Matayo 13:1-58 LGCB2014 - Bible AI

¹Ku lunaku olwo Yesu nʼafuluma mu nnyumba nʼagenda nʼatuula ku lubalama lwʼennyanja.

²Ekibiina kinene ne kimukuŋŋaanirako. Kwe kuyingira mu lyato nʼatuula omwo abantu bonna ne bayimirira ku lubalama.

³Nʼababuulira ebintu bingi mu ngero ngʼagamba nti, “Omulimi yali asiga ensigo mu nnimiro ye.

⁴Bwe yagenda ngʼamansa ensigo, ezimu ne zigwa ku mabbali gʼekkubo, ennyonyi ne zijja ne zizirya.

⁵Endala ne zigwa ku lwazi okutali ttaka lingi era ne zimera mangu kubanga ettaka teryali ggwanvu.

⁶Naye omusana bwe gwayaka ne ziwotoka kubanga emirandira gyazo gyali kumpi.

⁷Endala ne zigwa mu maggwa, bwe zaamera amaggwa nago ne gakula ne gazisinga amaanyi, obulimi obwali bwakamera ne bukala.

⁸Endala ne zigwa ku ttaka eddungi, ne zimera ne zibala bulungi, ne zivaamu emirundi amakumi asatu, nʼendala emirundi nkaaga nʼendala emirundi kikumi.

⁹Alina amatu agawulira, awulire.”

¹⁰Abayigirizwa be ne bamusemberera ne bamubuuza nti, “Lwaki oyogera nabo mu ngero?”

¹¹Nʼabaddamu nti, “Mmwe mulina omukisa kubanga mwaweebwa okutegeera ebyama ebyʼobwakabaka obwʼomu ggulu, naye bo tebaakiweebwa.

¹²Kubanga buli alina alyongerwako abeerere ddala na bingi, naye oyo atalina aliggyibwako nʼako akatono kʼalina.

¹³Kyenva njigiriza mu ngero, abalaba baleme okulaba, nʼabawulira baleme okuwulira wadde okutegeera.

¹⁴Kino kituukiriza nnabbi Isaaya kye yagamba nti, ‘Muliwulira naye temulitegeera nʼokulaba muliraba naye temulimanya.

¹⁵ⓤ Kubanga omutima gwʼabantu bano gwesibye, nʼamatu gaabwe tegawulira bulungi. Nʼamaaso gaabwe gazibiridde baleme okulaba nʼamaaso wadde okuwulira nʼamatu, wadde omutima gwabwe okutegeera, ne bakyuka ne mbawonya.’

¹⁶Naye amaaso gammwe galina omukisa, kubanga galaba, nʼamatu gammwe kubanga gawulira.

¹⁷Ddala ddala mbagamba nti, Waaliwo bannabbi bangi, nʼabatuukirivu bangi abeegombanga okulaba ku bino bye mulaba, nʼokuwulira bye muwulira kyokka ne batafuna mukisa ogwo.

¹⁸“Noolwekyo muwulirize olugero Lwʼomulimi eyasiga ensigo.

¹⁹Ensigo eyagwa ku mabbali gʼekkubo efaanana ngʼomuntu awulira ekigambo kya Katonda nʼatakitegeera era omulabe Setaani nʼajja nʼakimusikulako okuva ku mutima.

²⁰Ensigo eyagwa ku lwaziyazi efaanana ngʼomuntu awulira ekigambo amangwago nʼakyaniriza nʼessanyu,

²¹naye olwʼokuba nga talina mmizi mu ye, wa kaseera buseera, ennaku nʼokuyigganyizibwa bwe bijja olwʼekigambo, amangwago nʼagwa.

²²Nʼensigo eyagwa mu maggwa efaanana ngʼomuntu awulira ekigambo naye okweraliikirira kwʼebintu byʼensi nʼobugagga obutaliimu ne bibuutikira ekigambo ne kitabala bibala.

²³Naye ensigo eyagwa ku ttaka eddungi efaanana ngʼomuntu awulira ekigambo nʼakitegeera, nʼabalira ddala ebibala, nʼabala ebibala amakumi asatu, oba nkaaga oba kikumi.”

²⁴Nʼabagerera olugero olulala nti, “Obwakabaka obwʼomu ggulu bufaanana nʼomuntu eyasiga ensigo ennungi mu nnimiro ye,

²⁵naye ekiro nga yeebase abasajja abalabe ne bajja ne basiga omuddo wakati mu ŋŋaano ye ne bagenda.

²⁶Naye eŋŋaano ennungi bwe yamera, nʼomuddo ne gumerera wamu nayo.

²⁷“Naye abaddu bʼomwami wʼennyumba bwe baamusemberera ne bamugamba nti, ‘Mukama waffe, tewasiga nsigo nnungi mu nnimiro yo? Naye ate omuddo guvudde wa?’

²⁸“Ye nʼabaddamu nti, ‘Omulabe ye yakola ekyo.’ Abaddu kyebaava bamubuuza nti, ‘Tugende tugukoolemu?’

²⁹“Nʼabaddamu nti, ‘Nedda, kubanga bwe munaaba mukuulamu omuddo mujja kukuuliramu nʼeŋŋaano.

³⁰Kale mubireke byonna bikulire wamu, okukungula bwe kulituuka ne ndyoka ndagira abakunguzi basooke bakuŋŋaanye omuddo bagusibeko nʼoluvannyuma bagwokye, naye yo eŋŋaano bagikuŋŋaanyize mu mawanika gange.’ ”

³¹Nʼabagerera olugero olulala ngʼagamba nti, “Obwakabaka obwʼomu ggulu bufaanana ngʼakaweke ka kaladaali, omusajja ke yasiga mu nnimiro.

