Matayo 19:1-30 LGCB2014 - Bible AI

¹Awo Yesu bwe yamala okwogera ebigambo ebyo nʼava e Ggaliraaya nʼajja mu bitundu bya Buyudaaya okuyita emitala wʼomugga Yoludaani.

²Ekibiina kinene ne bamugoberera era nʼawonya abalwadde baabwe.

³Abafalisaayo ne bajja gyʼali bamugezese nga bagamba nti “Kikkirizibwa omusajja okugoba mukazi we olwʼensonga nʼemu?”

⁴ⓩ Yesu nʼabaddamu nti, “Temusomanga nti, ‘Okuva ku lubereberye Katonda yatonda omusajja nʼomukazi,’

⁵ⓐ era nti, ‘Omusajja anaalekanga kitaawe ne nnyina, ne yeegatta ne mukazi we. Nabo banaabanga omuntu omu,

⁶nga tebakyali babiri naye omuntu omu.’ Noolwekyo Katonda be yamala okugatta awamu omuntu taabaawukanyenga.”

⁷Ne bamubuuza nti, “Kale lwaki Musa yalagira nti Omusajja bwʼabanga agoba mukazi we amuwenga ebbaluwa eyʼokumugoba?”

⁸Yesu nʼabaddamu nti, “Olwʼobukakanyavu bwʼemitima gyammwe Musa kyeyava abakkiriza okugoba bakazi bammwe, naye nga okuva olubereberye tekyali bwe kityo.

⁹Era mbagamba nti Omuntu yenna anaagobanga mukazi we okuggyako olwʼobwenzi, nʼamala awasa omulala, anaabanga ayenze, nʼoyo anaawasanga oyo agobeddwa anaabanga ayenze.”

¹⁰Abayigirizwa ne bamugamba nti, “Obanga bwe biri bwe bityo, ekisingako obulungi bwe butawasiza ddala!”

¹¹Yesu nʼabaddamu nti, “Abantu bonna tebayinza kutegeera kigambo kino okuggyako abo Katonda bʼakiwa.

¹²Kubanga abamu bazaalibwa nga tebasobola kuwasa abalala balaayibwa bantu bannaabwe ate abalala bagaana okuwasa ne beewaayo okukola omulimu ogwʼobwakabaka obwʼomu ggulu. Buli asobola okutegeera kino akitegeere.”

¹³Yesu ne bamuleetera abaana abato abasseeko emikono gye abawe nʼomukisa. Naye abayigirizwa ne bajunga abaabaleeta.

¹⁴Naye Yesu nʼagamba abayigirizwa be nti, “Mukkirize abaana abato bajje gye ndi so temubaziyiza, kubanga abafaanana ngʼabo be bannannyini bwakabaka obwʼomu ggulu.”

¹⁵Nʼabassaako emikono nʼabawa omukisa nʼalyoka avaayo.

¹⁶Awo omuntu omu nʼamusemberera nʼamubuuza nti, “Omuyigiriza, nkole ki ekirungi okufuna obulamu obutaggwaawo?”

¹⁷Yesu nʼamuddamu nti, “Lwaki ombuuza ebikwata ku birungi? Omulungi ali omu, naye bwʼobanga oyagala okuyingira mu bulamu, ggondera amateeka.”

¹⁸Nʼamuddamu nti, “Ge galuwa?” Yesu nʼamugamba nti, “ ‘Tottanga, toyendanga, tobbanga, towaayirizanga,

¹⁹ⓑ ossangamu ekitiibwa kitaawo ne nnyoko era yagalanga muliraanwa wo nga bwe weeyagala wekka.’[15]”

²⁰Omuvubuka oyo nʼamuddamu nti, “Ebyo byonna nabikwata dda, ate kiki ekimpeebuuseeko?”

²¹Yesu nʼamugamba nti, “Obanga oyagala okuba omutuukirivu genda otunde ebibyo, ensimbi ozigabire abaavu, kale oliba nʼobugagga mu ggulu, olyoke ojje ongoberere.”

²²Naye omuvubuka bwe yawulira ebyo nʼagenda ngʼanakuwadde kubanga yali mugagga.

²³Awo Yesu nʼagamba abayigirizwa be nti, “Ddala ddala mbagamba nti, kizibu omugagga okuyingira mu bwakabaka obwʼomu ggulu.

²⁴Era mbategeeza nti Kyangu eŋŋamira okuyita mu nnyindo yʼempiso, okusinga omugagga okuyingira mu bwakabaka bwa Katonda!”

²⁵Ebigambo ebyo abayigirizwa be ne bibeewuunyisa nnyo, nʼokugamba ne bagamba nti, “Kale ani ayinza okulokoka?”

²⁶Yesu nʼabatunuulira, nʼabaddamu nti, “Mu buntu tekiyinzika. Naye Katonda, ayinza byonna.”

²⁷Awo Peetero nʼabuuza Yesu nti, “Ffe twaleka byonna ne tukugoberera. Kale ffe tulifuna ki?”

²⁸Yesu nʼamuddamu nti, “Ddala ddala mbagamba nti, Omwana wʼOmuntu bwʼalituula ku ntebe ye eyʼekitiibwa mu nsi empya, nammwe abangoberera mulituula ku ntebe ekkumi nʼebbiri nga mulamula ebika bya Isirayiri ekkumi nʼebibiri.

²⁹Na buli muntu yenna eyaleka ennyumba, oba baganda be, oba bannyina, oba kitaawe oba nnyina, oba baana be, oba ttaka lye olwʼerinnya lyange aliweebwa okwenkana emirundi kikumi, era alisikira obulamu obutaggwaawo.

³⁰Bangi aboolubereberye, abaliba abooluvannyuma, nʼabʼoluvannyuma ne baba aboolubereberye.”