Makko 8:1-38 LGCB2014 - Bible AI

¹Mu biseera ebyo, ebibiina ne byeyongera obunene nate, abantu emmere nʼebaggwaako. Yesu nʼayita abayigirizwa be nʼabagamba nti,

²“Abantu bano bankwasa ekisa, kubanga baakamala nange ennaku ssatu, naye tebalina kyakulya.

³Singa mbasiibula baddeyo ewaabwe nga tebalidde, enjala ejja kubasuula ku kkubo! Ate abamu bava wala.”

⁴Abayigirizwa ne bamubuuza nti, “Emmere tunaagiggya wa wano mu ddungu eneemala abantu bano bonna?”

⁵Yesu nʼababuuza nti, “Mulina wo emigaati emeka?” Ne baddamu nti, “Musanvu.”

⁶Awo Yesu nʼalagira abantu batuule wansi. Nʼaddira emigaati omusanvu, ne yeebaza Katonda, nʼagimenyaamenyamu, nʼagiwa abayigirizwa be ne bagitwalira ekibiina ne babagabula.

⁷Era baalina wo nʼebyennyanja bitono, nabyo Yesu nʼabiwa omukisa nʼagamba abayigirizwa be babigabule abantu.

⁸Abantu bonna ne balya okutuusa lwe bakkuta, ne bakuŋŋaanya ebyabalema ebisero musanvu ebijjudde.

⁹Mu kibiina ekyo mwalimu abantu ngʼenkumi nnya. Nʼabasiibula.

¹⁰Amangwago nʼasaabala mu lyato nʼabayigirizwa be nʼajja mu kitundu ekyʼe Dalumanusa.

¹¹Abafalisaayo ne bajja gyʼali ne batandika okuwakana naye nga banoonya akabonero akava mu ggulu nga bamugezesa.

¹²Yesu nʼassa ekikkowe, nʼabagamba nti, “Lwaki omulembe guno gunoonya akabonero? Ddala ddala mbagamba nti, Tewali kabonero kajja kuweebwa mulembe guno.”

¹³Nʼabaviira nʼasaabala mu lyato nʼalaga ku ludda olulala olwʼennyanja.

¹⁴Abayigirizwa beerabira okutwala emigaati egiwera; baalina omugaati gumu gwokka mu lyato.

¹⁵Yesu nʼabakuutira nti, “Mwekuume ekizimbulukusa ekyʼAbafalisaayo nʼekizimbulukusa ekya Kerode.”

¹⁶Ne bawakana bokka ne bokka nti tebalina migaati.

¹⁷Yesu bwe yakimanya nʼabagamba nti, “Lwaki mugambagana nti temulina migaati? Era temunnategeera? Emitima gyammwe gikyali mikakanyavu?

¹⁸Lwaki temulaba, ate nga mulina amaaso? Lwaki temuwulira ate nga mulina amatu? Temujjukira?

¹⁹Mwerabidde emigaati etaano gye namenyamenyamu okuliisa abantu enkumi ettaano? Ebisero byali bimeka ebyʼobukunkumuka bye mwakuŋŋaanya?”

¹⁹Ne baddamu nti, “Kkumi na bibiri.”

²⁰Nʼababuuza nti, “Ate abantu bwe baali enkumi ennya nʼemigaati omusanvu, mwakuŋŋaanya ebisero byʼobutundutundu bwe baalemwa bimeka?” Ne baddamu nti, “Musanvu.”

²¹Nʼabagamba nti, “Era temunnategeera?”

²²Awo bwe baatuuka mu Besusayida, ne wabaawo abantu abaamuleetera omusajja omuzibe wʼamaaso, ne bamwegayirira amukwateko.

²³Yesu nʼakwata omuzibe wʼamaaso ku mukono nʼamufulumya ebweru wʼakabuga ako. Nʼawanda amalusu ku maaso gʼomusajja nʼagakwatako, nʼamubuuza nti, “Kaakano waliwo kyʼolaba?”

²⁴Omusajja nʼamagamaga, nʼaddamu nti, “Yee! Ndaba abantu kyokka balabika ngʼemiti egitambula.”

²⁵Yesu nʼayongera okukwata ku maaso gʼomusajja, omusajja nʼazibuka amaaso nʼawonera ddala buli kintu nʼakiraba bulungi.

²⁶Yesu nʼamutuma mu maka gʼewaabwe ngʼamugamba nti, “Toddayo mu kyalo.”

²⁷Awo Yesu nʼabayigirizwa be, ne bagenda mu bubuga obwʼe Kayisaliya ekya Firipo. Naye bwe baali batambula, Yesu nʼababuuza nti, “Abantu bampita ani?”

²⁸Abayigirizwa be ne bamuddamu nti, “Yokaana Omubatiza, abalala Eriya, naye abalala nti omu ku bannabbi.”

²⁹Kwe kubabuuza nti, “Naye mmwe mumpita ani?” Peetero nʼaddamu nti, “Ggwe Kristo.”

³⁰Naye Yesu nʼabakuutira baleme okukibuulirako omuntu yenna!

³¹Awo Yesu nʼatandika okubabuulira nti, “Kigwanidde Omwana wʼOmuntu okubonaabona ennyo, nʼokugaanibwa abakadde, ne bakabona abakulu nʼabannyonnyozi bʼamateeka, nʼokuttibwa, nʼoluvannyuma lwʼennaku ssatu okuzuukira.”

³²Yayogera nabo ku nsonga zino zonna mu lwatu, Peetero kyeyava amuzza wabbali nʼamunenya.

³³Yesu nʼakyuka nʼatunuulira abayigirizwa be, nʼalyoka anenya Peetero nti, “Setaani dda ennyuma wange, kubanga tolowooza ku bya Katonda wabula olowooza ku byʼabantu.”

³⁴Awo Yesu nʼayita ekibiina wamu nʼabayigirizwa be, nʼabagamba nti, “Obanga waliwo omuntu ayagala okungoberera, asaanidde okwefiiriza asitule omusaalaba gwe alyoke angoberere.

³⁵Kubanga buli eyeemalira ku bulamu bwe, alibufiirwa. Naye oyo awaayo obulamu bwe ku lwange ne ku lwʼEnjiri alibuwonya.

³⁶Kale omuntu agasibwa ki singa alya ensi yonna, naye nʼafiirwa obulamu bwe?

³⁷Omuntu ayinza kuweebwa ki, akiwanyise olwʼobulamu bwe?

³⁸Era buli muntu yenna ankwatirwa ensonyi, nʼebigambo byange ne bimukwasa ensonyi mu mulembe guno ogutali mwesigwa era ogujjudde ebibi, Omwana wʼOmuntu alimukwatirwa ensonyi bwʼalijja mu kitiibwa kya Kitaawe ne bamalayika abatukuvu.”