Matayo 14:1-36 LGCB2014 - Bible AI

¹Mu kiseera ekyo Kabaka Kerode bwe yawulira ettutumu lya Yesu

²nʼagamba abaweereza be nti, “Oyo ye Yokaana Omubatiza azuukidde mu bafu, era yʼakola ebyʼamagero.”

³Kuba Kerode yali amaze okukwata Yokaana nʼamussa mu kkomera, kubanga Yokaana yamunenya olwa Kerodiya muka Firipo muganda we,

⁴kubanga Yokaana yagamba Kerode nti, “Si kituufu okusigula muka muganda wo nʼomufuula owuwo.”

⁵Kerode yali ayagala kumutta naye nʼatya abantu kubanga baalowooza Yokaana okuba nnabbi.

⁶Olunaku lwʼamazaalibwa ga Kerode bwe lwatuuka muwala wa Kerodiya nʼazina nnyo ku mbaga nʼasanyusa nnyo Kerode.

⁷Awo Kerode nʼasuubiza omuwala ngʼalayira okumuwa kyonna kyʼanaamusaba.

⁸Naye bwe yaweebwa nnyina amagezi, nʼagamba nti, “Mpeera wano omutwe gwa Yokaana Omubatiza ku lusaniya.”

⁹Kabaka ekintu ekyo ne kimunakuwaza nnyo. Naye olwokubanga yali yakisuubiza mu maaso gʼabagenyi be, kyeyava alagira bagumuleetere.

¹⁰Ne bagenda mu kkomera ne batemako Yokaana omutwe

¹¹ne baguleetera ku lusaniya ne baguwa omuwala, naye nʼagutwalira nnyina.

¹²Abayigirizwa ba Yokaana ne banonayo omulambo gwe ne bagutwala ne baguziika, ne balyoka bagenda ne babikira Yesu.

¹³Yesu bwe yabiwulira ebyo, nʼasaabala mu lyato, nʼabaako gyʼalaga abeere yekka mu kyama. Naye abantu bangi nnyo bwe baakiwulira ne bava mu bibuga bingi, ne beekooloobya, ne bamugoberera nga bayita ku lukalu.

¹⁴Yesu bwe yava eyo nʼalaba, abantu bangi nʼabasaasira nʼawonya abalwadde baabwe.

¹⁵Obudde bwe bwawungeera abayigirizwa be ne bajja gyʼali ne bamugamba nti, “Laba obudde buzibye ate tuli mu ddungu, ssiibula abantu bagende beegulire emmere mu bibuga.”

¹⁶Naye Yesu nʼabaddamu nti, “Tekyetaagisa kubasiibula, mmwe mubawe ekyokulya.”

¹⁷Ne bamuddamu nti, “Ffe tetulina kyakulya kiyinza kubamala, wabula tulinawo emigaati etaano gyokka nʼebyennyanja bibiri.”

¹⁸Nʼabagamba nti, “Kale mubindetere wano.”

¹⁹Nʼalagira ekibiina kituule wansi ku muddo, nʼaddira emigaati etaano nʼebyennyanja ebibiri, nʼatunula waggulu ne yeebaza, emigaati nʼagimenyaamenyamu nʼagiwa abayigirizwa ne batandika okugabula ekibiina.

²⁰Bonna ne balya ne bakkuta; obutundutundu obwafikkawo ne babukuŋŋaanya wamu ne bujjuza ebisero kkumi na bibiri!

²¹Abantu bonna abaalya baali ngʼenkumi ttaano nga totaddeeko bakazi na baana.

²²Amangwago Yesu nʼalagira abayigirizwa be basaabale eryato bagende emitala wʼennyanja, ye asigale ngʼakyasiibula abantu.

²³Bwe yamala okusiibula ekibiina nʼayambuka ku lusozi yekka okusaba. Obudde ne buziba ngʼali eyo yekka.

²⁴Eryato abayigirizwa mwe baali bwe lyatuuka e buziba, omuyaga mungi ne gubafuluma mu maaso eryato ne lyesunda.

²⁵Awo ku ssaawa nga mwenda ezʼekiro, Yesu nʼajja gye bali ngʼatambula ku nnyanja.

²⁶Naye abayigirizwa bwe baamulaba ngʼatambulira ku nnyanja ne batya, nga balowooza nti muzimu.

²⁷Awo amangwago Yesu nʼabagamba nti, “Mugume, Nze nzuuno temutya.”

²⁸Peetero nʼamugamba nti, “Obanga ye ggwe ddala Mukama waffe, ndagira nange nzije gyʼoli nga ntambulira ku mazzi.”

²⁹Yesu nʼamuddamu nti, “Kale jjangu.” Peetero nʼava mu lyato nʼatambulira ku mazzi okugenda eri Yesu.

³⁰Naye Peetero bwe yalaba omuyaga ogwʼamaanyi, nʼatya nʼatandika okusaanawo, nʼakoowoola Yesu nti, “Mukama wange, ndokola!”

³¹Amangwago Yesu nʼagolola omukono gwe nʼamukwata, nʼamugamba nti, “Ggwe alina okukkiriza okutono, lwaki obuusizzabuusizza?”

³²Bwe baalinnya mu lyato omuyaga gwonna ne guggwaawo.

³³Nʼabo abaali mu lyato ne bamusinza nga bagamba nti, “Ddala ddala oli Mwana wa Katonda!”

³⁴Bwe baasomoka ne bagukkira ku lukalu e Genesaleeti.

³⁵Abantu bʼomu kitundu ekyo bwe baamutegeera ne batumya abalwadde bonna ne babamuleetera.

³⁶Ne bamwegayirira waakiri bakomeko bukomi ku lukugiro lwʼekyambalo kye, era buli eyakomako nʼawonyezebwa.