Matayo 22:1-46 LGCB2014 - Bible AI

¹Yesu nʼaddamu nʼayogera nabo mu ngero ngʼagamba nti,

²“Obwakabaka obwʼomu ggulu bufaanana nga, kabaka eyategekera omwana we embaga eyʼobugole.

³Nʼatuma abaddu be okuyita abaayitibwa ku mbaga ne batayagala kujja.

⁴“Kabaka nʼabatumira abaddu abalala babategeeze nti, ‘Mutegeeze abayite nti nteeseteese, ekijjulo, zisseddume zange nʼente ensavuwazze zittiddwa, era buli kimu kitegekeddwa. Mujje ku mbaga.’

⁵“Naye ne batassaayo mwoyo, omu nʼalaga mu nnimiro ye, omulala nʼalaga mu bya busuubuzi bye.

⁶Abalala ne babakwata ne bababonyaabonya ne babatta.

⁷Awo Kabaka nʼasunguwala, nʼayungula ekibinja kyʼabaserikale nʼazikiriza abatemu abo, nʼayokya ekibuga kyabwe.

⁸“Awo kabaka nʼagamba abaddu be nti, ‘Ekijjulo kyʼembaga kiteekeddwateekeddwa, naye abaayitibwa ne batasaanira.

⁹Noolwekyo mugende mu nguudo zʼomu kibuga muyite abantu bonna be munaasangayo bajje ku mbaga.’

¹⁰Abaddu bwe baagenda mu nguudo, ne bakuŋŋaanya buli gwe baasanga, ababi nʼabalungi, ekisenge kyʼembaga ne kijjula abagenyi.

¹¹“Kabaka bwe yayingira okulaba abaali batudde ku mmeeza, nʼalaba omusajja eyali tayambadde kyambalo kya mbaga.

¹²Kabaka nʼamubuuza nti, ‘Munnange, oyingidde otya wano nga toyambadde kyambalo kya mbaga?’ Omusajja nga talina kyʼaddamu.

¹³“Awo kabaka nʼalagira basajja be nti, ‘Mumusibe emikono nʼamagulu mumukasuke ebweru mu kizikiza ekikutte be zigizigi, eri okukaaba nʼokuluma obujiji.’

¹⁴“Abayitibwa bangi, naye abalondemu batono.”

¹⁵Awo Abafalisaayo ne bagenda ne bateesa engeri gye banaategamu Yesu bamukwase mu bigambo.

¹⁶Ne bamutumira abayigirizwa baabwe awamu nʼAbakerodiyaani nga bagamba nti, “Omuyigiriza, tumanyi ngʼoli mulungi, era oyigiriza mazima awatali kutya muntu yenna, kubanga tososola mu bantu.

¹⁷Kale tutegeeze, olowooza ekituufu kye kiriwa? Kituufu okuwa Kayisaali omusolo oba nedda?”[17]

¹⁸Naye Yesu bwe yamanya obutali butuukirivu bwabwe, nʼabagamba nti, “Bannanfuusi mmwe, Lwaki mungezesa?

¹⁹Kale, mundeetere wano ku nsimbi ze muweesa omusolo ndabe.” Ne bamuleetera eddinaali.

²⁰Nʼababuuza nti, “Kino ekifaananyi nʼobuwandiike ebiriko byʼani?”

²¹Ne bamuddamu nti, “Bya Kayisaali.” Nʼabagamba nti, “Kale ebya Kayisaali mubiwenga Kayisaali, nʼebya Katonda mubiwenga Katonda.”

²²Bwe baawulira ebigambo ebyo ne beewuunya ne bamuleka ne bagenda.

²³Ku lunaku olwo lwe lumu, Abasaddukaayo, abagamba nti, “Tewali kuzuukira,” ne bajja eri Yesu, ne bamubuuza nti,

²⁴“Omuyigiriza Musa yagamba nti ‘Singa omusajja afa nga tazadde mwana, muganda wʼomufu awase nnamwandu oyo azaalire muganda we abaana.’

²⁵Twalina abooluganda musanvu. Owooluganda owʼolubereberye nʼawasa, kyokka nʼafa nga tazadde mwana, bwʼatyo mukazi we nʼafumbirwa muganda we.

²⁶Ekintu kye kimu ne kituuka ku wookubiri ne ku wookusatu, okutuusa ku wʼomusanvu.

²⁷Oluvannyuma nʼomukazi oyo naye nʼafa.

²⁸Kale okuzuukira nga kutuuse omukazi oyo aliba muka ani ku abo omusanvu? Kubanga bonna abooluganda omusanvu yabafumbirwako.”

²⁹Naye Yesu nʼabagamba nti, “Olwʼobutamanya byawandiikibwa nʼobutategeera maanyi ga Katonda kyemuvudde mukyama.

³⁰Kubanga mu kuzuukira teriiyo kuwasa wadde okufumbirwa, naye abantu bonna baba nga bamalayika mu ggulu.

³¹Naye ebikwata ku kuzuukira kwʼabafu, temusomanga ku kigambo ekyayogerwa Katonda ngʼagamba nti,

³²ⓗ ‘Nze, ndi Katonda wa Ibulayimu era ndi Katonda wa Isaaka era ndi Katonda wa Yakobo?’ Noolwekyo Katonda si Katonda wa bafu wabula Katonda wa balamu.”

³³Ebibiina ne biwuniikirira bwe baawulira okuyigiriza kwe.

³⁴Abafalisaayo bwe baawulira nga Yesu Abasaddukaayo abamazeeko ebyʼokwogera, ne bakuŋŋaana.

³⁵Omu ku bo eyali munnamateeka nʼamubuuza ekibuuzo ngʼamugezesa nti,

³⁶“Omuyigiriza, tteeka ki erisinga obukulu mu mateeka.”

³⁷ⓘ Yesu nʼaddamu nti, “ ‘Yagalanga Mukama Katonda wo nʼomutima gwo gwonna, nʼobulamu bwo bwonna, nʼamagezi go gonna.’

³⁸Eryo lyʼetteeka eryʼolubereberye era lye Iisingira ddala obukulu.

³⁹ⓙ Nʼeryokubiri eririfaananako lye lino nti, ‘Yagalanga muliraanwa wo nga gwe bwe weeyagala wekka.’

⁴⁰Amateeka amalala gonna gasinziira mu mateeka ago gombi ne bya bannabbi.”

⁴¹Awo mu kiseera ekyo Abafalisaayo nga bakuŋŋaanye, Yesu nʼababuuza nti,

⁴²“Kristo mumulowoozako mutya? Mwana waani?” Ne baddamu nti, “Mwana wa Dawudi.”

⁴³Yesu kyeyava ababuuza nti, “Dawudi ngʼajjudde Omwoyo bwʼayogera ku Kristo, lwaki ate amuyita ‘Mukama we,’ ngʼagamba nti,

⁴⁴ⓚ Mukama yagamba Mukama wange nti Tuulira wano ku mukono gwange ogwa ddyo, okutuusa lwe ndifufuggaza abalabe bo ne mbassa wansi wʼebigere byo?”

⁴⁵“Noolwekyo obanga Dawudi amuyita ‘Mukama we,’ kale, ate abeera atya omwana we?”

⁴⁶Ne wataba nʼomu amuddamu, era okuva olwo ne watabaawo ayaŋŋanga kwongera kumubuuza bibuuzo birala.