Matayo 24:1-51 LGCB2014 - Bible AI

¹Awo Yesu bwe yali ngʼava mu luggya lwa Yeekaalu, abayigirizwa be ne bajja wʼali okumulaga enzimba ya Yeekaalu,

²naye nʼabagamba nti, “Bino byonna temubiraba? Ddala ddala mbagamba nti tewaliba jjinja na limu eririsigala nga litudde ku linnaalyo eritalibetentebwa.”

³Awo Yesu bwe yali ngʼatudde ku lusozi olwa Zeyituuni, abayigirizwa be ne bajja gyʼali ne bamubuuza mu kyama nti, “Ebyo biribaawo ddi? Era kabonero ki akalitegeeza okujja kwo nʼenkomerero yʼensi nti eri kumpi?”

⁴Yesu nʼabaddamu nti, “Temukkirizanga muntu yenna kubalimbalimba.

⁵Kubanga bangi balijja mu linnya lyange nga bagamba nti, ‘Nze Kristo’, era balirimba bangi.

⁶Munaatera okuwulira entalo nʼeŋŋambo zʼentalo. Temwekanganga, kubanga ebyo biteekwa okubaawo, naye enkomerero eriba tennatuuka.

⁷Amawanga galirwana ne gannaago, nʼobwakabaka bulirwana nʼobwakabaka, era walibaawo enjala mu bifo bingi ne musisi aliyuuguumya ebifo bingi.

⁸Naye bino byonna biriba ntandikwa butandikwa ngʼeyʼokulumwa okuzaala.”

⁹“Muliweebwayo ne mubonyaabonyezebwa era ne muttibwa, era mulikyayibwa amawanga gonna olwʼerinnya lyange.

¹⁰Era bangi balisendebwasendebwa okukola ebibi, nʼabalala baliryamu bannaabwe olukwe, nʼabalala ne bakyawagana.

¹¹Era bannabbi abʼobulimba bangi balijja ne bawubisa abantu bangi.

¹²Olwʼobujeemu okuyinga obungi, era bangi okwagala kwabwe kuliwola.

¹³Naye abo abaligumiikiriza okutuuka ku nkomerero be balirokolebwa.

¹⁴Era Enjiri eyʼobwakabaka eribuulirwa mu nsi yonna, nga bwe bujulirwa eri amawanga gonna nʼoluvannyuma enkomerero nʼeryoka etuuka.”

¹⁵ⓜ “Noolwekyo bwe muliraba ‘ekyʼomuzizo ekyʼentiisa,’ nnabbi Danyeri kye yayogerako, nga kiyimiridde mu kifo ekitukuvu asoma bino ategeere,

¹⁶nʼabo abalibeera mu Buyudaaya baddukiranga mu nsozi.

¹⁷Alibeera waggulu ku kasolya, takkanga kuyingira mu nnyumba ye kubaako byaggyamu.

¹⁸Nʼoyo alibeera mu nnimiro taddanga mu maka kunona lugoye lwe.

¹⁹Naye ziribasanga abakyala abaliba balina embuto, nʼabaliba bayonsa mu nnaku ezo.

²⁰Naye musabe ekiseera kyʼokudduka kireme kutuukira mu biro bya butiti oba ku lunaku lwa Ssabbiiti.

²¹Kubanga wagenda kubeerawo okubonyaabonyezebwa okunene ennyo okutabangawo kasookedde ensi ebaawo era tewaliddayo kubaawo kikifaanana.

²²Singa ennaku ezo tezakendezebwako, tewandibadde nʼomu alokolebwa. Naye olwʼabalonde be ennaku ezo zirikendezebwako.

²³Bwe wabangawo omuntu agamba nti, ‘Kristo ali wano, oba ali wali,’ temubakkirizanga.

²⁴Kubanga bakristo abʼobulimba balijja ne bannabbi abʼobulimba nabo balijja ne bakola ebyamagero ebyʼekitalo; nga singa kibadde kisoboka, bandilimbyelimbye nʼabalonde ba Katonda.

²⁵Laba mbalabudde nga bukyali!”

²⁶“Noolwekyo omuntu bwʼabagambanga nti Kristo akomyewo ali eri mu ddungu, temugendangayo. Oba nti ali mu bisenge ebyʼomunda, temukkirizanga.

²⁷Kubanga nga bwe mulaba okumyansa kwʼeraddu nga kutabaala ebire okuva ebuvanjuba ne kusala okulaga ebugwanjuba, nʼokujja kwʼOmwana wʼOmuntu bwe kutyo.

