Makko 5:1-43 LGCB2014 - Bible AI

¹Awo Yesu nʼabayigirizwa be ne batuuka emitala wʼennyanja mu nsi yʼAbageresene.

²Yesu bwe yali yaakava mu lyato omuntu eyaliko omwoyo omubi nʼajja gyʼali ngʼava mu malaalo.

³Omuntu ono yasulanga mu malaalo era yali alaluse nnyo nga tewakyali na muntu asobola kumusiba.

⁴Emirundi mingi baagezangako okumussa ku mpingu nʼokusiba amagulu ge nʼenjegere naye byonna ngʼabikutulakutula. Ne wataba na muntu wʼamaanyi ayinza kumusiba kumunyweza.

⁵Naye bulijjo yatambulanga emisana nʼekiro mu malaalo ne mu nsozi. Yawowoggananga nga bwʼakaaba era nga bwe yeesalaasala nʼamayinja.

⁶Awo bwe yalengera Yesu ngʼakyali walako ku nnyanja nʼadduka nʼagenda eryato we lyagoba, nʼasinza Yesu.

⁷Nʼaleekaana nnyo nti, “Onjagaza ki, ggwe Yesu, Omwana wa Katonda, Ali Waggulu Ennyo? Nkwegayirira, olwʼekisa kya Katonda, tombonyaabonya.”

⁸Kubanga Yesu yali alagidde omwoyo omubi okuva ku musajja.

⁹Awo Yesu nʼamubuuza nti, “Erinnya lyo ggwʼani?” Nʼaddamu nti, “Erinnya lyange nze Ligyoni, kubanga tuli bangi.”

¹⁰Nʼamwegayirira nnyo aleme okumugoba mu kitundu ekyo.

¹¹Awo waaliwo eggana lyʼembizzi nnyingi nnyo ku lusozi nga zirya.

¹²Omwoyo omubi ne gwegayirira Yesu nti, “Tusindike mu mbizzi ziri.”

¹³Yesu nʼabakkiriza, ne bava ku musajja ne bayingira mu ggana lyʼembizzi. Awo eggana lyʼembizzi lyonna ne liserengetera ku kagulungujjo ne lyeyiwa mu nnyanja, embizzi zonna ne zisaanawo.

¹⁴Awo abaali bazirunda ne badduka mangu ne bagenda bategeeze abʼomu kibuga ne mu byalo ebiriraanyeewo. Abantu bangi ne bajja okulaba ebibaddewo.

¹⁵Ekibiina kyʼabantu ne kikuŋŋaana awali Yesu, naye bwe baalaba omusajja eyaliko ligyoni ngʼayambadde bulungi era ngʼategeera bulungi, ne batya nnyo.

¹⁶Abo abaaliwo ne babategeeza ebyatuuka ku musajja eyaliko omwoyo omubi nʼebyatuuka ku mbizzi.

¹⁷Awo abantu ne batandika okwegayirira Yesu abaviire!

¹⁸Yesu bwe yali ngʼalinnya mu lyato, omusajja eyali abaddeko omwoyo omubi nʼamwegayirira bagende bonna.

¹⁹Yesu nʼatakkiriza, nʼamugamba nti, “Ddayo ewammwe mu bantu bo obabuulire ebintu byonna Mukama byʼakukoledde era nga bwʼakusaasidde.”

²⁰Awo omusajja oyo nʼagenda ngʼatambula mu Dekapoli[2] (ebibuga ebyʼomu kitundu ekyo) ngʼabuulira abantu Katonda bye yali amukoledde byonna. Bonna abaabiwulira ne bawuniikirira nnyo.

²¹Awo Yesu nʼawunguka mu lyato nate nʼatuuka emitala wʼennyanja. Abantu bangi ne bakuŋŋaanira wʼali ku lubalama lwʼennyanja.