³²Kaladaali kaweke katono nnyo okusinga ensigo endala zonna. Naye bwe kasimbibwa ne kakula kavaamu omuti omunene ennyo, nʼennyonyi ezʼomu bbanga ne zijja ne zibeera ku matabi gaagwo.”

³³Nʼabongerayo olugero olulala nti, “Obwakabaka obwʼomu ggulu buyinza okugeraageranyizibwa nʼekizimbulukusa omukazi kye yakweka mu buwunga bwʼeŋŋaano, nʼapima ebigero bisatu okutuusa lwe bwazimbulukuka bwonna.”

³⁴Bino byonna Yesu yabyogerera mu ngero eri ebibiina era teyayogera gye bali awatali ngero.

³⁵ⓥ Ekyayogerwa nnabbi ne kiryoka kituukirira nti,

³⁵“Ndyogerera mu ngero, njogere ebintu ebyakwekebwa okuva ku kutondebwa kwʼensi.”

³⁶Awo bwe yamala okusiibula ekibiina nʼayingira mu nnyumba, abayigirizwa be ne bamusemberera ne bamusaba abannyonnyole amakulu gʼolugero lwʼomuddo ogwali mu nnimiro.

³⁷Nʼabannyonnyola ngʼagamba nti, “Omwana wʼOmuntu ye yasiga ensigo ennungi.

³⁸Ennimiro yʼensi, nʼensigo ennungi be baana bʼobwakabaka, naye omuddo be baana ba Setaani.

³⁹Omulabe eyasiga ensigo ezʼomuddo ye Setaani, amakungula yʼenkomerero yʼensi nʼabakunguzi be bamalayika.

⁴⁰“Noolwekyo ngʼomuddo bwe gwakuŋŋaanyizibwa ne gwokebwa mu muliro, bwe kityo bwe kiriba ku nkomerero yʼensi.

⁴¹Omwana wʼOmuntu alituma bamalayika be mu bwakabaka bakuŋŋaanye ebintu byonna ebyesittaza, nʼabajeemu,

⁴²babasuule mu nkoomi yʼomuliro. Omwo mwe muliba okukaaba nʼokuluma obujiji.

⁴³Naye abatuukirivu balyakaayakana ngʼenjuba mu bwakabaka bwa Kitaabwe. Alina amatu agawulira, awulire.

⁴⁴“Obwakabaka obwʼomu ggulu bufaanana nʼekyobugagga ekyakwekebwa[10] mu nnimiro omuntu omu bwe yakigwikiriza. Olwʼessanyu lye yafuna nʼagenda nʼatunda bye yalina byonna, nʼagula ennimiro eyo.

⁴⁵“Ate era obwakabaka obwʼomu ggulu bufaanana ngʼomusuubuzi wʼamayinja agʼomuwendo omungi eyali anoonya amayinja agʼomuwendo,

⁴⁶bwe yazuula ejjinja erimu eryʼomuwendo nʼagenda nʼatunda bye yalina byonna nʼaligula.

⁴⁷“Era obwakabaka obwʼomu ggulu bufaanana ngʼakatimba akategebwa mu nnyanja ne kakwasa ebyennyanja ebya buli ngeri,

⁴⁸akatimba bwe kajjula ne bakawalulira ku lubalama ne balondamu ebirungi nga babikuŋŋaanyiza mu bisero, ebibi nga babisuula.

⁴⁹Bwe kiriba bwe kityo ne ku nkomerero yʼensi, bamalayika balijja ne baawulamu abantu abatuukirivu nʼababi.

⁵⁰Ababi balibasuula mu nkoomi yʼomuliro eriba okukaaba nʼokuluma obujiji.”

⁵¹Yesu nʼababuuza nti, “Ebintu bino byonna mubitegedde?” Ne bamuddamu nti, “Weewaawo.”

⁵²Kyeyava abagamba nti, “Noolwekyo omuwandiisi eyayiga obulungi amateeka gʼEkiyudaaya ate nʼafuuka omuyigiriza wʼobwakabaka obwʼomu ggulu, ali ngʼomusajja nnyini nnyumba, aggyayo mu tterekero lye ebipya nʼebikadde.”

⁵³Awo Yesu bwe yamala okugera engero ezo nʼavaayo,

⁵⁴nʼaddayo mu kibuga kyʼewaabwe nʼayigiriza mu kuŋŋaaniro lyabwe. Nʼabeewuunyisa ne bagamba nti, “Yaggya wa amagezi nʼebyamagero ebyo?”

⁵⁵Ne beebuuza nti, “Ono si ye mutabani wʼomubazzi? Nnyina ye Maliyamu ne baganda be ba Yakobo, ne Yusufu, ne Simooni ne Yuda.

⁵⁶Ne bannyina babeera kuno. Kale, ebyo byonna yabiggya wa?”

⁵⁷Ne bamunyiigira nga balowooza nti abeeragirako. Naye Yesu nʼabagamba nti, “Nnabbi aweebwa ekitiibwa mu buli kifo, okuggyako mu kitundu kyʼewaabwe ne mu nnyumba yʼewaabwe.”

⁵⁸Era yakolerayo ebyamagero bitono olwʼobutakkiriza bwabwe.