Matayo 27:1-66 LGCB2014 - Bible AI

¹Awo obudde bwe bwakya, bakabona abakulu bonna nʼabakulembeze bʼAbayudaaya ne beeyongera okukuŋŋaana ne bateeseza wamu balabe ekkubo lye banaayitamu okutta Yesu.

²Ne bamusiba, ne bamuweereza ewa Piraato eyali gavana Omuruumi.

³Awo Yuda, eyali amuliddemu olukwe, bwe yalaba nga Yesu bamusalidde omusango gwa kufa, nʼazzaayo ebitundu amakumi asatu ebya ffeeza eri bakabona abakulu nʼabakulembeze bʼAbayudaaya,

⁴ngʼagamba nti, “Nnyonoonye, kubanga ndiddemu olukwe omusaayi ogutalina musango.” Naye ne bamuddamu nti, “kyo kitukwatako kitya? Ezo nsoga zo.”

⁵Kyeyava addira ensimbi eza ffeeza nʼaziyiwa mu Yeekaalu nʼafuluma nʼagenda yeetuga!

⁶Bakabona abakulu ne balondalondawo ensimbi eza ffeeza, ne bagamba nti, “Kya muzizo okuzissa mu ggwanika lya yeekaalu kubanga muwendo gwa musaayi.”

⁷Bwe baamala okukikubaganyaako ebirowoozo, ne basalawo okuzigulamu ennimiro ababumbi mwe baggyanga ebbumba. Ne bateesa ennimiro eyo okugifuula ekifo ekyʼokuziikangamu abagwira.

⁸Kyebaava batuuma ennimiro eyo, “Ennimiro yʼOmusaayi” nʼokutuusa leero.

⁹Kino ne kituukiriza nnabbi Yeremiya bye yayogera nti, “Baddira ebitundu bya ffeeza amakumi asatu, nga gwe muwendo abaana ba Isirayiri gwe baamulamula,

¹⁰ⓟ ne bagulamu ennimiro eyali eyʼababumbi, nga Mukama bwe yalagira.”

¹¹Awo Yesu bwe yayimirira mu maaso ga gavana, Omuruumi, gavana nʼamubuuza nti, “Ggwe Kabaka wʼAbayudaaya?” Yesu nʼamuddamu nti, “Okyogedde.”

¹²Naye bakabona abakulu nʼabakulembeze bʼAbayudaaya bwe baaleeta ensonga zaabwe ze baasinziirako okumuwawaabira, Yesu teyabaanukula.

¹³Piraato kwe kumubuuza nti, “Ebyo byonna bye bakwogerako tobiwulira?”

¹⁴Naye Yesu nʼataddamu kigambo na kimu, era gavana ne kimwewuunyisa nnyo.

¹⁵Gavana yalina empisa eyʼokusumulula omusibe omu mu kiseera ekyʼEmbaga yʼOkuyitako, ngʼomusibe oyo abantu be baamweronderanga.

¹⁶Mu kkomera mwalimu kkondo lukulwe ngʼerinnya lye ye Balaba.

¹⁷Awo Piraato nʼabuuza ekibiina ekyali kikuŋŋaanye nti, “Mwagala mbasumululire ani, Balaba oba Yesu, ayitibwa Kristo?”

¹⁸Kubanga yamanya ngʼabakulembeze bʼAbayudaaya bamuwaddeyo lwa buggya.

¹⁹Piraato yali akyali wakati mu musango ogwo, mukazi we nʼamutumira nʼobubaka buno nti, “Toba na nsonga na musajja oyo omutuukirivu kubanga natawaanyizibbwa nʼekirooto ekyʼomuntu oyo.”

²⁰Naye bakabona abakulu nʼabakulembeze bʼAbayudaaya ne basendasenda ebibiina basabeyo Balaba yʼaba ateebwa, naye Yesu attibwe.

²¹Gavana bwe yaddamu okubabuuza nti, “Ku bano bombi mbateereko aluwa?” Ekibiina kyonna ne kiddamu nti, “Balaba!”

