Mikka 5:1-15 LGCB2014 - Bible AI

¹Kuŋŋaanya amaggye go, ggwe ekibuga ekirina amaggye, kubanga tulumbiddwa. Omukulembeze wa Isirayiri balimukuba omuggo ku luba.

²“Naye ggwe Besirekemu Efulasa, newaakubadde ngʼoli mutono mu bika bya Yuda, mu ggwe mwe muliva alibeera omufuzi wange mu Isirayiri. Oyo yaliwo okuva edda nʼedda, ngʼensi tennabaawo.”

²

³Mukama kyaliva awaayo Isirayiri eri abalabe baayo okutuusa omukyala alumwa okuzaala lwalizaala omwana, era baganda be abaasigalawo ne balyoka bakomawo eri bannaabwe mu Isirayiri.

³

⁴Aliyimirira nʼanyweera nʼaliisa ekisibo kye mu maanyi ga Mukama, mu kitiibwa kyʼerinnya lya Mukama Katonda we. Era abantu be tebalibaako abateganya, kubanga aliba mukulu okutuusa ku nkomerero yʼensi.

⁵Omukulu oyo aliba mirembe gyabwe. Omwasuli bwʼalirumba ensi yaffe nʼabuna ebigo byaffe, tulimuyimbulira abasumba musanvu, nʼabakulembeze munaana.

⁶Abo be balifuga ensi ya Asuli nʼekitala era ensi ya Nimuloodi nayo bagyonoone. Naye alitulokola eri Omwasuli bwʼalitulumba mu nsi yaffe era bwʼaliyingira mu nsalo zaffe.

⁶

⁷Abantu ba Isirayiri abalisigalawo balibeera wakati mu mawanga agabeetoolodde, babe ngʼomusulo oguva eri Mukama, ngʼobukubakuba obutonnyeredde ku muddo obutalindirira muntu oba abaana bʼabantu.

⁸Ngʼempologoma bwʼebeera nʼensolo endala ezʼomu nsiko, abantu abaasigalawo aba Yakobo balibeera mu mawanga mangi agabeetoolodde; ate era ngʼempologoma ento mu bisibo byʼendiga, bwʼegenda nʼeyitamu nʼetaagulataagula ne wataba nʼomu aziwonya.

⁹Omukono gwo guliwangula abalabe bo, ne bonna abakuyigganya balizikirizibwa.

¹⁰“Ku lunaku olwo,” bwʼayogera Mukama, “Ndizikiriza embalaasi zo ne nsanyaawo nʼamagaali go.

¹¹Ndizikiriza ebibuga ebyʼomu nsi yo era mmenyemenye nʼebigo byo byonna.

¹²Obulogo bwo ndibumalawo era toliddayo kukolima nate.

¹³Nʼebibumbe bye musinza ndibizikiriza. Ne nziggyawo nʼamayinja ge mwawonga; temuliddayo nate kuvuunamira bakatonda be mwekoledde nʼemikono gyammwe.

¹⁴Era ndisigula Baasera okuva mu mmwe, ebibuga byammwe nʼembizikiriza.

¹⁵Era ndyesasuza ku mawanga agataŋŋondedde nʼobusungu nʼekiruyi.”