Matayo 6:1-34 LGCB2014 - Bible AI

¹“Mwegendereze, ebikolwa byammwe ebyʼobutuukirivu obutabikoleranga mu lujjudde lwʼabantu nga mwagala babasiime, kubanga bwe munaakolanga bwe mutyo Kitammwe ali mu ggulu talibawa mpeera.”

²“Bwʼobanga ogabira omwavu ekintu teweeraganga nga bannanfuusi bwe bakola ne basooka okufuuwa eŋŋombe mu makuŋŋaaniro ne mu nguudo, nga bagenda okugabira abaavu, abantu babalabe babawe ekitiibwa. Ddala ddala mbagamba nti Abo, eyo yʼempeera yaabwe.

³Naye ggwe bwʼobanga ogabira omuntu yenna ekintu omukono gwo ogwa kkono guleme kumanya ogwa ddyo kye gukola.

⁴Kale Kitaawo amanyi ebyama byonna alikuwa empeera.”

⁵“Era bwe mubanga musaba mwekuume obutaba nga bannanfuusi abaagala okweraga nga bwe bali bannaddiini, ne basabira mu makuŋŋaaniro ne ku nguudo mu lujjudde, abantu babalabe. Abo, eyo yʼempeera yokka gye balifuna.

⁶Naye ggwe bwʼobanga osaba, oyingiranga mu nnyumba yo, ne weggalira mu kisenge kyo nʼosabira eyo mu kyama. Kitaawo ategeera ebyama byo byonna alikuwa byʼomusabye.

⁷Era bwe musabanga temuddiŋŋananga mu bigambo oba okwogera ebigambo enkumu ngʼabatamanyi Katonda bwe bakola nga balowooza nti Bwe banaddiŋŋana mu bigambo emirundi nʼemirundi okusaba kwabwe lwe kunaddibwamu.

⁸Kale temubafaanananga, kubanga Kitammwe amanyidde ddala byonna bye mwetaaga ne bwe muba nga temunnamusaba.”

⁹Noolwekyo mumusabenga bwe muti nti, Kitaffe ali mu ggulu, Erinnya Lyo litukuzibwe.

¹⁰Obwakabaka bwo bujje. Byʼoyagala bikolebwe mu nsi, nga bwe bikolebwa mu ggulu.

¹¹Tuwe emmere yaffe eya leero.

¹²Tusonyiwe ebyonoono byaffe nga naffe bwe tusonyiwa abatwonoona.

¹³Totuganya kukemebwa naye tulokole eri omubi.[4]

¹⁴“Kubanga bwe munaasonyiwanga ababasobezza, nammwe Kitammwe ali mu ggulu anaabasonyiwanga.

¹⁵Naye bwe mutaasonyiwenga bannammwe, nammwe Kitammwe ali mu ggulu taabasonyiwenga.”

¹⁶“Bwe musiibanga, temukiraganga nga bannanfuusi bwe bakola. Kubanga batunuza ennaku balyoke balabike mu bantu nti basiiba, mbategeeza ngʼabo, eyo yʼempeera yokka gye bagenda okufuna.

¹⁷Naye ggwe bwʼosiibanga olongoosanga enviiri zo nʼonaaba ne mu maaso

¹⁸abantu baleme kutegeera nti osiiba, okuggyako Kitaawo ali mu ggulu era alaba mu kyama alikuwa empeera.”

¹⁹“Temweterekeranga byabugagga wano ku nsi kwe biyinza okwonoonebwa ennyenje nʼobutalagge, nʼababbi kwe bayinza okubibbira.

²⁰Naye mweterekerenga obugagga bwammwe mu ggulu gye butayinza kwonoonebwa nnyenje wadde obutalagge, nʼababbi gye batayinza kuyingira kububba.

²¹Kubanga obugagga bwo gye bubeera nʼomutima gwo gye gubeera.”

²²“Eriiso yʼettabaaza yʼomubiri gwo, noolwekyo eriiso bwe liba eddamu, omubiri gwo gwonna gujjula ekitangaala ngʼekyʼomusana.

²³Naye eriiso lyo bwe liba ebbi, omubiri gwo gwonna gunaabeeranga nʼekizikiza, noolwekyo ekizikiza ekyo kiba kikwafu nnyo!”

²⁴“Tewali nʼomu ayinza kuweereza baami babiri, kubanga alikyawako omu nʼayagala omulala oba aliwulirako omu nʼanyooma omulala. Toyinza kuweereza Katonda na mamona.[5] ”

²⁵“Noolwekyo mbagamba nti, Temweraliikiriranga bya bulamu bwammwe, bye munaalya oba bye munaanywa, wadde ebyokwambala. Kubanga obulamu businga ebyokulya, nʼomubiri gusinga ebyambalo.

²⁶Mulabire ku nnyonyi ezʼomu bbanga! Tezisiga so tezikungula so tezikuŋŋaanyiza mmere mu mawanika, naye Kitammwe ali mu ggulu aziriisa. Naye mmwe temusinga nnyo ennyonyi ezo?

²⁷Ani ku mmwe, bwe yeeraliikirira, ayinza okwongerayo obulamu bwe eddakiika nʼemu?”

²⁸“Naye lwaki mweraliikirira ebyokwambala? Mulabire ku malanga agʼoku ttale! Tegaliiko kye geekolera,

²⁹naye ne Kabaka Sulemaani mu kitiibwa kye teyayambalako ngʼerimu ku go.

³⁰Naye obanga Katonda ayambaza obulungi bwʼatyo omuddo ogwʼomu nsiko ogwʼekiseera obuseera, oguliwo kaakano ate enkya nga gwokeddwa, mmwe talibambaza nnyo nʼokusinga omuddo ogwo? Nga mulina okukkiriza okutono!

³¹Noolwekyo temweraliikiririranga nga mugamba nti, ‘Tunaalya ki? Oba nti, Tunaanywa ki? Oba nti, Tunaayambala ki?’

³²Ebyo byonna Bannamawanga bye bayaayaanira. Naye Kitammwe ali mu ggulu amanyi ngʼebyo byonna mubyetaaga.

³³Naye musooke munoonye obwakabaka bwa Katonda nʼobutuukirivu bwe, ebyo byonna mulibyongerwako.

³⁴Noolwekyo temweraliikiriranga bya nkya. Kubanga olunaku olwʼenkya lulyeraliikirira ebyalwo. Buli lunaku lulina emitawaana gyalwo egimala.”