Mikka 4:1-13 LGCB2014 - Bible AI

¹Mu nnaku ezʼoluvannyuma olusozi lwʼennyumba ya Mukama luligulumizibwa okusinga ensozi zonna; lulisitulibwa waggulu okusukkuluma ku busozi, era abantu balisimba ennyiriri nga balaga gye luli.

²Amawanga mangi galiragayo ne googera nti, “Mujje twambuke ku lusozi lwa Mukama, mu nnyumba ya Katonda wa Yakobo. Alituyigiriza byʼayagala tulyoke tutambulire mu makubo ge.” Alisinziira mu Sayuuni okuwa abantu etteeka lye, nʼekigambo kya Mukama kiriva mu Yerusaalemi.

³Aliramula amawanga atereeze ensonga wakati wʼamawanga gakirimaanyi agʼewala. Baliddira ebitala byabwe ne babiweesaamu enkumbi, nʼamafumu gaabwe ne bagaweesaamu ebiwabyo. Eggwanga teririyimusa kitala ku ggwanga linnaalyo, so tebalyetegeka kulwana ntalo nate.

⁴Buli muntu aliba mu ddembe wansi wʼomuzabbibu gwe ne mu mutiini gwe. Tewalibaawo abatiisa kubanga akamwa ka Mukama Ayinzabyonna ke kakyogedde.

⁵Newaakubadde nga amawanga gonna galigoberera bakatonda baago, naye ffe tunaatambuliranga mu linnya lya Mukama Katonda waffe emirembe nʼemirembe.

⁶“Ku lunaku olwo,” bwʼayogera Mukama, “Ndikuŋŋaanya abalema, nʼabo abaawaŋŋangusibwa nʼabo abali mu nnaku.

⁷Abalema ndibafuula abalonde, nʼabo be nagoba, mbafuule eggwanga eryʼamaanyi. Mukama alibafugira mu Lusozi Sayuuni okuva ku lunaku olwo okutuusa emirembe gyonna.

⁸Ggwe omunaala oguyimirirwamu okulabirira endiga, ggwe ekigo ekyʼamaanyi ekya Muwala wa Sayuuni, ekitiibwa kyo ekyʼedda kirikuddira, nʼobwakabaka ne bukomawo eri Muwala wa Sayuuni.”

⁹Naye kaakano kiki ekibakaabya ennyo bwe mutyo? Temulina kabaka abakulembera? Omuwi wʼamagezi wammwe yafa, ennaku eryoke ebakwate ngʼomukazi alumwa okuzaala?

¹⁰Lumwa, weenyoole ggwe Omuwala wa Sayuuni ngʼomukazi alumwa okuzaala. Kubanga kaakano oteekwa okuva mu kibuga ogende obeere ku ttale. Mulitwalibwa mu buwaŋŋanguse mu Babulooni, era eyo gye ndibalokolera. Ndibanunulira eyo okuva mu mukono gwʼomulabe.

¹⁰

¹¹Kyokka kaakano amawanga mangi gakuŋŋaanye okubalwanyisa. Boogera nti, Ayonoonebwe, nʼamaaso gaffe geelolere Sayuuni.

¹²Naye tebamanyi birowoozo bya Mukama; tebategeera kuteesa kwe; oyo akuŋŋaanya abalabe be ngʼebisusunku byʼeŋŋaano bwe bikuŋŋaanyizibwa mu gguuliro.

¹²

¹³“Golokoka otandike okusa ggwe Omuwala wa Sayuuni, kubanga ejjembe lyo ndirifuula ekyuma; ndikuwa ebigere ebyʼekyuma ekyʼekikomo era olibetenta amawanga mangi.”

¹³Amagoba gaabwe nʼebintu byabwe bye bafunye mu makubo amakyamu olibiwaayo eri Mukama, nʼobugagga bwabwe nʼobuwaayo eri Mukama wʼensi zonna.