Makko 9:1-50 LGCB2014 - Bible AI

¹Awo Yesu nʼabagamba nti, “Ddala ddala mbagamba nti, Abamu ku bantu abali wano tebalifa okuggyako nga bamaze okulaba obwakabaka bwa Katonda nga bujja nʼamaanyi.”

²Bwe waayitawo ennaku mukaaga Yesu nʼatwala Peetero ne Yakobo ne Yokaana nʼabakulembera ne bagenda ku ntikko yʼolusozi oluwanvu ne babeera eyo bokka. Amangwago nʼafuusibwa nga balaba,

³ebyambalo bye ne byeruka nnyo, nga tewali muntu ku nsi asobola kubyoza kubituusa awo!

⁴Awo Eriya ne Musa ne babalabikira ne batandika okwogera ne Yesu!

⁵Peetero nʼagamba Yesu nti, “Labbi[5], kirungi tubeere wano, tubazimbire eweema ssatu, emu nga yiyo, nʼendala nga ya Musa, nʼendala nga ya Eriya.”

⁶Yayogera atyo olwʼokutya okungi okwabajjira.

⁷Awo ne walabika ekire, ne kibasaanikira ne muvaamu eddoboozi ne ligamba nti, “Ono ye Mwana wange omwagalwa. Mumuwulirirenga.”

⁸Amangwago okugenda okukyusa amaaso gaabwe nga tewali muntu mulala okuggyako Yesu eyaliwo yekka nabo.

⁹Bwe baali bava ku lusozi nga baserengeta, Yesu nʼabakuutira ekyo kye balabye obutakyogerangako okutuusa ngʼOmwana wʼOmuntu amaze okuzuukira mu bafu.

¹⁰Bwe batyo nabo ne bakikuuma nga kya kyama, naye ne beebuuzaganya ku byʼokufa nʼokuzuukira kwe.

¹¹Awo ne bamubuuza nti, “Lwaki abannyonnyozi bʼamateeka bagamba nti Eriya asaanira asooke okujja.”

¹²Yesu nʼabagamba nti, “Kituufu Eriya yʼateekwa okusooka okujja alongoose buli kintu. Lwaki kyawandiikibwa ku Mwana wʼOmuntu nti ateekwa okubonaabona ennyo nʼokunyoomebwa?

¹³Naye mbagamba nti, Ddala ddala Eriya yajja! Naye yayisibwa bubi nnyo, nga bwe baayagala, nga bwe kyawandiikibwa ku ye.”

¹⁴Yesu nʼabayigirizwa bali abasatu bwe bakka eri bannaabwe okuva ku lusozi, ne basanga ekibiina kinene nga kyetoolodde bannaabwe, abannyonnyozi bʼamateeka nga bawakana nabo.

¹⁵Amangwago ekibiina kyonna bwe kyamulaba, ne badduka ne bagenda gyʼali ne bamwaniriza.

¹⁶Yesu nʼababuuza nti, “Kiki kye muwakana nabo?”

¹⁷Omu ku basajja abaali mu kibiina ne yeesowolayo nʼagamba nti, “Omuyigiriza, naleese wano omwana wange omuwonye. Tayinza kwogera aliko omwoyo omubi.

¹⁸Era buli lwe gumulumba gumusuula wansi, nʼabimba ejjovu ku mimwa nʼaluma amannyo, olwo yenna nʼakakanyala. Nsabye abayigirizwa bo bagumugobeko, naye ne balemwa.”

¹⁹Yesu nʼagamba nti, “Mmwe, omulembe ogutakkiriza ndituusa ddi okubeera nammwe? Mbagumiikirize kutuusa ddi? Mumundeetere wano.”

²⁰Ne bamumuleetera. Omwoyo bwe gwamulaba ne gusikambula omulenzi, ne gumusuula wansi, nga bwe yeevulungula nga bwʼabimba nʼejjovu ku mimwa.

²¹Yesu nʼabuuza kitaawe wʼomwana nti, “Kino kimaze bbanga ki?” Kitaawe nʼaddamu nti, “Okuviira ddala mu buto.

²²Oluusi gumusuula mu muliro oluusi mu mazzi nga gwagala okumutta. Obanga olina kyʼosobola okutukolera, tusaasire.”

²³Yesu nʼamuddamu nti, “Obanga osobola! Buli kimu kisoboka eri oyo akkiriza.”

²⁴Amangwago Kitaawe wʼomwana nʼayogerera waggulu nti, “Nzikiriza, naye nnyamba okukkiriza kwange kweyogereko!”

