Matayo 1:1-25 LGCB2014 - Bible AI

¹Luno lwe Lulyo lwa Yesu Kristo, omwana wa Dawudi omwana wa Ibulayimu.

²Ibulayimu yazaala Isaaka, Isaaka nʼazaala Yakobo, Yakobo nʼazaala Yuda ne baganda be.

³Yuda nʼazaala Perezi ne Zeera mu Tamali, Perezi nʼazaala Kezirooni, Kezirooni nʼazaala Laamu.

⁴Laamu yazaala Aminadaabu, Aminadaabu nʼazaala Nasoni, Nasoni nʼazaala Salumooni.

⁵Salumooni yazaala Bowaazi mu Lakabu, Bowaazi nʼazaala Obedi mu Luusi. Obedi nʼazaala Yese.

⁶Yese yazaala Kabaka Dawudi, Dawudi nʼazaala Sulemaani mu eyali muka Uliya.

⁷Sulemaani yazaala Lekobowaamu, Lekobowaamu nʼazaala Abiya, Abiya nʼazaala Asa.

⁸Asa nʼazaala Yekosafaati, Yekosafaati nʼazaala Yolaamu, Yolaamu nʼazaala Uzziya.

⁹Uzziya nʼazaala Yosamu, Yosamu nʼazaala Akazi, Akazi nʼazaala Keezeekiya.

¹⁰Keezeekiya nʼazaala Manaase, Manaase nʼazaala Amosi, Amosi nʼazaala Yosiya.

¹¹Yosiya nʼazaala Yekoniya ne baganda be mu kiseera ekyʼokutwalibwa e Babulooni.

¹²Nga bamaze okutwalibwa e Babulooni, Yekoniya nʼazaala Seyalutyeri, Seyalutyeri nʼazaala Zerubbaberi.

¹³Zerubbaberi nʼazaala Abiwuudi, Abiwuudi nʼazaala Eriyakimu, Eriyakimu nʼazaala Azoli.

¹⁴Azoli nʼazaala Zadooki, Zadooki nʼazaala Akimu, Akimu nʼazaala Eriwuudi.

¹⁵Eriwuudi nʼazaala Eriyazaali, Eriyazaali nʼazaala Mataani, Mataani nʼazaala Yakobo.

¹⁶Yakobo nʼazaala Yusufu, oyo ye bba wa Maliyamu eyazaala Yesu ayitibwa Kristo.

¹⁷Noolwekyo emirembe gyonna okuva ku Ibulayimu okutuuka ku Dawudi gyali kkumi nʼena, era okuva ku Dawudi okutuuka ku kuwaŋŋaangusibwa e Babulooni, emirembe kkumi nʼena, era okuva ku kuwaŋŋaangusibwa e Babulooni okutuuka ku Kristo, nagyo emirembe kkumi nʼena.

¹⁸Okuzaalibwa kwa Yesu Kristo kwali bwe kuti: Maliyamu nnyina bwe yali ngʼakyayogerezebwa Yusufu, era nga tebanaba kufumbiriganwa nʼalabika ngʼali lubuto ku bwa Mwoyo Omutukuvu.

¹⁹Awo Yusufu eyali amwogereza, olwokubanga yali muntu mulungi nʼasalawo mu mutima gwe okumuleka, naye ngʼayagala akikole mu kyama aleme kukwasa Maliyamu nsonyi.

²⁰Naye bwe yali ngʼagalamidde ku kitanda kye ngʼakyabirowoozaako, nʼafuna ekirooto; nʼalaba malayika wa Mukama ngʼayimiridde wʼali, nʼamugamba nti, “Yusufu, omwana wa Dawudi, totya kutwala Maliyamu okuba mukazi wo! Kubanga olubuto lwʼalina yalufuna ku bwa Mwoyo Mutukuvu.

²¹Era alizaala Omwana wabulenzi, olimutuuma erinnya Yesu, (amakulu nti, ‘Omulokozi’) kubanga yʼalirokola abantu bonna mu bibi byabwe.”

²²Bino byonna byabaawo kisobole okutuukirira ekyayogerwa Mukama ngʼayita mu nnabbi we ngʼagamba nti,

²³ⓐ “Laba omuwala atamanyi musajja aliba olubuto, alizaala omwana wabulenzi, era aliyitibwa ‘Emmanweri,’ amakulu gaalyo nti, ‘Katonda ali naffe.’ ”

²⁴Yusufu bwe yazuukuka, nʼakola nga Malayika bwe yamulagira, nʼatwala Maliyamu okuba mukazi we.

²⁵Naye Yusufu nʼatamumanya okutuusa lwe yamala okuzaala Omwana. Yusufu nʼamutuuma erinnya YESU.