Matayo 11:1-30 LGCB2014 - Bible AI

¹Awo Yesu bwe yamala okulagira abayigirizwa be ekkumi nʼababiri nʼavaayo nʼagenda okubuulira nʼokuyigiriza mu bibuga byabwe.

²Yokaana Omubatiza, eyali omusibe mu kkomera mu kiseera ekyo, bwe yawulira emirimu Kristo gye yali akola, nʼamutumira abayigirizwa be.

³Ne babuuza Yesu nti, “Ggwe wuuyo gwe tubadde tulinda, nantiki tulindirireyo omulala?”

⁴Yesu nʼabaddamu nti, “Muddeeyo eri Yokaana mumugambe bye mulaba ne bye muwulira.

⁵Abazibe bʼamaaso balaba, nʼabalema batambula. Abagenge balongoosebwa ne bakiggala bawulira, nʼabafu bazuukizibwa nʼabaavu babuulirwa Enjiri.

⁶Era mumumpeere obubaka buno nti, ‘Balina omukisa abo abatambuusabuusa.’ ”

⁷Awo abayigirizwa ba Yokaana Omubatiza bwe baamala okugenda, Yesu nʼategeeza abantu ebya Yokaana nti, “Bwe mwagenda mu ddungu mwagenderera kulaba ki? Olumuli olunyeenyezebwa nʼempewo?

⁸Naye kiki kye mwagenda okulaba? Omuntu ayambadde engoye ezinekaaneka? Laba abambala engoye ennungi babeera mu mbiri za bakabaka.

⁹Naye mwagenda kulaba ki? Nnabbi. Weewaawo ka mbabuulire, oyo asinga ne nnabbi.

¹⁰ⓡ Kubanga ye oyo ayogerwako mu Byawandiikibwa nti,

¹⁰‘Ndiweereza omubaka wange akukulembere, alikuteekerateekera ekkubo nga tonnajja.’

¹¹Ddala ddala mbagamba nti tewabangawo muntu eyazaalibwa omukazi asinga Yokaana Omubatiza. Naye asembayo okuba omukulu mu bwakabaka obwʼomu ggulu asinga Yokaana.

¹²Era okuva mu biro bya Yokaana Omubatiza nʼokutuusa kaakano, obwakabaka obwʼomu ggulu buyingirwa nʼamaanyi, era abantu abʼamaanyi ennyo be babutwala.

¹³Kubanga amateeka gonna era nʼobunnabbi byonna byayogera okutuukira ddala ku Yokaana.

¹⁴Era obanga mwagala okukkiriza, ye Eriya anaatera okujja.

¹⁵Alina amatu agawulira, awulire.”

¹⁶“Eggwanga lino nnaaligeraageranya ku ki? Bafaanana ngʼabaana abato abazannya emizannyo gyabwe mu katale, nga bagamba bato bannaabwe nti,

¹⁷‘Twabafuuyira omulere, ne mutazina; ne tuyimba oluyimba olwʼokukungubaga, ne mutakungubaga.’

¹⁸Kubanga Yokaana eyali talya wadde okunywa yajja ne mugamba nti, ‘Aliko dayimooni.’

¹⁹Omwana wʼOmuntu, bwe yajja ngʼalya era ngʼanywa, ne boogera nti, ‘Wa mululu, muntu munywi, era mukwano gwʼabasolooza bʼomusolo nʼaboonoonyi. Bʼabeeramu!’ So nga amagezi geeragira mu bikolwa.”

²⁰Yesu nʼanenya nnyo ebibuga mwe yakolera ebyamagero ebisinga obungi, kubanga tebeenenya.

²¹“Zikusanze, ggwe Kolaziini! Zikusanze ggwe Besusayida! Kubanga ebyamagero bye nakolera mu mmwe, singa nabikolera mu Ttuulo ne Sidoni, bandibadde beenenya dda nga bali mu bibukutu nʼevvu ku mitwe gyabwe.

²²Ddala ddala Ttuulo ne Sidoni biriyisibwa bulungiko okusinga mmwe ku lunaku olwʼokusalirako omusango!

²³Naawe Kaperunawumu, newaakubadde nga wagulumizibwa okutuuka eggulu gye likoma, naye olitoowazibwa okutuuka wansi ggeyeena gyʼeri. Kubanga ebyamagero ebyʼekitalo ebyakolebwa ewuwo, singa byakolerwa mu Sodomu, kyandibadde kikyaliwo ne leero.

²⁴Ddala ddala Sodomu kigenda kuyisibwa bulungiko, okusinga ggwe, ku lunaku olwʼokusalirako omusango!”

²⁵Yesu nʼasaba bwʼati nti, “Ayi Kitange, Mukama wʼeggulu nʼensi, nkwebaza kubanga ebigambo byo bino ebyʼamazima wabikisa abo abeeyita abʼamagezi ennyo, naye nʼobibikkulira abaana abato.

²⁶Weewaawo Kitange, bwʼotyo bwe wasiima.”

²⁷“Kitange yankwasa ebintu byonna era Kitange yekka yʼamanyi Omwana, nange Omwana Nze nzekka Nze mmanyi Kitange, nʼabo be mba njagadde okulaga Kitange nabo bamumanyi.”

²⁸“Mujje gye ndi mmwe mwenna abakooye era abazitoowereddwa, nange nnaabawummuza.

²⁹Musitule ekikoligo kyange, muyigire ku nze, kubanga ndi muwombeefu era omuteefu mu mutima, nʼemyoyo gyammwe girifuna ekiwummulo.

³⁰Kubanga ekikoligo kyange kyangu, nʼomugugu gwange teguzitowa.”