²²Omukulu wʼekkuŋŋaaniro erinnya lye Yayiro nʼajja nʼagwa wʼali,

²³nʼamwegayirira nnyo ngʼagamba nti, “Muwala wange abulako katono okufa. Nkwegayiridde jjangu omukwateko omuwonye.”

²⁴Awo Yesu nʼagenda naye nʼekibiina kyʼabantu kinene ne kimugoberera nga bagenda bamunyigiriza.

²⁵Mu kibiina omwo mwalimu omukazi eyali amaze emyaka kkumi nʼebiri nga mulwadde ekikulukuto kyʼomusaayi.

²⁶Yali yeewuubye mu basawo bangi abaamujanjabanga okumala emyaka egyo gyonna; ne byonna bye yalina nga bimuweddeko, obulwadde ne butawona wabula okweyongera obweyongezi.

²⁷Yali awulidde ebikwata ku Yesu. Bwʼatyo nʼajja nga yeenyigiriza mu kibiina kyʼabantu nʼatuuka emabega wa Yesu, nʼakoma ku kyambalo kye.

²⁸Kubanga yagamba mu mutima gwe nti, “Ne bwe nnaakoma obukomi ku kyambalo kye nzija kuwona.”

²⁹Awo olwakikomako, amangwago ekikulukuto kyʼomusaayi ne kikalira nʼategeerera ddala ngʼawonye.

³⁰Amangwago Yesu nʼawulira ngʼamaanyi agamuvuddemu, nʼakyukira ekibiina kyʼabantu nʼabuuza nti, “Ani akutte ku kyambalo kyange?”

³¹Naye abayigirizwa be ne bamuddamu nti, “Ku bantu abangi bati abakunyigiriza oyinza otya okubuuza nti Ani ankutteko?”

³²Naye Yesu ne yeetoolooza amaaso ge mu bonna alabe oyo amukutteko.

³³Awo omukazi bwe yategeera ekituuseewo nʼajja eri Yesu ngʼatidde nnyo era ngʼakankana, nʼagwa ku bigere bya Yesu nʼamutegeeza amazima gonna.

³⁴Yesu nʼagamba omukazi nti, “Omuwala, okukkiriza kwo kukuwonyezza, genda mirembe obulwadde bwo buwonedde ddala.”

³⁵Naye yali akyayogera nʼomukazi ababaka ne batuuka nga bava mu maka ga Yayiro ne bamubikira nti, “Omuwala afudde, noolwekyo tekikyetaagisa kuteganya Muyigiriza.”

³⁶Yesu nʼawulira ebigambo ebyayogerwa wabula nʼagamba omukulu wʼekkuŋŋaaniro nti, “Totya, ggwe kkiriza bukkiriza.”

³⁷Awo Yesu nʼaziyiza ekibiina kyonna okugenda naye, okuggyako Peetero ne Yakobo ne Yokaana muganda wa Yakobo.

³⁸Bwe baatuuka mu nju yʼomukulu wʼekkuŋŋaaniro, nʼalaba okwaziirana ngʼabantu bakaaba nga bakuba ebiwoobe.

³⁹Bwe yayingira mu nju nʼagamba abantu nti, “Mwaziiranira ki nʼokukuba ebiwoobe? Omwana tafudde naye yeebase bwebasi!”

⁴⁰Awo abantu bonna ne bamusekerera nnyo.

⁴⁰Naye nʼabagamba bonna bafulume mu nju. Nʼatwala abazadde bʼomwana nʼabayigirizwa be abasatu nʼayingira nabo mu kisenge omwana mwe yali.

⁴¹Yesu nʼakwata omwana ku mukono nʼamugamba nti, “Talisa kumi!” amakulu nti, “Omuwala golokoka!”

⁴²Amangwago omuwala eyali aweza emyaka kkumi nʼebiri, nʼayimirira nʼatambulatambula. Abaaliwo ne bawuniikirira nnyo.

⁴³Naye Yesu nʼabakuutira nnyo baleme okubuulirako omuntu yenna. Awo nʼabalagira bawe omwana ekyokulya.