Matayo 12:1-50 LGCB2014 - Bible AI

¹Awo mu kiseera ekyo Yesu nʼayita mu nnimiro yʼemmere eyʼempeke ku lunaku lwa Ssabbiiti. Abayigirizwa be ne balumwa enjala ne batandika okunoga ebirimba byʼeŋŋaano ne babirya.

²Naye Abafalisaayo bwe baalaba kino ne bagamba Yesu nti, “Laba abayigirizwa bo bakola ekitakkirizibwa kukolebwa ku Ssabbiiti.”

³Naye Yesu nʼabaddamu nti, “Temusomanga ku Dawudi kye yakola bwe yalumwa enjala ne be yali nabo?

⁴Yayingira mu nnyumba ya Katonda nʼalya emigaati egyʼokulaga, egikkirizibwa bakabona bokka okulya.

⁵Oba temusomanga mu mateeka nti Bakabona ababeera mu luwalo lwʼokuweereza mu Yeekaalu ne basobya ku Ssabbiiti tebaliiko musango?

⁶Naye mbagamba nti ekisinga Yeekaalu kiri wano.

⁷ⓢ Naye singa mumanyi amakulu ga kino nti, ‘Njagala mubeerenga ba kisa okusinga okuwangayo ssaddaaka,’ temwandinenyezza bataliiko musango.

⁸Kubanga Omwana wʼOmuntu ye Mukama wa Ssabbiiti.”

⁹Nʼavaayo nʼajja mu kuŋŋaaniro lyabwe.

¹⁰Laba mwalimu omusajja eyalina omukono ogwakala. Ne babuuza Yesu obanga kikkirizibwa okuwonya ku Ssabbiiti.[9] Baali basuubira nti Anaddamu nti Kituufu, balyoke bamuwawaabire.

¹¹Naye nʼabaddamu nti, “Singa wabaddewo omuntu mu mmwe ngʼalina endiga emu, nʼegwa mu bunnya ku lunaku lwa Ssabbiiti, tagiggyamu?

¹²Kale, omuntu tasinga nnyo endiga omuwendo? Noolwekyo kikkirizibwa okukola ekirungi ku Ssabbiiti.”

¹³Bwʼatyo nʼagamba omusajja nti, “Golola omukono gwo.” Nʼagugolola ne guwona, ne guba mulamu nga gunnaagwo!

¹⁴Awo Abafalisaayo ne bafuluma ne bateesa nga bwe banaazikiriza Yesu.

¹⁵Naye Yesu bwe yakimanya nʼafuluma mu kuŋŋaaniro, abantu bangi nnyo ne bamugoberera, nʼawonya abaali abalwadde bonna,

¹⁶kyokka nʼabakomako baleme okumwatuukiriza.

¹⁷Ebyayogerwa Nnabbi Isaaya biryoke bituukirire nti:

¹⁸“Laba Omuweereza wange, ggwe neerondera, gwe njagala ennyo asanyusa emmeeme yange. Ndimuteekako Omwoyo wange era Alisalira amawanga gonna emisango.

¹⁹Taliyomba so talireekaana, era tewaliba nʼomu aliwulira eddoboozi lye mu nguudo.

²⁰Talimenya lumuli lunafu, wadde okuzikiriza olutambi lwʼettaala olunyooka.

²¹ⓣ Era abamawanga baliba nʼessuubi mu linnya lye.”

²²Awo Yesu ne bamuleetera omusajja eyaliko dayimooni, nga muzibe wʼamaaso era nga tayogera. Nʼamuwonya, omusajja eyali tasobola kwogera nʼasobola okwogera nʼokulaba.

²³Abantu bonna ne beewuunya ne boogera nti, “Ddala ddala ono si mwana wa Dawudi?”

²⁴Naye Abafalisaayo bwe baakiwulira ne boogera nti, “Ono agoba baddayimooni ku bwa Beeruzebuli omukulu wa baddayimooni.”

²⁵Yesu bwe yategeera ebirowoozo byabwe nʼabagamba nti, “Obwakabaka bwe bwawukanamu, oba ekibuga wadde amaka, tebiyinza kuyimirira.

²⁶Ne Setaani bwʼagoba Setaani munne ku muntu aba yeyawuddemu. Obwakabaka bwe bunaayimirira butya?

²⁷Obanga Nze ngoba baddayimooni ku bwa Beeruzebuli omukulu wa baddayimooni, kale batabani bammwe babagoba ku bwʼani? Noolwekyo be bali basalira omusango.

