Matayo 7:1-29 LGCB2014 - Bible AI

¹“Temusalanga musango, nammwe muleme okusalirwa omusango.

²Kubanga nga bwe musalira abalala nammwe bwe mujjanga okusalirwa. Ekigera kye mugereramu, nammwe kye muligererwamu.”

³“Ofaayo ki ku kati akali ku liiso lya muganda wo so nga ku liryo kuliko kisiki kiramba?

⁴Oyinza otya okugamba muganda wo nti, ‘Leka nkuggyeko akasasiro akakuli ku liiso,’ so nga ku liryo kuliko kisiki?

⁵Munnanfuusi ggwe! Sooka oggyeko ekisiki ekiri ku liiso lyo olyoke olabe bulungi nga bwʼoggyako akasasiro akali ku liiso lya muganda wo.”

⁶“Temuddiranga bintu bitukuvu ne mubiwa embwa. Nʼembizzi temuzisuuliranga mayinja agʼomuwendo omungi, kubanga zigenda kugalinnyirira, nʼoluvannyuma zikyuke zibalume.”

⁷“Musabe, munaaweebwa. Munoonye, munaazuula. Era mukonkone munaggulirwawo.

⁸Kubanga buli asaba aweebwa, na buli anoonya azuula, na buli akonkona aggulirwawo.”

⁹“Oba muntu ki mu mmwe singa omwana we amusaba omugaati, ayinza okumuwa ejjinja?

¹⁰Oba singa asabye ekyennyanja, kitaawe ayinza okumuwa omusota?

¹¹Obanga mmwe abantu ababi musobola okuwa abaana bammwe ebirabo ebirungi, Kitammwe ali mu ggulu talisingawo okubawa ebirungi bye mumusaba?

¹²Noolwekyo ebintu byonna bye mwagala abantu babakolerenga nammwe mubibakoleranga, kubanga ebyo bye biri mu mateeka ne mu bunnabbi.”

¹³“Muyingirire mu mulyango omufunda! Kubanga ekkubo erigenda mu kuzikirira ddene nʼomulyango mugazi, nʼabalonda ekkubo eryo bangi.

¹⁴Kubanga omulyango mufunda, nʼekkubo eridda eri obulamu ffunda, era nʼabaliraba batono.”

¹⁵“Mwekuume abayigiriza abʼobulimba, abajja nga bambadde amaliba gʼendiga, songa munda gyʼemisege egigenda okubataagulataagula.

¹⁶Mulibalabira ku bikolwa byabwe, ngʼomuti bwe mugutegeerera ku bibala byagwo. Omuntu tayinza kunoga mizabbibu ku busaana oba okunoga ettiini ku mweramannyo.

¹⁷Noolwekyo buli muti omulungi gubala ebibala ebirungi, naye omuti omuvundu gubala ebibala ebibi.

¹⁸Omuti omulungi teguyinza kubala bibala bibi, nʼomuti omuvundu teguyinza kubala bibala birungi.

¹⁹Omuti gwonna ogutabala bibala birungi gutemebwa ne gusuulibwa mu muliro.

²⁰Noolwekyo mulibategeerera ku bibala byabwe.”

²¹“Si bonna abampita nti, ‘Mukama waffe, Mukama waffe,’ be baliyingira obwakabaka obwʼomu ggulu, wabula abo bokka abakola ebyo Kitange ali mu ggulu byʼayagala.

²²Ku lunaku Iuli bangi baliŋŋamba nti, ‘Mukama waffe, Mukama waffe, twayogeranga ebyʼobunnabbi mu linnya lyo, era ne tugoba ne baddayimooni mu linnya lyo, ne tukola nʼebyamagero bingi mu linnya lyo.’

²³Ndibaddamu nti, ‘Sibamanyi, muve mu maaso gange, kubanga ebikolwa byammwe byali bibi.’ ”

²⁴“Noolwekyo buli awulira ebigambo byange nʼabikola alifaananyizibwa ngʼomusajja owʼamagezi eyazimba enju ye ku lwazi.

²⁵Enkuba nʼetonnya, emigga ne gikulukuta, omuyaga ne gujja, ne bikuba enju eyo naye nʼetegwa kubanga yazimbibwa ku lwazi.

²⁶Naye buli awulira ebigambo byange nʼatabikola, alifaananyizibwa ngʼomusajja omusirusiru eyazimba ennyumba ye mu musenyu.

²⁷Enkuba nʼetonnya, emigga ne gikulukuta, omuyaga ne gujja, ne bikuba ennyumba eyo, nʼegwa, nʼokugwa kwayo ne kuba kunene.”

²⁸Awo Yesu nʼamaliriza ebigambo bye ebyo. Abantu bonna ne beewuunya nnyo olwʼokuyigiriza kwe.

²⁹Kubanga yabayigiriza nga nannyini buyinza, so si ngʼabannyonnyozi bʼamateeka baabwe bwe baayigirizanga.