Mikka 1:1-16 LGCB2014 - Bible AI

¹Mu mirembe Yuda gye yagenda efugibwa bakabaka bano: Yosamu, ne Akazi, ne Keezeekiya, Mikka eyali Omumolasuuti, yafuna obubaka obuva eri Mukama, obukwata ku kibuga Samaliya ne Yerusaalemi.

²Muwulire mmwe abantu mwenna, muwulire mmwe ebintu byonna ebiri mu nsi, ne bonna abagirimu, Mukama Ayinzabyonna asinziira mu yeekaalu ye entukuvu, ngʼalina byʼabalumiriza.

³Mulabe, Mukama ajja ngʼava mu ggulu ku ntebe ye ngʼakka ku nsi ngʼatambulira ku nsozi waggulu.

⁴Nʼensozi zirisaanuukira wansi wʼebigere bye era nʼebiwonvu ne byatika ne bisaanuuka ngʼebisenge byʼemizindu byʼenjuki ebyokeddwa omuliro, ngʼamazzi gʼekiyiriro bwe gakulukuta ku lusozi nga gayirira ku bbangabanga.

⁵Bino byonna biribeerawo olwʼokwonoona kwa Yakobo, olwʼebibi byʼennyumba ya Isirayiri. Ekibi kya Yakobo kye kiruwa? Si ye Samaliya? Kifo ki ekigulumivu ekya Yuda? Si Yerusaalemi?

⁵

⁶“Noolwekyo nzija kubetenta Samaliya ngifuule ebifunfugu, kifuuke nga ennimiro eyʼokusimbamu emizabbibu. Ndiyiwa amayinja gaakyo mu kiwonvu Nʼemisingi gyakyo ne ngireka nga gyasamye.

⁷Bakatonda baakyo bonna be basinza, balisekulwasekulwa; ebintu byonna ebyaweebwayo ngʼebirabo mu yeekaalu biriggya omuliro; ndizikiriza bakatonda baakyo bonna be beekolera. Ngʼebirabo ebyo bwe byafunibwa mu bwenzi, bwe bityo bwe biritwalibwa mu bwenzi ne bikozesebwa.”

⁸Kyendiva nkaaba ne nkuba ebiwoobe, ne ntambula nga sambadde ngatto, era nga ndi bukunya. Ndikaaba ngʼekibe, ne nkuba ebiwoobe ngʼabaana bʼekiwuugulu.

⁹Ekiwundu kye tekiwonyezeka, ne Yuda kyʼalwadde. Kituukidde ddala ku mulyango gwʼabantu bange, ne ku Yerusaalemi yennyini.

¹⁰Temukibuulira mu Gaasi, temukaaba maziga nʼakatono. Mwevulungulire mu nfuufu mu Besuleyafula.

¹¹Muyiteewo nga muli bwereere nga muswadde, mmwe ababeera mu Safiri. Ababeera mu Zanani tebalifuluma. Beswezeeri ekuba ebiwoobe, kubanga tokyalinayo buddukiro.

¹²Abo abʼomu Malosi bali mu kulumwa okwʼamaanyi nga balindirira okubeerwa, kubanga ekibonoobono kivudde eri Mukama, ne kituuka ne ku mulyango gwa Yerusaalemi.

¹³Mwanguwe okusiba amagaali ku mbalaasi mmwe ababeera mu Lakisi. Mmwe nsibuko yʼekibi mu Bawala ba Sayuuni, kubanga ebibi bya Isirayiri byasangibwa mu mmwe.

¹⁴Noolwekyo muligabira Molesesu ekyʼe Gaasi ebirabo ebimusiibula. Ebibuga byʼe Akuzibu birikakasibwa nga bya bulimba eri bakabaka ba Isirayiri.

¹⁵Mmwe abantu bʼomu Malesa, ndibasindikira alibawangula nʼabafuga. Oyo ekitiibwa kya Isirayiri alijja mu Adulamu.

¹⁶Mukungubage, nʼemitwe mugimwe olwʼabaana bammwe be mwesiimisa; mumwe enviiri zammwe nga mukungubaga, emitwe gyammwe gibe ngʼegyʼensega, kubanga abaana bammwe balibaggyibwako ne batwalibwa mu buwaŋŋanguse.