Matayo 2:1-23 LGCB2014 - Bible AI

¹Yesu bwe yazaalibwa mu kibuga Besirekemu ekyʼomu Buyudaaya, ku mulembe gwa Kabaka Kerode, abasajja abagezigezi, abaava ebuvanjuba ne bajja mu Yerusaalemi, nga babuuza nti,

²“Aliwa eyazaalibwa nga Kabaka wʼAbayudaaya? Kubanga twalaba emmunyeenye ye nga tuli mu buvanjuba, era tuzze okumusinza.”

³Awo Kabaka Kerode bwe yabiwulira ne bimweraliikiriza nnyo, era ne bonna abaali mu Yerusaalemi.

⁴Nʼayita bakabona abakulu bonna nʼabawandiisi bʼamateeka nʼabeebuuzaako ekifo Kristo gye yali agenda okuzaalibwa.

⁵Ne bamuddamu nti, “Mu Besirekemu ekyʼomu Buyudaaya, kyawandiikibwa nnabbi nti,

⁶ⓑ ‘Naawe Besirekemu ekya Yuda, toli mutono mu balangira ba Yuda, kubanga omufuzi aliva mu ggwe, alifuga abantu bange Isirayiri.’ ”

⁷Awo Kerode nʼatumya Abagezigezi kyama, nʼababuuza ebiro emmunyeenye bye yalabikiramu.

⁸Nʼabasindika e Besirekemu ngʼagamba nti, “Mugende mubuulirize ebikwata ku mwana. Bwe mumulaba, mukomeewo muntegeeze, nange ŋŋende musinze!”

⁹Bwe baamala okuwulira Kabaka bye yabagamba ne bagenda. Bwe baafuluma, emmunyeenye eri gye baalaba ebuvanjuba nʼeddamu okubalabikira nʼokubakulembera, okutuusa lwe yayimirira waggulu Omwana wʼali.

¹⁰Bwe baalaba emmunyeenye ngʼeyimiridde, essanyu lyabwe ne libeera lingi nnyo!

¹¹Bwe baayingira mu nnyumba[1] ne balaba Omwana ne Maliyamu nnyina ne bavuunama ne basinza Omwana. Ne basumulula ensawo zaabwe, ne bamutonera ebirabo, zaabu, nʼobubaane nʼomugavu.

¹²Awo bwe baalabulibwa mu kirooto baleme kuddayo wa Kerode, bwe batyo ne baddayo ewaabwe nga bayita mu kkubo eddala.

¹³Awo abagezigezi bwe baamala okugenda, malayika wa Mukama nʼalabikira Yusufu mu kirooto nʼamugamba nti, “Golokoka oddusize Omwana ne nnyina e Misiri, mubeere eyo okutuusa lwe ndibalagira okudda. Kubanga Kerode ajja kunoonya Omwana ngʼayagala okumutta.”

¹⁴Ekiro ekyo nʼasituka nʼatwala Omwana ne nnyina e Misiri.

¹⁵ⓒ Ne babeera eyo okutuusa Kerode bwe yafa. Mukama kye yayogerera mu nnabbi we ne kituukirira, bwe yagamba nti:

¹⁵“Nayita Omwana wange okuva mu Misiri.”

¹⁶Kerode bwe yalaba ngʼAbagezigezi banyoomye ekiragiro kye, nʼasunguwala nnyo, nʼatuma abaserikale e Besirekemu ne mu byalo byakyo batte abaana bonna aboobulenzi abʼemyaka ebiri nʼabatannagiweza, ngʼasinziira ku bbanga abagezigezi lye baali bamutegeezeza mwe baalabira emmunyeenye.

¹⁷Awo ekigambo nnabbi Yeremiya kye yayogera ne kiryoka kituukirira ngʼagamba nti,

¹⁸ⓓ “Eddoboozi lyawulirwa mu Laama, okukuba emiranga nʼokukungubaga okunene, nga Laakeeri akaabira abaana be, nga tewakyali asobola kumuwooyawooya, kubanga bonna baweddewo.”

¹⁹Kerode bwe yamala okufa malayika wa Mukama nʼalabikira Yusufu mu kirooto e Misiri,

²⁰nʼamugamba nti, “Golokoka ozzeeyo Omwana ne nnyina mu Isirayiri, kubanga abaali baagala okutta Omwana bafudde.”

²¹Yusufu nʼasitukiramu nʼazzaayo Omwana ne nnyina mu nsi ya Isirayiri.

²²Naye bwe yatuuka mu kkubo nʼatya nnyo bwe yawulira nga Alukerawo[2] mutabani wa Kerode ye yali alidde obwakabaka. Mukama nʼamulabulira nate mu kirooto aleme kugenda Buyudaaya, bwʼatyo nʼalaga e Ggaliraaya

²³nʼatuuka mu kibuga kyʼe Nazaaleesi, ne babeera omwo. Ebigambo bya bannabbi bye baayogera biryoke bituukirire nga bagamba nti: “Aliyitibwa Munnazaaleesi.”