²²Piraato nʼababuuza nti, “Kale Yesu, ayitibwa Kristo, mukole ntya?” buli omu nʼaddamu nti, “Akomererwe!”

²³Piraato nʼababuuza nti, “Lwaki, kiki kyʼasobezza?” Naye bo ne beeyongera kuleekaanira waggulu nti, “Akomererwe!”

²⁴Awo Piraato bwe yalaba ngʼensoga talina gyʼaziraza, ate ngʼebibiina byagala kusasamala, nʼatumya amazzi, nʼanaaba engalo ze mu maaso gʼekibiina nga bwʼagamba nti, “Nze siriiko musango gwonna olwʼomusaayi gwʼomuntu ono omulungi. Obuvunaanyizibwa bwonna buli ku mmwe!”

²⁵Abantu bonna ne baanukula nti, “Omusaayi gwe gubeere ku ffe ne ku baana baffe!”

²⁶Awo Piraato nʼasumulula Balaba nʼabamuwa. Naye bwe yamala okukuba Yesu embooko nʼamuwaayo bamukomerere.

²⁷Naye abaserikale baasooka kumutwala mu luggya lwʼolubiri lwa Piraato ne bakuŋŋaanira eyo, ne bayita bannaabwe bonna.

²⁸Awo ne bamwambulamu engoye ze, ne bamwambaza ekyambalo ekimyufu,

²⁹ne bakola engule mu maggwa ne bagimutikkira, ne bamukwasa olumuli mu mukono gwe ogwa ddyo. Ne bamufukaamirira nga bamuduulira nti, “Mirembe, Kabaka wʼAbayudaaya!”

³⁰Ne bamuwandira amalusu, ne bamusikako olumuli ne balumukubya ku mutwe.

³¹Ebyʼokumuduulira bwe byaggwa, ne bamwambulamu ekyambalo ekimyufu, ne bamwambaza ekyambalo kye ekya bulijjo, ne balyoka bamufulumya okumutwala okumukomerera.

³²Bwe baali nga bagenda gye banaamukomerera, ne basisinkana omusajja omukuleene, erinnya lye nga ye Simooni, ne bamulagira lwa maanyi yeetikke omusaalaba gwa Yesu.

³³Bwe baatuuka mu kifo ekiyitibwa Gologoosa, amakulu nti, “Akasozi kʼEkiwanga,”

³⁴ne bawa Yesu omwenge ogutabuddwamu omususa, naye bwe yakombako nʼagugaana.

³⁵ⓠ Bwe baamala okumukomerera, abaserikale ne bagabana ebyambalo bye nga babikubira akalulu.

³⁶Bwe batyo ne batuula awo nga bamukuuma.

³⁷Ne bawanika ekipande waggulu wʼomutwe gwe ku musaalaba okuwandiikiddwa nti, “ONO YE YESU, KABAKA WʼABAYUDAAYA.”

³⁸Waaliwo nʼabanyazi babiri abaakomererwa naye omu ku ddyo, nʼomulala ku kkono.

³⁹Awo abantu abaali bayitawo, ne bamuvuma nga bamunyeenyeza emitwe

⁴⁰nga bwe bagamba nti, “Wagamba okumenya Yeekaalu, ate ogizimbe mu nnaku ssatu! Weerokole okke wansi okuva ku musaalaba, obanga ggwe Mwana wa Katonda.”

⁴¹Bakabona abakulu nʼabawandiisi ne bamuduulira, nga bagamba nti,

⁴²“Yalokolanga balala, naye ye tasobola kwerokola! Kale nga bwʼali Kabaka wa Isirayiri, ave ku musaalaba akke wansi, naffe tunaamukkiriza!

⁴³Yeesiga Katonda, kale amuggye ku musaalaba obanga Katonda amwagala. Yagamba nti, ‘Ndi Mwana wa Katonda.’”

⁴⁴Nʼabanyazi ababiri abaakomererwa awamu naye nabo ne bamuvuma.

⁴⁵Okuviira ddala ku ssaawa mukaaga mu ttuntu okutuusiza ddala essaawa mwenda ezʼolweggulo ensi yonna yabikkibwa ekizikiza.

