Matayo 3:1-17 LGCB2014 - Bible AI

¹Mu nnaku ezo Yokaana Omubatiza nʼajja ngʼabuulira mu ddungu lyʼe Buyudaaya ngʼagamba nti,

²“Mwenenye, kubanga obwakabaka obwʼomu ggulu bunaatera okutuuka.”

³ⓔ Oyo nnabbi Isaaya gwe yayogerako ngʼagamba nti,

³“Mpulira eddoboozi lyʼoyo ayogerera waggulu mu ddungu ngʼagamba nti, ‘Mulongoose oluguudo lwa Mukama, muluŋŋamye amakubo ge!’ ”

⁴Ebyambalo bya Yokaana byakolebwa mu bwoya bwa ŋŋamira, era nga yeesibya lukoba lwa ddiba. Nʼemmere ye yali nzige na mubisi gwa njuki.

⁵Abantu bangi ne bava mu Yerusaalemi ne mu Buyudaaya mwonna ne mu bifo ebiriraanye Yoludaani ne bajja mu ddungu okuwulira byʼabuulira.

⁶Nʼababatiza mu mugga Yoludaani, nga baatula ebibi byabwe.

⁷Naye bwe yalaba Abafalisaayo bangi nʼAbasaddukaayo nga bajja okubatizibwa nʼabagamba nti, “Mmwe, abaana bʼessalambwa, ani yabalabula okudduka obusungu bwa Katonda obugenda okujja?

⁸Kale mubale ebibala ebiraga nti Mwenenyeza.

⁹Temulowooza mu mitima gyammwe nti, ‘Tuli bulungi kubanga tuli Bayudaaya, abaana ba Ibulayimu, tetufaayo, tetulina kye twetaaga.’ Ekyo tekibasigula. Mbategeeza nti, Katonda ayinza okufuula amayinja gano abaana ba Ibulayimu!

¹⁰Kaakano embazzi ya Katonda eteekeddwa ku buli kikolo kya muti, omuti ogutabala bibala, gutemebwa gusuulibwe mu muliro, gugye.”

¹¹“Nze mbabatiza na mazzi okutuuka ku kwenenya, naye waliwo omulala ajja, oyo ye ansinga amaanyi era sisaanira na kukwata ngatto ze, oyo alibabatiza ne Mwoyo Mutukuvu nʼomuliro.

¹²Ekikuŋŋunta kiri mu mukono gwe, alirongoosa egguuliro lye. Eŋŋaano aligitereka mu tterekero lye, naye ebisusunku alibyokya mu muliro ogutazikira.”

¹³Awo Yesu nʼava e Ggaliraaya nʼajja ku mugga Yoludaani, abatizibwe Yokaana.

¹⁴Naye Yokaana nʼayagala okugaana, nʼagamba nti, “Nze neetaaga ggwe okumbatiza, naye ate gwʼojja gye ndi?”

¹⁵Yesu nʼamuddamu nti, “Kkiriza ombatize, kubanga kitugwanidde okutuukiriza obutuukirivu bwonna.” Awo Yokaana nʼamukkiriza.

¹⁶Awo amangwago Yesu nga yakamala okubatizibwa nga yaakava mu mazzi, eggulu ne libikkuka nʼalaba Omwoyo wa Katonda ngʼamukkako mu kifaananyi kyʼejjiba.

¹⁷Eddoboozi ne liva mu ggulu ne ligamba nti, “Ono ye Mwana wange omwagalwa gwe nsanyukira ennyo.”