Makko 6:1-56 LGCB2014 - Bible AI

¹Yesu nʼava mu kitundu ekyo nʼabayigirizwa be nʼaddayo mu kibuga kyʼewaabwe.[3]

²Olunaku lwa Ssabbiiti bwe lwatuuka nʼagenda mu kkuŋŋaaniro okuyigiriza, abantu bangi abaaliwo ne beewuunya nnyo bwe baawulira bwʼayigiriza, ne bawuniikirira ne beebuuza nti, “Bino byonna yabiyigira wa era magezi ga ngeri ki ono ge yaweebwa nʼebyʼamagero ebyenkanidde wano byʼakola?”

³Ne beebuuza nti, “Ono si ye mwana wʼomubazzi? Maliyamu si ye nnyina, ne baganda be si be ba Yakobo, ne Yose, ne Yuda ne Simooni? Ne bannyina tetubeera nabo kuno?” Ekyo ne kibatawanya mu mutima.

⁴Yesu nʼabagamba nti, “Nnabbi aweebwa ekitiibwa buli wantu okuggyako mu nsi ye waabwe ne mu bantu be ne mu maka ge waabwe.”

⁵Naye teyakolerayo byamagero binene okuggyako abalwadde abatonotono be yakwatako nʼabawonya.

⁶Nʼawuniikirira nnyo okulaba nga tebamukkirizza. Awo nʼagenda ngʼayigiriza mu byalo ebiriraanyeewo.

⁷Awo Yesu nʼayita abayigirizwa be ekkumi nʼababiri nʼabatuma babiri babiri era nʼabawa obuyinza okugoba emyoyo emibi ku bantu.

⁸Nʼabakuutira obutatwala kantu konna okuggyako omuggo ogwʼokutambuza gwokka nti, “Temutwala mmere wadde akagugu newaakubadde ensimbi mu lukoba.

⁹Mwambale engatto naye temutwala kkanzu yakubiri.”

¹⁰Nʼabagamba nti, “Era buli nnyumba gye munaayingirangamu musulanga omwo okutuusa lwe muliva mu kibuga ekyo.

¹¹Era bwe mutuukanga mu kifo ne batabaaniriza yadde okubawuliriza, bwe mubanga muvaayo mukunkumuliranga mu kifo omwo enfuufu eyʼomu bigere byammwe, okuba akabonero gye bali.”

¹²Awo abayigirizwa ne bagenda nga babuulira buli muntu nti, “Mwenenye.”

¹³Ne bagoba baddayimooni bangi ku bantu, ne basiiga abalwadde amafuta ne babawonya.

¹⁴Awo Kabaka Kerode nʼawulira ettutumu lya Yesu, kubanga yali ayogerwako wonna olwʼebyamagero bye yakolanga. Naye Kerode nʼalowooza nti Yokaana Omubatiza yʼazuukidde, kubanga abantu baayogeranga nti, “Tewali muntu mulala ayinza kukola byamagero nga bino.”

¹⁵Naye abalala ne balowooza nti Eriya. Nʼabalala ne bagamba nti Nnabbi ngʼomu ku bannabbi abʼedda.

¹⁶Kerode bwe yabiwulira ye nʼagamba nti, “Oyo Yokaana, omusajja gwe natemako omutwe, yʼazuukide mu bafu.”

¹⁷Kubanga Kerode yennyini ye yatuma abaserikale be ne bakwata Yokaana Omubatiza ne bamuggalira mu kkomera, olwa Kerudiya muka muganda we Firipo, Kerode gwe yali awasizza.

¹⁸Yokaana yagamba Kerode nti, “Si kituufu okutwala Kerudiya muka muganda wo Firipo.”

¹⁹Kerudiya nʼayagala okutta Yokaana yeesasuze, naye nga tayinza.

²⁰Kubanga Kerode yatyanga Yokaana Omubatiza, ngʼamuwa ekitiibwa ngʼomuntu wa Katonda owʼamazima era omutukuvu, era ngʼamukuuma. Era Kerode bwe yayogeranga ne Yokaana ngʼemmeeme ye tetereera, so nga yali ayagala nnyo okuwuliriza byʼamugamba.

²¹Naye olwali olwo, Kabaka Kerode nʼafumba embaga ku lunaku lwʼamazaalibwa ge, nʼayita abakungu be nʼabakulu bʼabaserikale nʼabaami bonna abatutumufu mu Ggaliraaya.

²²Awo muwala wa Kerudiya yennyini nʼajja nʼazina nnyo, nʼasanyusa Kerode nʼabagenyi be yali atudde nabo ku mbaga.

²²Awo Kabaka Kerode nʼagamba omuwala nti, “Nsaba kyonna kyʼoyagala nange nnaakikuwa.”

²³Era nʼayongera okumulayirira nti, “Kyonna kyonna kyʼononsaba yadde ekitundu kyʼobwakabaka bwange nnaakikuwa!”

²⁴Awo omuwala nʼafuluma ne yeebuuza ku nnyina. Nnyina nʼamugamba nti, “Saba omutwe gwa Yokaana Omubatiza!”

²⁵Omuwala nʼaddayo mangu eri kabaka nʼamusaba nti, “Njagala ompe kaakano, ku ssowaani, omutwe gwa Yokaana Omubatiza!”

²⁶Kino ne kinakuwaza nnyo kabaka, nʼanyiikaala nnyo, kyokka olwokubanga yali amaze okulayira nʼokweyama ngʼabagenyi be bawulira, nʼatya okumenya obweyamo bwe.