²⁸Naye bwe mba ngoba baddayimooni nʼamaanyi gʼOmwoyo wa Katonda, kale Obwakabaka bwa Katonda buzze gye muli.

²⁹“Oba omuntu ayinza atya okuyingira mu nnyumba yʼomuntu owʼamaanyi, nʼamunyagako ebintu bye okuggyako ngʼasooka okusiba owʼamaanyi oyo? Olwo nʼalyoka anyaga ebintu bye.

³⁰“Oyo atali nange, mulabe wange. Nʼoyo atakuŋŋaanyiza wamu nange asaasaanya.

³¹Noolwekyo mbategeereza ddala nti Omuntu alisonyiyibwa buli kibi kyonna, na buli kuvvoola. Naye alivvoola Mwoyo Mutukuvu talisonyiyibwa.

³²Na buli muntu ayogera ekigambo ekibi ku Mwana wʼOmuntu alisonyiyibwa, naye ayogera ekibi ku Mwoyo Omutukuvu talisonyiyibwa mu mulembe guno wadde ogugenda okujja.

³³“Buli muti gutegeererwa ku bibala byagwo. Omuti bwʼogulabirira gubala ebibala ebirungi, naye bwʼogulagajjalira tegubala bibala.

³⁴Mmwe abaana bʼembalasaasa, mmwe abalina ebibi muyinza mutya okwogera ebirungi? Akamwa koogera ebyo ebijjudde mu mutima.

³⁵Omusajja omulungi ayogera ebirungi ebiva mu tterekero lye eddungi, era nʼomuntu omubi ayogera ebibi ebiva mu tterekero lye ebbi.

³⁶Era mbategeeza nti Buli kigambo kyonna ekitasaana abantu kye boogera, kiribabuuzibwa ku lunaku olwʼokusalirako emisango.

³⁷Bwe bityo ebigambo byo bye birikuweesa obutuukirivu era ebigambo byo bye birikusalizisa omusango.”

³⁸Awo abamu ku bannyonnyozi bʼamateeka nʼAbafalisaayo ne bagamba Yesu nti, “Omuyigiriza twagala otulage akabonero.”

³⁹Naye nʼabaddamu nti, “Omulembe omwonoonefu era omwenzi ogunoonya akabonero; temugenda kuweebwa kabonero okuggyako aka nnabbi Yona.

⁴⁰Kubanga Yona nga bwe yamala mu lubuto lwʼekyennyanja ekinene ennaku ssatu emisana nʼekiro, nʼOmwana wʼOmuntu bwʼatyo bwʼalimala mu ttaka ennaku ssatu emisana nʼekiro.

⁴¹Abantu bʼe Nineeve bwe baliyimirira mu musango bagenda kusinzisa abantu bʼomulembe guno omusango, kubanga Yona bwe yababuulira bo ne beenenya. Naye laba asinga Yona ali wano.

⁴²Kabaka omukazi owʼObukiikaddyo aliyimirira nʼabantu bʼomulembe guno mu musango era alibasinzisa omusango, kubanga yava ewala ensi gyʼekoma nʼajja okuwulira amagezi ga Kabaka Sulemaani. Naye laba asinga Sulemaani ali wano.

⁴³“Omwoyo ogutali mulongoofu bwe guva mu muntu guyita mu malungu nga gunoonya awʼokuwumulirako, ne gutafuna wa kuwummulira.

⁴⁴Kyeguva gugamba nti, ‘Leka nzireyo mu nnyumba mwe nava.’ Bwe guddayo gusanga nkalu, nga eyereddwa era nga ntegeke.

⁴⁵Kyeguva gugenda ne guleeta emyoyo emirala musanvu egigusingako obwonoonefu, ne giyingira mu nnyumba omwo ne gibeera omwo. Olwo omuntu oyo nʼabeera bubi nnyo okusinga bwe yali okusooka. Bwe kityo bwe kiriba nʼomulembe guno omwonoonefu.”

⁴⁶Yesu bwe yali akyayogera nʼekibiina, nnyina ne baganda be ne batuuka ne bayimirira ebweru nga baagala okwogera naye.

⁴⁷Omuntu omu nʼamutegeeza nti, “Nnyoko ne baganda bo, bali wabweru baagala kwogera nawe.”

⁴⁸Yesu nʼamuddamu nti, “Mmange ye ani era ne baganda bange be baani?”

⁴⁹Nʼagolola omukono gwe eri abayigirizwa be nʼagamba nti, “Mulabe mmange ne baganda bange!

⁵⁰Kubanga buli akola ebyo Kitange ali mu ggulu byʼayagala oyo ye muganda wange, ye mwannyinaze era ye mmange.”