Mikka 2:1-13 LGCB2014 - Bible AI

¹Zibasanze mmwe abateesa okukola ebitali bya butuukirivu era abateesa okukola ebibi nga bali ku buliri bwabwe; Obudde bwe bukya ne batuukiriza entegeka zaabwe, kubanga kiri mu nteekateeka yaabwe.

²Beegomba ebyalo ne babitwala, ne beegomba ennyumba nazo ne bazitwala. Banyigiriza omuntu ne batwala amaka ge olwʼamaanyi, ne bamubbako ebyobusika bwe.

³Mukama kyava agamba nti, “Laba, ndireeta akabi ku bantu abo, ke mutagenda kweggyamu. Temuliddayo kubeera nʼamalala nate kubanga kiriba kiseera kya mitawaana.

⁴Olwo abantu balikusekerera; Balikuyeeyereza nga bayimba oluyimba luno olwʼokukungubaga nti: ‘Tugwereddewo ddala; ebintu byʼabantu bange bigabanyizibbwamu. Mukama anziggirako ddala ettaka lyange, nʼaliwa abo abatulyamu enkwe.’ ”

⁴

⁵Noolwekyo tewalisigalawo muntu nʼomu mu kuŋŋaaniro lya Mukama, aligabanyaamu ettaka ku bululu.

⁶Bannabbi baabwe boogera nti, “Temuwa bunnabbi, Temuwa bunnabbi ku bintu ebyo; tewali kabi kagenda kututuukako.”

⁷Ekyo kye kyʼokuddamu ggwe ennyumba ya Yakobo? Olowooza Omwoyo wa Mukama asunguwalira bwereere, si lwa bulungi bwo? Ebigambo bye tebiba birungi eri abo abakola obulungi?

⁸Ennaku zino abantu bange bannyimukiddeko ngʼomulabe. Basika ne bambula eminagiro emirungi ne baggigya ku migongo gyʼabayise ababa beetambulira mu mirembe, ngʼabasajja abakomawo okuva mu lutabaalo.

⁹Bakazi bʼabantu bange mubagoba mu mayumba gaabwe amalungi, abaana baabwe ne mubaggyirako ddala buli mukisa oguva eri Katonda.

¹⁰Muyimuke mugende, kubanga kino tekikyali kiwummulo kyammwe; olwʼebikolwa ebibi bye mukijjuzza, kyonoonese obutaddayo kuddaabirizika.

¹¹Omuntu bwʼajja nʼomwoyo ogwʼobulimba, nʼagamba nti, “Ka mbabuulire ku ssanyu lyʼomwenge gwe baagala era gwe banoonya,” oyo yʼaba nnabbi wʼabantu abo.

¹¹

¹²“Ddala ddala ndibakuŋŋaanya mwenna, ggwe Yakobo; ndikuŋŋaanya abo abaasigalawo ku Isirayiri. Ndibakuŋŋaanya ngʼakuŋŋaanya endiga ezʼomu ddundiro, ngʼekisibo mu ddundiro lyakyo, ekifo kirijjula abantu.

¹³Oyo aggulawo ekkubo alibakulembera okubaggya mu buwaŋŋanguse, abayise mu mulyango abafulumye. Era kabaka waabwe alibakulembera, Mukama alibakulembera.”