²⁷Bwʼatyo nʼayita omuserikale we, nʼamulagira agende aleete omutwe gwa Yokaana. Omuserikale nʼagenda nʼatemako Yokaana omutwe,

²⁸nʼaguleeteera ku lutiba, nʼaguwa omuwala nʼomuwala nʼagutwalira nnyina.

²⁹Abayigirizwa ba Yokaana bwe baategeera ne bajja ne baggyawo omulambo gwe, ne bagutwala ne baguziika.

³⁰Awo abatume ne bakomawo awali Yesu ne bamunnyonnyola byonna bye baakola ne bye baayigiriza.

³¹Nʼabagamba nti, “Mujje tugende mu kifo eteri bantu tuwummuleko.” Kubanga baali babuliddwa nʼakaseera akʼokuliiramu ku mmere olwʼabantu abangi abajjanga gye bali; bano baabanga baakavaawo ate ngʼabalala bajja.

³²Bwe batyo ne balinnya mu lyato ne bagenda mu kifo ekiwolerevu eteri bantu.

³³Naye abantu bangi abaava mu bibuga bingi ne babalaba nga bagenda ne bategeera gye baali bagenda ne badduka okwetooloola ku lukalu ne babeesookayo.

³⁴Yesu bwe yava mu lyato nʼalaba ekibiina byʼabantu bangi abaali bakuŋŋaanye nʼabasaasira nga bali ngʼendiga ezitaliiko musumba. Awo nʼatandika okubayigiriza ebintu bingi.

³⁵Awo obudde bwe bwawungeera abayigirizwa ne bajja awali Yesu ne bamugamba nti, “Ekifo kino kya ddungu ate nʼobudde buwungedde.

³⁶Abantu basiibule bagende beegulire emmere mu byalo ne mu bibuga ebiriraanye wano.”

³⁷Naye Yesu nʼabaddamu nti, “Mmwe mubawe ekyokulya.” Ne bamubuuza nti, “Tugende tubagulire emmere nga ya dinaali ebikumi bibiri, tugibawe balye?”

³⁸Yesu nʼababuuza nti, “Mulina emigaati emeka? Mugende mulabe.” Bwe baamala okwetegereza ne bamugamba nti, “Waliwo emigaati etaano nʼebyennyanja bibiri.”

³⁹Awo Yesu nʼalagira abantu bonna batuule wansi ku muddo mu bibinja.

⁴⁰Awo ne batuula mu bibinja, ebyʼabantu ataano ataano, awalala kikumi kikumi.

⁴¹Yesu nʼatoola emigaati etaano nʼebyennyanja ebibiri nʼayimusa amaaso ge eri eggulu ne yeebaza Katonda. Nʼamenyaamenya emigaati nʼebyennyanja ebibiri, nʼabiwa abayigirizwa be ne bagabula abantu bonna ne babuna.

⁴²Bonna ne balya ne bakkuta.

⁴³Ne bakuŋŋaanya obukunkumuka bwʼemigaati nʼobwʼebyennyanja ebibbo kkumi na bibiri.

⁴⁴Abasajja abaalya emigaati baali enkumi ttaano.

⁴⁵Amangwago Yesu nʼalagira abayigirizwa be basaabale mu lyato bawunguke bagende emitala wʼennyanja e Besusayida abasange eyo, ngʼamaze okusiibula ebibiina byʼabantu.

⁴⁶Bwe yamala okubasiibula nʼalinnya ku lusozi okusaba.

⁴⁷Awo obudde bwe bwawungeera, Yesu ngʼasigadde yekka ku lukalu,

⁴⁸nʼabalengera nga bategana nʼeryato kubanga waaliwo omuyaga mungi nʼamayengo amagulumivu ebyabafuluma mu maaso gye baali balaga. Awo obudde bwali bunaatera okukya nga ku ssaawa mwenda ezʼekiro, nʼajja gye bali ngʼatambulira ku mazzi, nʼaba ngʼayagala okubayitako.

⁴⁹Naye bwe baamulaba ngʼatambulira ku nnyanja ne baleekaana nnyo, bonna, nga batidde, kubanga baalowooza nti muzimu,

⁵⁰kubanga bonna baamulaba ne batya.

⁵⁰Naye nʼayanguwa okwogera nabo, nʼabagamba nti, “Mugume omwoyo. Ye Nze, temutya.”

⁵¹Awo nʼalinnya mu lyato, omuyaga ne gulekeraawo okukunta! Abayigirizwa be ne bawuniikirira nnyo.

⁵²Tebategeera kyamagero ekyʼemigaati kubanga emitima gyabwe gyali mikakanyavu.

⁵³Awo eryato lyabwe bwe lyagoba ku lubalama lwʼennyanja Genesaleeti,

⁵⁴ne bavaamu. Abantu bwe balaba Yesu, amangwago ne bamutegeererawo.

⁵⁵Ne babuna mu bitundu ebyali biriraanyeewo nga bamuleetera abalwadde nga basituliddwa ku butanda.

⁵⁶Wonna wonna gye yagendanga, mu byalo, mu bibuga, mu butale ne ku nguudo ne baleeta abalwadde ne bamwegayirira waakiri bakwateko bukwasi ku lukugiro lwʼekyambalo kye. Era bonna abaakikwatako ne bawona.