²⁵Yesu bwe yalaba ngʼekibiina kyeyongera obunene, nʼaboggolera dayimooni nti, “Ggwe omwoyo omubi ogutayogera era omuggavu gwʼamatu nkulagira muveeko, era tomuddiranga.”

²⁶Awo omwoyo ne guwowoggana nnyo, ne gumusikambula nnyo, ne gumuvaako nʼaba ngʼafudde, bangi ne balowooza nti afudde.

²⁷Naye Yesu nʼamukwata ku mukono nʼamuyimiriza.

²⁸Awo Yesu bwe yayingira mu nnyumba abayigirizwa be, ne bamubuuza mu kyama nti, “Lwaki ffe tetwasobodde kumugoba?”

²⁹Nʼaddamu nti, “Ogwʼengeri eno teguyinza kugenda awatali kusaba.”[6]

³⁰Bwe baava mu bitundu ebyo ne bayita mu Ggaliraaya. Yesu yali tayagala muntu yenna kumanya.

³¹Kubanga yali ayigiriza abayigirizwa ngʼabagamba nti, “Omwana wʼOmuntu, ajja kuliibwamu olukwe era ajja kuttibwa era nga wayise ennaku ssatu alizuukira.”

³²Wabula tebaategeera bye yayogera ate ne batya okumubuuza.

³³Awo ne batuuka e Kaperunawumu. Bwe baali mu nnyumba, nʼababuuza nti, “Mubadde muwakana ku ki mu kkubo?”

³⁴Naye ne basirika kubanga mu kkubo baawakanira asinga ekitiibwa mu bo!

³⁵Awo bwe yatuula nʼayita ekkumi nʼababiri, nʼabagamba nti, “Omuntu yenna bwʼayagala okuba oweekitiibwa okusinga banne, asaana yeetoowaze era abe omuweereza wʼabalala.”

³⁶Nʼaddira omwana omuto nʼamussa wakati waabwe, nʼamusitula mu mikono gye nʼabagamba nti,

³⁷“Buli asembeza omwana omuto ngʼono mu linnya lyange, aba asembezezza nze. Nʼoyo asembeza nze aba tasembezezza nze nzekka, wabula aba asembezezza nʼoyo eyantuma.”

³⁸Yokaana nʼamugamba nti, “Omuyigiriza, twalaba omuntu ngʼagoba baddayimooni mu linnya lyo, ne tumuziyiza kubanga tayita naffe.”

³⁹Naye Yesu nʼamuddamu nti, “Temumuziyizanga, kubanga tewali muntu nʼomu akola ebikolwa ebyʼamaanyi mu linnya lyange ate amangwago nʼanjogerako bibi.

⁴⁰Kubanga buli atatuvuganya aba akolera wamu naffe.

⁴¹Buli abawa eggiraasi yʼamazzi okunywako mu linnya lyange kubanga muli bantu ba Kristo, ddala ddala mbagamba nti Talirema kuweebwa mpeera.”

⁴²“Na buli alyesittaza omu ku bato bano abanzikiriza, ekyandisinze, kwe kumusiba ejjinja eryʼolubengo olunene, nʼasuulibwa mu nnyanja.

⁴³Obanga omukono gwo gukwesittaza, gutemeko! Okuba nʼomukono ogumu nʼoyingira mu bulamu kisinga okuba nʼemikono ebiri nʼolaga mu ggeyeena,

⁴⁴envunyu gye zitafa mu muliro ogutazikira.

⁴⁵Era obanga ekigere kyo kikwesittaza, kitemeko; okuba omulema nʼoyingira mu bulamu kisinga okuba nʼebigere ebibiri nʼolaga mu ggeyeena

⁴⁶envunyu gye zitafa mu muliro ogutazikira.

⁴⁷Era obanga eriiso lyo likwesittaza, liggyeemu! Kisinga okuyingira mu bwakabaka bwa Katonda ngʼoli wa liiso limu okusinga okubeera nʼamaaso go gombi, nʼosuulibwa mu ggeyeena,

⁴⁸ⓖ envunyu gye zitafa nʼomuliro gye gutazikira.

⁴⁹Buli muntu aliyisibwa mu muliro, ngʼemmere bwerungibwamu omunnyo.”

⁵⁰“Omunnyo mulungi, naye bwe guggwaamu ensa, guzzibwamu gutya obuka bwagwo? Noolwekyo mube nʼomunnyo mu mmwe era mubeerenga nʼemirembe buli muntu ne munne.”