʼasiga mu nnimiro, ezimu ne zigwa ku mabbali gʼekkubo ennyonyi ne zijja ne zizirya.

⁵Nʼendala ne zigwa ku ttaka eryʼekyaziyazi awatali ttaka lingi, ezo ne zimera mangu kubanga tezaali mu ttaka gwanvu.

⁶Awo omusana bwe gwayaka ne zikalirawo, kubanga emirandira gyali kungulu.

⁷Endala ne zigwa mu maggwa. Awo ensigo ne zikula kyokka amaggwa ne gazitta ne zitabala bibala.

⁸Endala ne zigwa ku ttaka eddungi, ezo ne zibala ebibala, ezimu emirundi amakumi asatu, endala emirundi nkaaga, nʼendala kikumi.”

⁹Nʼabagamba nti, “Oyo alina amatu agawulira awulire.”

¹⁰Awo bwe yasigala yekka, abayigirizwa be ekkumi nʼababiri nʼabantu abalala, ne bamubuuza amakulu gʼengero ezo ze yabagerera.

¹¹Yesu nʼabagamba nti, “Mmwe muweereddwa omukisa okumanya ekyama ekifa ku bwakabaka bwa Katonda ekyakisibwa abantu abalala abali ebweru waabwo.”

¹²ⓒ “Balaba bulabi naye nga tebeetegereza, era nʼokuwulira bawulira naye tebategeera, si ku lwa nga bakyuka ne basonyiyibwa.”

¹³“Kale obanga temutegedde makulu ga lugero luno olwangu bwe luti mulitegeera mutya endala ze ŋŋenda okweyambisa nga njigiriza?

¹⁴Omusizi asiga ekigambo yʼasiga.

¹⁵Ate ensigo ezaagwa ku mabbali gʼekkubo, be bawulira ekigambo, amangwago Setaani nʼajja nʼakibatwalako.

¹⁶Ate ensigo ezaagwa ku kyaziyazi, gyʼemitima gyʼabantu abawulira ekigambo amangwago ne bakyaniriza nʼessanyu.

¹⁷Naye tebalina mirandira, babeera bulungi okusooka, naye olutuukibwako ebizibu oba okuyigganyizibwa olwʼekigambo amangwago babivaako.

¹⁸Ate endala ezaagwa mu maggwa, be bawulira ekigambo,

¹⁹naye okweraliikirira nʼokusikirizibwa ebyʼobugagga nʼokwegomba ebintu ebirala, bizikiriza ekigambo ne kitabala bibala.

²⁰Ettaka eddungi gyʼemitima gyʼabantu abawulira ekigambo ne bakkiririza ddala era ne bavaamu ebibala, emirundi amakumi asatu, abalala emirundi nkaaga, nʼabalala kikumi.”

²¹Awo Yesu nʼababuuza nti, “Waliwo omuntu akoleeza ettaala nʼagivuunikako ekibbo oba nʼagiteeka wansi wʼekitanda? Naye omuntu bwʼakoleeza ettaala tagiteeka ku kikondo waggulu?

²²Kubanga buli kintu kyonna ekikolebwa mu kyama kaakano, ekiseera kirituuka ne kiragibwa mu lwatu.

²³Alina amatu agawulira awulire.

²⁴Naye mwegendereze ebyo bye mbayigiriza.

²⁵Alina aliweebwa na buli atalina aliggyibwako nʼebyo byʼalina.”

²⁶Awo Yesu nʼabagamba nti, “Obwakabaka bwa Katonda bufaanaanyirizibwa nʼomusizi asiga ensigo mu ttaka.

²⁷Ekiro yeebaka, nʼemisana ne yeekolera byʼayagala, mu kiseera ekyo kyonna ensigo ziba zimera, naye ate nga takimanyi.

²⁸Ku bwalyo ettaka lireeta ekibala. Ensigo zisooka kusindika bulimi bwazo okuva mu ttaka, amatabi ne gajjako ebirimba byʼeŋŋaano.

²⁹Eŋŋaano bwʼeyengera omusizi ayanguwa mangu nʼakwata akayuuyo, kubanga amakungula gatuuse.”

³⁰Awo Yesu nʼayongera nʼabagamba nti, “Obwakabaka bwa Katonda tunaabugeraageranya naki? Oba tukozese lugero ki okubunnyonnyola?

³¹Bufaananyizibwa nʼakasigo aka kaladaali! Kubanga newaakubadde katono nnyo okusinga ensigo zonna ezʼoku nsi,

³²naye kavaamu omuti omunene nga gulina amatabi amanene, ennyonyi ezʼomu bbanga mwe ziyinza okuzimba ebisu byazo.”

³³Yesu nʼabuulira abantu ekigambo kya Katonda ngʼakozesa engero nnyingi ezifaanana ngʼezo, nga bwe baasobolanga okuwulira.

³⁴Yesu bwe yabanga ayigiriza ebibiina yakozesanga engero, naye bwe yaddanga ebbali nʼabayigirizwa be nʼabannyonnyola amakulu agali mu ngero ezo.

³⁵Ku lunaku olwo obudde nga buwungedde Yesu nʼagamba abayigirizwa be nti, “Tuwunguke tugende emitala.”

³⁶Nʼaleka awo ekibiina, abayigirizwa be ne balinnya mu lyato Yesu mwe yali ne bagenda naye. Abantu abamu ne babagobera mu maato agaabwe.

³⁷Amangwago omuyaga mungi nnyo ne gukunta nʼamayengo amagulumivu ne geeyiwa mu lyato ne libulako katono okujjula amazzi.

³⁸Yesu yali agalamidde emabega mu lyato nga yeezizise omutto yeebase. Awo abayigirizwa be ne bamuzuukusa nga bagamba nti, “Omuyigiriza, ggwe tofaayo nga ffenna tugenda okusaanawo?”

³⁹Nʼazuukuka nʼaboggolera omuyaga nʼagamba ennyanja nti, “Tteeka, sirika.” Omuyaga ne gusirika nʼennyanja nʼeteekera ddala.

⁴⁰Nʼababuuza nti, “Lwaki mutidde? Temunnaba kubeera na kukkiriza?”

⁴¹Ne batya nnyo, ne bagambagana nti, “Ono ye ani, embuyaga nʼennyanja gwe bigondera?”