⁴⁶ⓡ Ku ssaawa nga mwenda Yesu nʼayogerera waggulu nʼeddoboozi eryʼomwanguka nti, “Eri, Eri lama sabakusaani,” ekitegeeza nti, “Katonda wange, Katonda wange, lwaki onjabulidde?”

⁴⁷Naye abamu ku baali bayimiridde awo bwe baakiwulira ne bagamba nti, “Ayita Eriya.”

⁴⁸Amangwago omu nʼadduka nʼaddira ekyangwe nʼakinnyika mu mwenge omukaatuufu nʼakiteeka ku muti, nʼakimuwa anuuneko.

⁴⁹Naye abalala ne bagamba nti, “Mumuleke. Ka tulabe obanga Eriya anajja nʼamulokola.”

⁵⁰Awo Yesu ne yeeyongera okwogerera waggulu nʼeddoboozi eddene, nʼawaayo omwoyo gwe.

⁵¹Era laba! Eggigi lyʼomu Yeekaalu ne liyulikamu wakati okuva waggulu okutuuka wansi; ensi nʼekankana, nʼenjazi ne zaatika.

⁵²Entaana ne zibikkuka era abantu ba Katonda bangi abaali bafudde ne bazuukira,

⁵³era Yesu bwe yamala okuzuukira ne bava mu ntaana gye baali baziikiddwa ne bayingira mu kibuga ekitukuvu ne balabibwa abantu bangi.

⁵⁴Omuserikale omukulu wʼekibinja kyʼabaserikale ekikumi, nʼabaserikale abaali bakuuma Yesu, bwe baalaba okukankana kwʼensi ngʼokwa musisi, nʼebirala ebyabaawo, ne batya nnyo. Ne bagamba nti, “Ddala ddala ono abadde Mwana wa Katonda.”

⁵⁵Waaliwo nʼabakazi bangi abaayitanga ne Yesu abaava naye e Ggaliraaya nga bamuweereza, baali beesuddeko akabanga, nga balaba ebigenda mu maaso.

⁵⁶Mu bo mmwe mwali Maliyamu Magudaleene ne Maliyamu nnyina wa Yakobo ne Yusufu, ne nnyina wʼabaana ba Zebbedaayo.

⁵⁷Obudde bwe bwawungeera, ne wajja omusajja omugagga ngʼava Alimasaya, erinnya lye Yusufu eyali omu ku bagoberezi ba Yesu.

⁵⁸Nʼagenda eri Piraato nʼasabayo omulambo gwa Yesu. Piraato nʼalagira bagumuwe.

⁵⁹Yusufu nʼatwala omulambo nʼaguzinga mu lugoye olulungi olwa linena,

⁶⁰nʼagugalamiza mu ntaana ye empya gye yatema mu lwazi, nʼaddira ejjinja eddene nʼaliyiringisiza mu mulyango gwʼentaana nʼaggalawo, ne yeetambulira.

⁶¹Maliyamu Magudaleene ne Maliyamu munne, bombi baali batudde awo kumpi nʼentaana.

⁶²Enkeera, ngʼolunaku olusooka mu nnaku zʼEmbaga yʼOkuyitako luweddeko, bakabona abakulu nʼAbafalisaayo ne bagenda eri Piraato,

⁶³ne bamugamba nti, “Oweekitiibwa, omulimba oli tujjukira ngʼakyali mulamu yagamba nti, ‘Nga wayiseewo ennaku ssatu ndizuukira.’

⁶⁴Noolwekyo tukusaba olagire entaana ye ekuumibwe, okutuusa ku lunaku olwokusatu, abayigirizwa be baleme kumubbamu, ne balyoka bategeeza abantu nti Azuukidde! Singa ekyo kiba bwe kityo, ekyo kye kijja okuba ekibi ennyo okusinga nʼekyasooka.”

⁶⁵Piraato nʼabaddamu nti, “Mukozese abaserikale bammwe be mulina mugende mugikuume.”

⁶⁶Bwe batyo ne bateeka akabonero akʼenvumbo ku jjinja eryaggala omulyango gwʼentaana, ne bateekawo nʼabakuumi.