Matayo 17:1-27 LGCB2014 - Bible AI

¹Oluvannyuma lwʼennaku mukaaga Yesu nʼatwala Peetero, ne Yakobo ne Yokaana muganda we, nʼabalinnyisa ku lusozi oluwanvu.

²Nʼafuusibwa nga balaba, amaaso ge ne gamasamasa ngʼenjuba nʼebyambalo bye ne byeruka ne byakaayakana.

³Laba Musa ne Eriya ne balabika, ne boogera ne Yesu.

⁴Peetero nʼagamba Yesu nti, “Mukama waffe, nga kya kitalo nnyo ffe okubeera wano! Bwʼoba ngʼosiimye, nzimbe wano ensiisira ssatu, emu yiyo endala ya Musa nʼendala ya Eriya.”

⁵Bwe yali akyayogera ebyo ekire ekimasamasa ne kiva waggulu ne kibabuutikira eddoboozi ne liva mu kire ne ligamba nti, “Ono ye Mwana wange gwe njagala ennyo, era gwe nsanyukira ennyo. Mumuwulirenga.”

⁶Abayigirizwa bwe baakiwulira ne bagwa wansi ne beevuunika nga batidde nnyo.

⁷Yesu nʼajja gye bali nʼabakwatako nʼabagamba nti, “Mugolokoke temutya.”

⁸Bwe babbulula amaaso, baalabawo Yesu yekka!

⁹Bwe baali baserengeta olusozi, Yesu nʼabakuutira nti, “Ebyo bye mulabye temubibuulirako omuntu nʼomu okutuusa Omwana wʼOmuntu lwʼalimala okuzuukira mu bafu.”

¹⁰Abayigirizwa ne bamubuuza nti, “Kale lwaki abannyonnyozi bʼamateeka bagamba nti, Eriya kimugwanira okumala okujja?”

¹¹Yesu nʼabaddamu nti, “Weewaawo, Eriya alijja nʼazzaawo ebintu byonna.

¹²Naye mbagamba nti, Eriya yajja dda, naye tebaamutegeera, era naye ne bamukola buli kye baayagala. Bwʼatyo nʼOmwana wʼOmuntu anaatera okubonyaabonyezebwa.”

¹³Awo abayigirizwa be ne bategeera nti Yali ayogera ku Yokaana Omubatiza.

¹⁴Awo bwe yatuuka awaali ekibiina, omusajja nʼajja gyʼali nʼafukamira we yali, nʼamugamba nti,

¹⁵“Mukama wange, ssaasira mutabani wange, kubanga mulwadde agwa ensimbu, era zimubonyaabonya nnyo kubanga emirundi mingi zimusuula mu muliro ne mu mazzi.

¹⁶Bwe namuleese eri abayigirizwa bo tebasobodde kumuwonya.”

¹⁷Yesu nʼaddamu nti, “Mmwe omulembe ogutalina kukkiriza omubi. Ndituusa ddi okubeera nammwe? Ndibagumiikiriza kutuusa ddi? Kale mumundeetere wano.”

¹⁸Yesu nʼaboggolera dayimooni, nʼava ku mulenzi, omulenzi nʼawona mu kiseera ekyo.

¹⁹Awo oluvannyuma abayigirizwa ne bajja eri Yesu mu kyama ne bamubuuza nti, “Ffe lwaki tetwasobodde kugoba dayimooni oyo?”

²⁰Yesu nʼabaddamu nti, “Olwʼokukkiriza kwammwe okutono. Kubanga ddala ddala mbagamba nti, bwe muba nʼokukkiriza okufaanana ngʼakaweke ka kaladaali, mwandiyinzizza okugamba olusozi luno nti, ‘Vvaawo wano,’ era ne luvaawo era tewandibaddewo kye mulemwa.

²¹Naye kyokka dayimooni owʼengeri eno tagobeka awatali kusaba na kusiiba.”

²²Ne bakuŋŋaanira mu Ggaliraaya, Yesu nʼabagamba nti, “Omwana wʼOmuntu anaatera okuliibwamu olukwe aweebweyo mu mikono gyʼabantu

²³abalimutta, kyokka ku lunaku olwokusatu alizuukizibwa.” Abayigirizwa be ne banakuwala nnyo.

²⁴Bwe baatuuka e Kaperunawumu abasolooza bʼomusolo gwa Yeekaalu babiri ne bajja eri Peetero ne bamubuuza nti, “Mukama wammwe tawa musolo?”

²⁵Peetero nʼabaddamu nti, “Awa!” Peetero nʼayingira mu nnyumba. Naye Yesu nʼamwesooka nʼamubuuza nti, “Olowooza otya Simooni, bakabaka bʼensi basolooza omusolo ku bantu baabwe abatuuze oba ku bannamawanga be baba bawangudde?”

²⁶Peetero nʼaddamu nti, “Basolooza ku bannamawanga.” Yesu nʼamugamba nti, “Kale bannansi bo ba ddembe.”

²⁷“Naye obutabanyiiza, genda ku nnyanja osuulemu eddobo, ekyennyanja kyʼonoosooka okukwasa okyasamye akamwa. Mu kamwa kaakyo onoolabamu esutateri,[11] ozitwale oziweeyo osasule omusolo gwange nʼogugwo.”