Makko 7:1-37 LGCB2014 - Bible AI

¹Awo abafalisaayo nʼabannyonnyozi bʼamateeka abamu abaali bavudde e Yerusaalemi ne bakuŋŋaanira awali Yesu.

²Ne balaba abamu ku bayigirizwa be nga balya tebanaabye mu ngalo.

³Kubanga Abafalisaayo nʼAbayudaaya bonna tebaalyanga nga tebasoose kunaaba mu ngalo nʼobwegendereza ngʼempisa zaabwe bwe zaali.

⁴Era bwe baddanga eka nga bava mu katale, ekyo kye baasookanga okukola nga tebannaba kukwata ku kyakulya kyonna. Waliwo nʼobulombolombo obulala bwe baagobereranga ngʼokulongoosa ensuwa zaabwe, nʼebikopo, nʼebbinika nʼessowaani, nʼebirala bingi.

⁵Awo Abafalisaayo nʼabannyonnyozi bʼamateeka ne babuuza Yesu nti, “Lwaki abayigirizwa bo tebagoberera mpisa za bajjajjaffe ezʼedda? Kubanga balya nga tebanaabye mu ngalo.”

⁶Yesu nʼabaddamu nti, “Bannanfuusi mmwe! Nnabbi Isaaya yaboogerako bulungi ebyobunnabbi bwe yagamba nti, ‘Abantu bano banzisaamu ekitiibwa kya ku mimwa, naye emitima gyabwe tegindiiko.

⁷ⓓ Okusinza kwabwe tekuliimu nsa; kubanga bayigiriza bulombolombo bwabwe.’

⁸Muleka ebiragiro ebiva eri Katonda ne mugoberera obulombolombo bwʼabantu.”

⁹Nʼabagamba nate nti, “Munyooma ekiragiro kya Katonda, ne muggumiza obulombolombo bwammwe.

¹⁰ⓔ ⓕ Musa yagamba nti, ‘Kitaawo ne nnyoko obassangamu ekitiibwa.’ Era nʼagamba nti, ‘Omuntu yenna ayogera obubi ku kitaawe oba nnyina anattibwanga.’

¹¹Naye mmwe mugamba nti Kituufu omuntu okulagajjalira bakadde be nga bali mu kwetaaga nʼabagamba bugambi nti, ‘Mmunsonyiwe, kubanga kye nandibawadde ye Korubaani[4].’ ”

¹²“Omuntu temumukkiriza kubeerako kyʼakolera kitaawe oba nnyina.

¹³Bwe mutyo munyooma ekigambo kya Katonda mulyoke mutuukirize obulombolombo bwammwe bwe mwaweebwa. Nʼebirala bingi ebiri ngʼebyo bye mukola.”

¹⁴Awo Yesu nʼayita ekibiina kyʼabantu nʼabagamba nti, “Mmwe mwenna, mumpulirize, era mutegeere.

¹⁵Ebintu ebiyingira mu muntu si bye byonoona empisa ze, wabula ebyo ebiva mu mutima gwe bye bizoonoona.

¹⁶(Omuntu alina amatu agawulira awulirize.)”

¹⁷Yesu nʼaviira ekibiina nʼayingira mu nnyumba, abayigirizwa be ne bamubuuza amakulu gʼebigambo bye yayogera.

¹⁸Nʼabaddamu nti, “Nammwe temutegedde? Temutegeera nti Buli kintu ekiyingira mu muntu si kye kimwonoona?

¹⁹Olwʼokuba nga tekiyingira mu mutima gwe naye kiyingira mu lubuto lwe ne kiryoka kigenda mu kabuyonjo.” Mu kwogera atyo Yesu yakakasa nga buli kyakulya bwe kiri ekirongoofu.

²⁰Era nʼayongerako na bino nti, “Ebirowoozo byʼomuntu bye bimwonoona.

²¹Kubanga mu mutima gwʼomuntu mwe muva ebirowoozo ebibi ebyʼobukaba, nʼobubbi, nʼobutemu, nʼobwenzi,

²²nʼokwegomba, nʼomutima omubi, nʼobukuusa, nʼobumenyi bwʼamateeka, nʼobuggya, nʼokusekeeterera, nʼobusirusiru.

²³Ebibi bino byonna biva munda mu muntu ne bimwonoona.”

²⁴Awo Yesu nʼalaga mu bitundu byʼe Ttuulo, nʼatayagala kitegeerekeke nti Ali mu bitundu ebyo, naye ne kitasoboka.

²⁵Omukazi eyalina muwala we ngʼaliko omwoyo omubi, olwawulira nga Yesu yaakatuuka, nʼajja eri Yesu, nʼagwa ku bigere bye.

²⁶Omukazi teyali Muyudaaya, yali Musulofoyiniiki, nʼamwegayirira agobe dayimooni ku mwana we.

²⁷Yesu nʼagamba omukazi nti, “Omwana asaana asoke akkute, kubanga tekiba kituufu okuddira emmere yʼomwana nʼekasukirwa embwa.”

²⁸Naye omukazi nʼamuddamu nti, “Ekyo bwe kiri, ssebo, naye era nʼembwa ezibeera wansi mu mmeeza, ziweebwa ku bukunkumuka obuva ku ssowaani zʼabaana.”

²⁹Yesu nʼamugamba nti, “Olwʼekigambo ekyo, weddireyo eka, kubanga dayimooni avudde ku muwala wo.”

³⁰Omukazi bwe yaddayo eka yasanga muwala we agalamidde awo ku kitanda, nga muteefu era nga dayimooni amuvuddeko.

³¹Yesu bwe yava mu Ttuulo nʼagenda e Sidoni, eyo gye yava nʼaddayo ku nnyanja eyʼe Ggaliraaya ngʼayitira mu “Bibuga Ekkumi” (Dekapoli).

³²Awo ne bamuleetera omusajja omuggavu wʼamatu ate nga tayogera, abantu bonna ne beegayirira Yesu amusseeko emikono gye amuwonye.

³³Yesu nʼaggya omusajja mu bantu nʼamulaza wabbali, nʼassa engalo ze mu matu gʼomusajja; nʼawanda amalusu, nʼagasiiga nʼolunwe lwe ku lulimi lwʼomusajja.

³⁴Awo Yesu nʼatunula waggulu nʼassa ekikkowe, nʼalyoka alagira omusajja nti, “Efasa!” ekitegeeza nti, “Gguka.”

³⁵Amangwago amatu gʼomusajja ne gagguka nʼawulira buli kintu era nʼayogera bulungi!

³⁶Yesu nʼakuutira ekibiina baleme kutegeezaako balala ku bigambo ebyo okubisaasaanya, naye bo ne beeyongera okutegeeza.

³⁷Kye yakola kyali kibayitiriddeko. Ne boogera nga batenda Yesu nti, “Buli kyʼakola kya kyewuunyo, aggula nʼamatu ga bakiggala nʼayogeza ne bakasiru!”