Matayo 15:1-39 LGCB2014 - Bible AI

¹Awo Abafalisaayo nʼabannyonnyozi bʼamateeka ne bava e Yerusaalemi ne bajja eri Yesu ne bamubuuza nti:

²“Abayigirizwa bo lwaki banyoomoola obulombolombo bwʼAbakadde? Kubanga tebanaaba mu ngalo nga bagenda okulya emmere.”

³Naye Yesu naye nʼababuuza nti, “Lwaki mumenya amateeka ga Katonda, nga mwerimbika mu bulombolombo bwammwe?

⁴ⓦ Katonda yagamba nti, ‘Kitaawo ne nnyoko obassangamu ekitiibwa. Oyo anaavumanga kitaawe ne nnyina battanga mutte,’

⁵Naye mmwe mugamba nti, Buli agamba kitaawe oba nnyina nti, ‘Ekirabo kye nandikuwadde nkiwaddeyo eri Katonda,’ omuntu oyo teyeetaaga kussaamu kitaawe kitiibwa.

⁶Noolwekyo tassaamu kitaawe oba nnyina kitiibwa. Bwe mutyo ne mudibya etteeka lya Katonda olwʼobulombolombo bwammwe.

⁷Mmwe bannanfuusi! Nnabbi Isaaya yayogera bulungi ebyobunnabbi ebibakwatako bwe yagamba nti,

⁸‘Abantu bano banzisaamu ekitiibwa kya ku mimwa.’ Naye emitima gyabwe gindi wala.

⁹ⓧ ‘Okusinza kwabwe kwa bwereere. Kubanga bayigiriza amateeka abantu ge beekoledde.’ ”

¹⁰Yesu nʼayita ekibiina nʼabagamba nti, “Mumpulirize era mutegeere.

¹¹Omuntu kyʼalya si kye kimwonoonyesa, wabula ekyo ekiva mu kamwa ke, kye kimwonoonyesa.”

¹²Abayigirizwa be ne bajja gyʼali ne bamugamba nti, “Omanyi ebigambo byo nga bwe binyiizizza Abafalisaayo?”

¹³Naye Yesu nʼaddamu nti, “Buli kisimbe Kitange ali mu ggulu kyʼataasimba kigenda kusimbulwa.

¹⁴Noolwekyo mubaleke. Bakulembeze abazibe bʼamaaso. Bafaanana omuzibe wʼamaaso akulembera muzibe munne, kubanga bombi bagenda kugwa mu bunnya.”

¹⁵Peetero nʼamugamba nti, “Tunnyonnyole olugero olwo.”

¹⁶Yesu nʼabagamba nti, “Nammwe era temunnategeera?

¹⁷Temumanyi nti Buli muntu kyʼalya kigenda mu lubuto mwe kiva nʼakifulumiza mu kiyigo?

¹⁸Naye ebintu ebiva mu kamwa, biva mu mutima ne byonoona omuntu.

¹⁹Kubanga mu mutima mwe muva ebirowoozo ebibi, obussi, nʼobwenzi, nʼobukaba, nʼobubbi, nʼokuwaayiriza, nʼokuvvoola.

²⁰Ebyo bye byonoona omuntu, naye okulya nga tonaabye mu ngalo, tekwonoona muntu.”

²¹Yesu nʼava mu kifo ekyo, nʼagenda mu kitundu omuli ebibuga Ttuulo ne Sidoni.

²²Awo omukazi Omukanani eyali abeera mu bitundu ebyo, nʼajja eri Yesu nʼamwegayirira nti, “Onsaasire Mukama wange, Omwana wa Dawudi! Muwala wange aliko dayimooni amubonyaabonya nnyo.”

²³Naye Yesu nʼasirika nʼatamuddamu kigambo na kimu. Abayigirizwa be ne bajja ne bamugamba nti, “Bwʼomugoba nʼagenda. Ngʼayitirizza okutukaabirira.”

²⁴Naye Yesu nʼaddamu omukazi nti, “Nze saatumibwa walala wonna, wabula eri endiga za Isirayiri ezaabula.”

²⁵Naye omukazi nʼasembera awali Yesu nʼamusinza, nʼamwegayirira ngʼagamba nti, “Mukama wange, nnyamba.”

²⁶Yesu nʼamuddamu nti, “Si kituufu okuddira emmere yʼabaana okugisuulira embwa.”

²⁷Omukazi nʼaddamu nti, “Weewaawo, Mukama wange, naye nʼembwa nazo zirya ku bukunkumuka obugwa wansi okuva ku mmeeza ya mukama waazo.”

²⁸Awo Yesu nʼamugamba nti, “Mukazi watu, ngʼokukkiriza kwo kunene! Kale kikukolerwe nga bwʼoyagala.” Amangwago muwala we nʼawonera mu kiseera ekyo.

²⁹Yesu nʼavaayo nʼajja emitala okumpi nʼennyanja yʼe Ggaliraaya nʼalinnya ku lusozi nʼatuula eyo.

³⁰Abantu bangi ne bajja gyʼali, ne bamuleetera, abakoozimbye, nʼabatayogera nʼabalala bangi ne babassa we yali nʼabawonya.

³¹Abantu bangi ne beewuunya, nga balaba ababadde batayogera nga boogera, nʼababadde bakoozimbye nga bawonye, nʼababadde abalema nga batambula, nʼababadde abazibe bʼamaaso nga balaba. Ne bagulumiza Katonda wa Isirayiri.

³²Awo Yesu nʼayita abayigirizwa be nʼabagamba nti, “Abantu bano mbasaasira, kubanga baakamala nange ennaku ssatu ate tebalina kyakulya. Ssaagala kubasiibula ne bagenda enjala, si kulwa nga bagwa ku kkubo.”

³³Abayigirizwa ne bamugamba nti, “Wano mu ddungu tunaggya wa emigaati emingi gye tunaaliisa abantu abangi bwe bati?”

³⁴Yesu nʼababuuza nti, “Mulinawo emigaati emeka?” Ne bamuddamu nti, “Tulinawo emigaati musanvu nʼebyennyanja bitono.”

³⁵Yesu nʼalagira abantu bonna batuule wansi,

³⁶nʼaddira emigaati omusanvu nʼebyennyanja, bwe yamala okwebaza, nʼabimenyaamenyamu, nʼawa abayigirizwa be ne batandika okugabula ekibiina.

³⁷Buli muntu nʼalya nʼakkuta. Ne babukuŋŋaanya obutundutundu obwasigalawo ne bujjuza ebisero musanvu.

³⁸Abaalya baawera abasajja enkumi nnya nga totaddeeko bakazi na baana.

³⁹Awo Yesu nʼasiibula ekibiina, nʼasaabala mu lyato nʼagenda mu nsalo yʼe Magadani.