Matayo 4:1-25 LGCB2014 - Bible AI

¹Awo Yesu nʼatwalibwa Mwoyo Mutukuvu mu ddungu okukemebwa Setaani.

²Nʼamala ennaku amakumi ana ngʼasiiba, nga talya, emisana nʼekiro, oluvannyuma enjala nʼemuluma.

³Setaani nʼajja gyʼali nʼamugamba nti, “Obanga oli Mwana wa Katonda, lagira amayinja gano gafuuke emmere.”

⁴ⓕ Naye Yesu nʼamuddamu nti, “Kyawandiikibwa nti: ‘Omuntu tabeera mulamu na mmere yokka, wabula na buli kigambo ekiva mu kamwa ka Katonda.’ ”

⁵Awo Setaani nʼamutwala mu kibuga ekitukuvu nʼamussa ku kitikkiro kya Yeekaalu.

⁶ⓖ Nʼamugamba nti,

⁶“Obanga oli Mwana wa Katonda weesuule wansi kubanga kyawandiikibwa nti, ‘Katonda aliweereza bamalayika be bakuwanirire mu mikono gyabwe oleme okwekoona ekigere kyo ku jjinja.’ ”

⁷ⓗ Yesu nʼaddamu Setaani nti, “Kyawandiikibwa nti, ‘Tokemanga Mukama Katonda wo.’ ”

⁸Ate Setaani nʼamutwala ku lusozi oluwanvu nʼamulengeza ensi zonna nʼobwakabaka bwamu nʼekitiibwa kyabwo kyonna,

⁹nʼamugamba nti, “Bino byonna nnaabikuwa bwʼonoovuunama nʼonsinza.”

¹⁰ⓘ Yesu nʼaddamu nti, “Vvaawo, genda Setaani. Kyawandiikibwa nti, ‘Osinzanga Mukama Katonda wo yekka, era gwʼoweerezanga.’ ”

¹¹Setaani nʼamuviira nʼagenda. Bamalayika ne bajja ne bamuweereza.

¹²Yesu bwe yawulira nga Yokaana bamusibye mu kkomera nʼagenda e Ggaliraaya.

¹³Bwe yava e Nazaaleesi nʼagenda abeera e Kaperunawumu ekiri ku lubalama lwʼennyanja mu byalo byʼe Zebbulooni nʼe Nafutaali.

¹⁴Kino ne kituukiriza ekyayogerwa nnabbi Isaaya ngʼagamba nti,

¹⁵“Ensi ya Zebbulooni nʼensi ya Nafutaali, okuliraana ennyanja, nʼebyalo ebiri emitala wʼomugga Yoludaani, nʼe Ggaliraaya eyʼekyengulu omuli bannaggwanga abangi,

¹⁶ⓙ abantu abaatuulanga mu kizikiza, balabye Omusana mungi. Abaatuulanga mu nsi eyʼekisiikirize ekyʼokufa, omusana gubaakidde.”

¹⁷Okuva mu kiseera ekyo Yesu nʼatandika okubuulira nti, “Mwenenye, kubanga obwakabaka obwʼomu ggulu busembedde.”

¹⁸Yesu bwe yali ngʼatambula ku lubalama lwʼennyanja yʼe Ggaliraaya nʼalaba abooluganda babiri: Simooni, gwe bayita Peetero, ne Andereya, nga basuula obutimba bwabwe mu nnyanja, kubanga baali bavubi.

¹⁹Awo Yesu, nʼabagamba nti, “Mujje mungoberere, nange ndibafuula abavubi bʼabantu.”

²⁰Amangwago ne baleka awo obutimba bwabwe, ne bamugoberera.

²¹Bwe yeeyongerayo katono, nʼasanga abooluganda abalala babiri: Yakobo, ne Yokaana, nga batudde ne kitaabwe Zebbedaayo mu lyato nga baddaabiriza obutimba bwabwe, nabo nʼabayita bamugoberere.

²²Amangwago, ne baleka awo kitaabwe mu lyato ne bagenda naye.

²³Yesu nʼabuna wonna mu Ggaliraaya ngʼayigiriza mu makuŋŋaaniro gʼAbayudaaya ngʼabuulira Enjiri eyʼobwakabaka obwʼomu ggulu, era ngʼawonya buli ndwadde yonna nʼobuyongobevu bwonna mu bantu.

²⁴Amawulire agʼebyamagero bye yakolanga ne gatuuka mu Siriya yonna. Ne bamuleetera abayongobevu, nʼabalina ebibabonyaabonya, nʼabʼensimbu nʼabo abaaliko baddayimooni, abakoozimbye nʼabʼendwadde endala ezitali zimu, bonna nʼabawonya.

²⁵Ebibiina binene ne bimugoberera, abantu nga bava mu Ggaliraaya ne mu Dekapoli,[3] ne mu Yerusaalemi ne mu Buyudaaya yonna, nʼemitala wʼomugga Yoludaani.