Matayo 20:1-34 LGCB2014 - Bible AI

¹Awo Yesu nʼabagamba nti, “Obwakabaka obwʼomu ggulu bufaanana ngʼomuntu ssemaka, eyakeera mu makya nʼapangisa abakozi okukola mu nnimiro ye eyʼemizabbibu.

²Nʼalagaana nʼabapakasi okubasasula omuwendo eddinaali emu emu, ze zaali ensimbi ezʼolunaku olumu. Nʼabasindika mu nnimiro ye eyʼemizabbibu.

³“Bwe waayitawo essaawa nga bbiri nʼasanga abalala nga bayimiridde mu katale nga tebalina kye bakola,

⁴nabo nʼabagamba nti, ‘Nammwe mugende mu nnimiro yʼemizabbibu, era nnaabasasula empeera ebasaanira.’

⁵Ne bagenda. Ku ssaawa omukaaga ne ku mwenda nʼasindikayo abalala mu ngeri yʼemu.

⁶“Essaawa nga ziweze nga kkumi nʼemu nʼasanga abalala nga bayimiridde awo, nʼababuuza nti, ‘Lwaki muyimiridde awo olunaku lwonna nga temulina kye mukola?’

⁷“Ne bamuddamu nti, ‘Kubanga tetufunye atuwa mulimu.’ Nʼabagamba nti, ‘Nammwe mugende mukole mu nnimiro yange eyʼemizabbibu.’

⁸“Awo obudde nga buwungeera nannyini nnimiro nʼalagira nampala ayite abakozi abawe empeera yaabwe ngʼasookera ku bʼoluvannyuma.

⁹“Abaatandika ku ssaawa ekkumi nʼemu ne baweebwa eddinaali emu emu.

¹⁰Bali abaasookayo bwe bajja ne basuubira nti Bo ze banaasasulwa zijja kusingako obungi. Naye nabo yabasasula omuwendo gwe gumu ogwʼolunaku olumu nga bali.

¹¹Bwe baagifuna ne beemulugunyiza nannyini nnimiro

¹²nga bagamba nti, ‘Bano abooluvannyuma baakoledde essaawa emu yokka naye lwaki obawadde empeera eyenkana eyaffe, ffe abaakoze okuva mu makya ne mu musana gwʼomu tuntu?’

¹³“Mukama waabwe kwe kuddamu omu ku bo nti, ‘Munnange si kubbye; bwe wabadde otandika okukola tetwalagaanye eddinaali emu?

¹⁴Twala eddinaali yo ogende. Naye njagala nʼono asembyeyo okumuwa empeera yʼemu nga gye nkuwadde.

¹⁵Siyinza kukozesa byange nga bwe njagala? Obuggya bukukutte kubanga ndi wa kisa?’

¹⁶“Kale nno bwe kityo bwe kiriba abooluvannyuma ne baba aboolubereberye, nʼaboolubereberye ne baba abooluvannyuma.”

¹⁷Awo Yesu bwe yali ayambuka e Yerusaalemi nʼatwala abayigirizwa be ekkumi nʼababiri, mu kyama. Bwe baali mu kkubo, nʼabagamba nti,

¹⁸“Laba twambuka e Yerusaalemi, Omwana wʼOmuntu aliweebwayo eri bakabona abakulu nʼabannyonnyozi bʼamateeka, bamusalire omusango ogwʼokufa.

¹⁹Era balimuwaayo mu baamawanga ne bamuduulira ne bamukuba, era balimukomerera ku musaalaba. Naye ku lunaku olwokusatu alizuukizibwa.”

²⁰Awo nnyina wʼabaana ba Zebbedaayo, nʼajja eri Yesu ne batabani be bombi, nʼamusinza ngʼayagala okubaako kyʼamusaba.

²¹Yesu nʼamubuuza nti, “Kiki kyʼoyagala?” Nʼaddamu nti, “Nsaba, mu bwakabaka bwo, abaana bange bano bombi batuule naawe omu ku mukono gwo ogwa ddyo nʼomulala ku gwa kkono.”

²²Naye Yesu nʼamuddamu nti, “Tomanyi kyʼosaba. Muyinza okunywa ku kikompe nze kye ŋŋenda okunywako?” Ne baddamu nti, “Tuyinza.”

²³Nʼabagamba nti, “Weewaawo ekikompe mugenda kukinywako. Naye ekyʼokutuula ku mukono gwange ogwa ddyo oba ogwa kkono nze sikirinaako buyinza. Ebifo ebyo byategekebwa dda Kitange.”

²⁴Abatume bali ekkumi bwe baawulira ebyo abooluganda ababiri bye baasaba ne babanyiigira nnyo.

²⁵Yesu kwe kubayita nʼabagamba nti, “Mumanyi ngʼabakulembeze bʼabamawanga babazitoowereza embeera nʼabakulu baabwe babafuza lyanyi.

²⁶Naye tekisaanye kuba bwe kityo mu mmwe. Buli ayagala okubeera omukulu mu mmwe, abeerenga muweereza wa banne.

²⁷Na buli ayagala okuba owʼolubereberye mu mmwe aweerezenga banne ngʼomuddu waabwe.

²⁸Mube nga Omwana wʼOmuntu atajja kuweerezebwa wabula okuweereza, nʼokuwaayo obulamu bwe okununula abangi.”

²⁹Awo Yesu nʼabayigirizwa be bwe baali bava mu kibuga Yeriko, ekibiina kinene ne kimugoberera.

³⁰Abazibe bʼamaaso babiri abaali batudde ku mabbali gʼekkubo bwe baawulira nga Yesu ayita mu kkubo eryo, ne baleekaanira waggulu nnyo nga bakoowoola nti, “Ssebo, Omwana wa Dawudi, tusaasire!”

³¹Ekibiina ne kibalagira okusirika, naye bo, ne beeyongera bweyongezi okukoowoolera waggulu nga boogera nti, “Ssebo, Omwana wa Dawudi, tusasire.”

³²Yesu bwe yabatuukako nʼayimirira nʼababuuza nti, “Mwagala mbakolere ki?”

³³Ne bamuddamu nti, “Mukama waffe, twagala otuzibule amaaso.”

³⁴Yesu nʼabasaasira nʼakwata ku maaso gaabwe amangwago ne gazibuka, ne bamugoberera.