²⁸Era mukimanyi nti Awabeera ekifudde awo ensega we zikuŋŋaanira.”

²⁹ⓝ “Amangu ddala ngʼokubonyaabonyezebwa kwʼomu nnaku ezo kuwedde, ‘enjuba eriggyako ekizikiza era nʼomwezi teguliyaka, nʼemmunyeenye zirigwa nʼamaanyi gʼeggulu galinyeenyezebwa.’ ”

³⁰“Oluvannyuma lwʼebyo akabonero kʼOmwana wʼomuntu kalirabika ku ggulu, era walibaawo okukungubaga kwʼamawanga gonna agʼomu nsi, era baliraba Omwana wʼOmuntu ngʼajja ku bire byʼeggulu, mu maanyi ne mu kitiibwa ekinene.

³¹Era alituma bamalayika be nga bwe bafuuwa amakondeere mu ddoboozi eryʼomwanguka, ne bakuŋŋaanya abalonde be nga babaggya mu mpewo ennya okuva ku ludda olumu olwʼeggulu okutuuka ku ludda olulala.”

³²“Kale muyigire ku lugero lwʼomutiini. Amatabi gaagwo bwe gatandika okutojjera nga mumanya nti Ebiseera ebyʼebbugumu bisembedde.

³³Bwe kityo nammwe, bwe muliraba ebintu ebyo byonna, nga mumanya nti ekiseera kiri kumpi, era kisemberedde ddala ku luggi.

³⁴Ddala ddala mbagamba nti, omulembe guno teguliggwaawo okutuusa ngʼebintu ebyo byonna bituukiridde.

³⁵Eggulu nʼensi biriggwaawo naye ebigambo byange tebiriggwaawo.”

³⁶“Tewali nʼomu amanyi lunaku wadde essaawa enkomerero wʼerituukira. Ne bamalayika abʼomu ggulu nabo tebakimanyi, newaakubadde Omwana naye takimanyi wabula Kitaffe yekka.

³⁷Kubanga nga bwe kyali mu nnaku za Nuuwa, okujja kwʼOmwana wʼOmuntu nakwo bwe kuliba.

³⁸Nga bwe kyali mu biseera byʼamataba, abantu nga balya nga banywa, nga bawasa nʼabalala nga bafumbirwa, olunaku ne lutuuka Nuuwa nʼayingira mu lyato,

³⁹abantu ne batamanya, amataba ne gajja ne gabasaanyaawo ne buli kintu, bwe kutyo nʼokudda kwʼOmwana wʼOmuntu bwe kulibeera.

⁴⁰Mu biseera ebyo abasajja babiri baliba bakola mu nnimiro, omu nʼatwalibwa omulala nʼalekebwa.

⁴¹Abakazi babiri baliba basa ku mmengo zaabwe mu nnyumba yʼemu, omu nʼatwalibwa omulala nʼalekebwa.”

⁴²“Noolwekyo mubeere beetegefu, kubanga olunaku Mukama wammwe lwʼaliddirako temulumanyi.

⁴³Nga ssemaka bwʼakuuma amaka ge nga yeekuuma omubbi, nʼasigala ngʼatunula, nʼataganya mubbi kumuyingirira,

⁴⁴nammwe bwe mutyo mweteeketeeke, kubanga Omwana wʼomuntu alijjira mu ssaawa gye mutamulowoolezaamu.”

⁴⁵“Kale aliwa omuddu omugezi era omwesigwa mukama we gwe yawa obuvunaanyizibwa okulabirira abaddu abʼomu maka ge, nʼokubawa emmere mu kiseera ekituufu?

⁴⁶Alina omukisa omuddu oyo, mukama we gwʼalisanga ngʼakola bwʼatyo.

⁴⁷Ddala ddala mbagamba nti, alimukwasa ebibye byonna.

⁴⁸Naye obanga omuddu omubi bwʼagamba mu mutima gwe nti, ‘Mukama wange tajja kudda mangu,’

⁴⁹nʼadda ku baddu banne nʼabakuba, nʼalya, nʼanywa nʼabatamiivu, okutuusa lwʼalidda.

⁵⁰Mukama wʼomuddu oyo nʼakomawo ku lunaku lwʼatamusuubidde ne mu kiseera kyʼatamanyi,

⁵¹alimutemamu ebitundu bibiri, ebitundu bye nʼabiteeka awamu nʼabannanfuusi, eriba okukaaba nʼokuluma obujiji.”