Matayo 9:1-38 LGCB2014 - Bible AI

¹Awo Yesu nʼasaabala mu lyato nʼawunguka nʼatuuka mu kibuga kyʼewaabwe, Kaperunawumu.

²Amangwago ne bamuleetera omuntu eyali akoozimbye nga bamusitulidde ku katanda. Bwe yalaba okukkiriza kwabwe nʼagamba omulwadde nti, “Mwana wange, guma omwoyo, nkusonyiye ebibi byo!”

³Naye waaliwo abamu ku bannyonnyozi bʼamateeka ne boogeraganya bokka na bokka nti, “Omuntu ono avvoola! Alowooza nti Ye Katonda!”

⁴Yesu nʼamanya bye balowooza. Nʼabagamba nti, “Lwaki mubeera nʼebirowoozo ebibi mu mitima gyammwe?

⁵Ekyo buli muntu ayinza okukyogera, kubanga kwogera bwogezi.

⁶Naye mutegeere nga Omwana wʼOmuntu alina obuyinza ku nsi okusonyiwa ebibi.” Awo nʼagamba akoozimbye nti, “Yimirira weetikke akatanda ko, weddireyo ewammwe!”

⁷Nʼayimirira ngʼawonye, ne yeddirayo eka.

⁸Naye abantu abaali mu bibiina bwe baalaba ekyamagero kino ne beewuunya nnyo! Ne bagulumiza Katonda eyawa abantu obuyinza obwenkaniddaawo!

⁹Awo Yesu bwe yava mu kifo ekyo nʼalaba omuntu, erinnya lye Matayo, ngʼatudde mu kifo we basolooleza omusolo, nʼamugamba nti, “Ngoberera.” Bwʼatyo naye nʼasitukiramu nʼagoberera Yesu.

¹⁰Awo Yesu bwe yali ngʼatudde ku mmere mu nnyumba ya Matayo, abawooza bangi nʼabantu abaali bamanyiddwa mu kitundu ekyo nti Babi ne bajja ne batuula naye nʼabayigirizwa be ku mmere ne balya.

¹¹Naye Abafalisaayo bwe baakiraba, ne bagamba abayigirizwa be nti, “Lwaki Mukama wammwe alya nʼabawooza nʼabantu abalina ebibi?”

¹²Yesu bwe yawulira nʼabaddamu nti, “Abalamu tebeetaaga musawo wabula abalwadde.

¹³ⓠ Mugende muyige amakulu gʼEkyawandiikibwa kino nti, ‘Ssaddaaka zammwe nʼebirabo byammwe si bye neetaaga, wabula neetaaga mubeerenga ba kisa.’ Najjirira kuyita boonoonyi, so sajjirira abo abeerowooza nti Batuukirivu.”

¹⁴Lwali lumu abayigirizwa ba Yokaana ne bajja eri Yesu ne bamubuuza nti, “Lwaki abayigirizwa bo tebasiiba nga ffe nʼAbafalisaayo bwe tukola?”

¹⁵Yesu nʼababuuza nti, “Mikwano gyʼomugole bayinza okunakuwala ngʼomugole akyali nabo? Naye ekiseera kirituuka omugole lwalibaggibwako. Olwo nno balisiiba.

¹⁶“Tewali muntu atunga kiwero kiggya mu lugoye lukadde, kubanga, ekiwero bwe kyetugga kiyuza olugoye olukadde, nʼekituli ne kigaziwa.

¹⁷Era tewali ateeka wayini musu mu nsawo ezʼamaliba enkadde. Ensawo[7] enkadde zaabika wayini nʼayiika nʼensawo ne zoonooneka. Wayini omusu bamuteeka mu nsawo zʼamaliba maggya, byombi ne bitayonooneka.”

¹⁸Bwe yali ngʼakyayogera nabo omufuzi nʼajja, nʼamusinza nʼamugamba nti, “Omwana wange omuwala anfuddeko, naye singa ojja nʼomukwatako anaalamuka.”

¹⁹Yesu bwe yasituka nʼabayigirizwa be okugenda mu maka gʼomukulu wʼekkuŋŋaaniro,

²⁰Omukazi eyali alwadde ekikulukuto kyʼomusaayi, okumala emyaka kkumi nʼebiri, nʼajja emabega we nʼakoma ku kyambalo kye.

²¹Kubanga yʼagamba mu mutima gwe nti, “Ne bwe nnaakoma obukomi ku kyambalo kye nnaawona.”

²²Yesu nʼakyuka nʼalaba omukazi nʼamugamba nti, “Muwala, guma omwoyo! Owonye olwʼokukkiriza kwo.” Omukazi nʼawonera mu kiseera ekyo.

²³Awo Yesu bwe yatuuka mu maka gʼomufuzi nʼasanga abafuuyi bʼamakondeere nʼekibiina nga kijagaladde,

²⁴nʼagamba nti, “Mufulume kubanga omuwala tafudde wabula yeebase bwebasi.” Bonna ne bamusekerera nga bwe beesooza.

²⁵Naye abantu bwe bamala okufuluma, Yesu nʼayingira, nʼakwata omukono gwʼomuwala, nʼagolokosa omuwala.

²⁶Ebigambo ebyo ne bibuna mu kitundu ekyo kyonna.

²⁷Awo Yesu bwe yava eyo, abazibe bʼamaaso babiri ne bamugoberera nga bwe baleekaana nti, “Ayi Omwana wa Dawudi, otusaasire!”

²⁸Bwe yatuuka mu nju, bamuzibe ne bajja wʼali. Yesu nʼababuuza nti, “Mukkiriza nga nnyinza okubazibula amaaso?” Ne bamuddamu nti, “Weewaawo, Mukama waffe.”

²⁹Awo nʼakoma ku maaso gaabwe nʼabagamba nti, “Kale, olwʼokukkiriza kwammwe, kye musabye mukiweereddwa.”

³⁰Amangwago amaaso gaabwe ne gazibuka. Yesu nʼabakuutira nnyo baleme kubuulirako muntu yenna.

³¹Naye bwe baava awo, ne bagenda nga basaasaanya ebigambo ebyo, nga babuulira buli muntu gwe baasisinkananga mu kitundu ekyo.

³²Awo Yesu ne be yali nabo, bwe baali bafuluma ne bamuleetera kiggala eyali tayogera kubanga yaliko dayimooni.

³³Yesu nʼamugobako dayimooni, era amangwago abadde kiggala nʼayogera. Abantu bonna ne beewuunya nnyo nga bagamba nti, “Kino tekibangawo mu Isirayiri.”

³⁴Naye Abafalisaayo ne bagamba nti, “Agoba baddayimooni lwa kubanga ye mukulu wa baddayimooni!”

³⁵Yesu nʼagenda ngʼayita mu bibuga byonna ebyʼomu kitundu ekyo, ne mu byalo ngʼayigiriza mu makuŋŋaaniro gaabwe, era ngʼabuulira Enjiri eyʼobwakabaka. Era buli we yatuukanga nʼawonya abalwadde nʼabakoozimbye bonna.

³⁶Awo bwe yatunuulira ekibiina kyʼabantu nga bajja gyʼali, nga bakooye nnyo, era nga basaasaanye ngʼendiga ezitalina musumba, nʼabasaasira nnyo.

³⁷Nʼagamba abayigirizwa be nti, “Ebyʼokukungula bingi nnyo, naye abakozi abakungula batono.

³⁸Noolwekyo musabe nannyini nnimiro aweereze abakunguzi mu nnimiro ye.”