Malaki 2:1-17 LGCB2014 - Bible AI

¹“Kale nno, mmwe bakabona, ekiragiro kino kyammwe.

²Bwe mutaakyuse ku mpisa zammwe nʼengeri zammwe, bwe mutaafeeyo kuwa linnya lyange kitiibwa,” bwʼayogera Mukama owʼEggye, “kale ndibasindikira ekikolimo era emikisa gyammwe girifuuka ekikolimo. Ate ddala mmaze okubakolimira kubanga ebikulu gye ndi temubitaddeeko mwoyo.

³“Kale laba, ndibonereza ezzadde lyammwe, mbasiige nʼobusa mu maaso, obusa bwa ssaddaaka zammwe, era mbagobewo mu maaso gange.

⁴ⓒ Olwo lwe mulimanya nga mbawadde ekiragiro kino, endagaano yange ne Leevi eryoke etuukirire,” bwʼayogera Mukama owʼEggye.

⁵ⓓ “Endagaano eri mu mateeka ago yali egenderedde kuleeta bulamu na mirembe era nʼembimuwa asobole okuntya, era nʼantya nʼayimirira ngʼatya erinnya lyange.

⁶Amateeka agʼamazima gali mu kamwa ke era nga tewali bulimba busangibwa mu kamwa ke. Yatambula nange mu mirembe ne mu butuukirivu era nʼaggya bangi mu kibi.

⁷“Kubanga emimwa gyʼabasumba gisaana okukuuma ebyʼamagezi ebya Katonda era abantu basaana okunoonya okutegeera okuva mu bo, kubanga be babaka ba Mukama owʼEggye.

⁸Naye mwakyama ne muva mu kkubo; mwesittaza bangi olwʼebyo bye muyigiriza; mwayonoona endagaano ya Leevi,” bwʼayogera Mukama owʼEggye.

⁹“Noolwekyo nabafuula ekinyoomebwa era ekisekererwa mu maaso gʼabantu bonna olwʼobutagoberera makubo gange era musala emisango nga musaliriza.”

¹⁰Kale ffenna tetulina kitaffe omu? Si Katonda omu eyatutonda? Lwaki kale tetuli beesigwa eri bantu bannaffe, ne twonoona endagaano ya bakitaffe?

¹¹Yuda takuumye bwesigwa nʼebyʼomuzizo ne bikolebwa mu Isirayiri ne mu Yerusaalemi. Kubanga Yuda yayonoona ekifo kya Mukama ekitukuvu, kyʼayagala ennyo, bwe yawasa omuwala wa lubaale.

¹²Buli muntu yenna akola kino, oba kabona oba muntu wa bulijjo, Mukama alimuggya mu kika kya Yakobo, newaakubadde ngʼaleeta ebiweebwayo eri Mukama owʼEggye!

¹³Ekirala kye mukola kye kino: Ekyoto kya Mukama mukijjuzza amaziga, nga mukaaba nga mukuba ebiwoobe kubanga ebiweebwayo byammwe takyabifaako.

¹⁴Kale mubuuza nti, “Lwaki tabifaako?” Kubanga Mukama yali mujulirwa wakati wo ne mukazi wo owʼomu buvubuka bwo, naye ggwe tewali mwesigwa, ngʼolimbalimba newaakubadde nga yali munno era mukazi wo gwe walagaana naye endagaano.

¹⁵Mukama Katonda teyabafuula omu mu mwoyo? Era lwaki yabafuula omu? Kubanga yali anoonya ezzadde eriritya Katonda. Kale mwekuume nnyo waleme kubaawo agoba mukazi we, era alimbalimba mukazi we owʼomu buvubuka bwe.

¹⁶“Kubanga nkyawa abafumbo okwawukana,” bwʼayogera Mukama Katonda wa Isirayiri, “nʼomusajja ajooga mukazi we,” bwʼayogera Mukama owʼEggye. Kale mwekuumenga mu mwoyo gwammwe mubeerenga beesigwa.

¹⁷Mukama mumukooyezza nʼebigambo byammwe. Naye mubuuza nti, “Tumukooyezza tutya?” Kubanga mwogera nti buli akola ekibi, mulungi mu maaso ga Mukama, era abasanyukira; oba nti, “Ali ludda wa Katonda owʼobwenkanya?”