Matayo 16:1-28 LGCB2014 - Bible AI

¹Awo Abafalisaayo nʼAbasaddukaayo ne bajja eri Yesu okumugezesa nga bamusaba akabonero akava mu ggulu.

²Naye Yesu nʼabaddamu nti, “Obudde bwe buwungeera mugamba nti, obudde bujja kuba bulungi kubanga eggulu limyuse nnyo.

³Ate eggulu bwe limyuka ku nkya mumanya nti Olunaku lwonna obudde bujja kwefuukuula. Mumanyi bulungi endabika yʼeggulu nʼokwawula ebiseera, naye lwaki temusobola kutegeera bubonero bwa biro?

⁴Mmwe abʼomulembe omwonoonefu era omwenzi musaba akabonero naye temuliweebwa kabonero okuggyako aka Yona.” Yesu nʼabaviira nʼagenda.

⁵Abayigirizwa bwe baasomoka okuva emitala wʼeri ne beerabira okuleeta emigaati.

⁶Naye Yesu nʼabagamba nti, “Mwekuume ekizimbulukusa kyʼAbafalisaayo nʼAbasaddukaayo.”

⁷Naye Abayigirizwa ne boogeraganya bokka ne bokka nti, “Ayogedde bwʼatyo kubanga tetwaleese migaati.”

⁸Yesu bwe yamanya ebirowoozo byabwe nʼabagamba nti, “Mmwe abalina okukkiriza okutono lwaki mweraliikirira nga mugamba nti, ‘temulina mmere?’

⁹Era temunnategeera wadde okujjukira emigaati etaano abantu enkumi ettaano gye baalya, nʼebibbo bye mwakuŋŋaanya ebyafikkawo?

¹⁰Era nʼemigaati omusanvu abantu enkumi ennya gye baalya nʼebibbo bye mwakuŋŋaanya ebyafikkawo?

¹¹Kale lwaki temutegeera nti Mbadde ssoogera ku migaati? Naye mwekuume ekizimbulukusa ekyʼAbafalisaayo nʼAbasaddukaayo.”

¹²Ne balyoka bategeera nti yali tayogera ku kizimbulukusa kya migaati naye yali ayogera ku njigiriza yʼAbafalisaayo nʼAbasaddukaayo.

¹³Awo Yesu bwe yatuuka mu kitundu kya Kayisaliya ekya Firipo nʼabuuza abayigirizwa be nti, “Abantu Omwana wʼOmuntu bagamba nti ye ani?”

¹⁴Ne bamuddamu nti, “Yokaana Omubatiza, abalala nti Eriya, nʼabalala nti Yeremiya oba omu ku bannabbi.”

¹⁵Awo Yesu nʼababuuza nti, “Mmwe mundowooza kuba ani?”

¹⁶Simooni Peetero nʼaddamu nti, “Ggwe Kristo, Omwana wa Katonda omulamu.”

¹⁷Yesu nʼamugamba nti, “Olina omukisa Simooni, omwana wa Yona, kubanga ekyo Kitange ali mu ggulu yʼakikubikkulidde, so tokiggye mu bantu.

¹⁸Era nkutegeeza nti, Ggwe Peetero, olwazi, era ku lwazi okwo kwe ndizimba Ekkanisa yange, nʼamaanyi gonna aga Setaani tegaligiwangula.

¹⁹Era ndikuwa ebisumuluzo byʼobwakabaka obwʼomu ggulu; era kyonna kyʼonoosibanga ku nsi, ne mu ggulu kinaasibwanga, na buli kyʼonoosumululanga ku nsi, ne mu ggulu kinaasumululwanga.”

²⁰Awo nʼakuutira abayigirizwa be baleme kubuulirako muntu nʼomu nti Ye Kristo.

²¹Okuva mu kiseera ekyo Yesu nʼatandika okunnyonnyola abayigirizwa be nga bwe kimugwanidde okugenda e Yerusaalemi, abakulembeze bʼAbayudaaya ne bakabona abakulu, nʼabannyonnyozi bʼamateeka bamubonyeebonye, era bamutte; naye ku lunaku olwokusatu azuukire.

²²Peetero nʼamuzza ebbali nʼatandika okumunenya ngʼamugamba nti, “Katonda akulage ekisa Mukama waffe. Bino tebirikutuukako.”

²³Naye Yesu nʼakyukira Peetero nʼamugamba nti, “Dda ennyuma wange Setaani. Oli kyesittaza gye ndi, kubanga tolowoozeza bintu bya Katonda wabula olowooza bintu bya bantu.”

²⁴Awo Yesu nʼagamba abayigirizwa be nti, “Omuntu bwʼayagala okungoberera asaana yeefiirize yekka, yeetikke omusaalaba gwe alyoke angoberere.

²⁵Kubanga buli agezaako okuwonya obulamu bwe alibufiirwa, oyo alifiirwa obulamu bwe ku lwange alibuwonya.

²⁶Kigasa ki omuntu okufuna ensi yonna naye nʼafiirwa obulamu bwe? Oba kiki omuntu kyayinza okuwaayo olwʼobulamu bwe?

²⁷Kubanga Omwana wʼOmuntu anaatera okujja mu kitiibwa kya Kitange ne bamalayika be alyoke asasule buli muntu ngʼebikolwa bye bwe byali.

²⁸Ddala ddala mbagamba nti Ku mmwe abali wano kuliko abatalirega ku kufa okutuusa lwe baliraba Omwana wʼOmuntu ngʼajja nʼobwakabaka bwe.”