Mikka 6:1-16 LGCB2014 - Bible AI

¹Muwulire Mukama byʼayogera ngʼagamba nti, “Muyimuke leero tuwoze ensonga zammwe mu maaso gʼensozi, nʼobusozi buwulire bye mugamba.

²Kaakano mmwe ensozi muwulire Mukama kyʼabavunaana; nammwe emisingi gyʼensi egyʼolubeerera muwulire. Mukama alina ensonga ku bantu be era agenda kuwawabira Isirayiri.”

²

³“Mmwe abantu bange kiki kye nnali mbakoze? Nnali mbazitooweredde? Munziremu.

⁴Nabaggya mu nsi ye Misiri ne mbanunula mu nsi eyʼobuddu, ne mbawa Musa, ne Alooni ne Miryamu okubakulembera.

⁵Mmwe abantu bange mujjukire ekigendererwa kya Balaki kabaka wa Mowaabu nʼebigambo, Balamu omwana wa Byoli bye yayogera. Mujjukire bye nabakolera okuva e Sittimu okutuuka e Girugaali mulyoke mumanye ebikolwa bya Mukama ebyʼobutuukirivu.”

⁵

⁶“Mwebuuza nti kiki kye nnaaleeta mu maaso ga Mukama nvuuname mu maaso ga Katonda agulumizibwa? Mmusemberere nʼebiweebwayo ebyokebwa, nʼennyana ezaakamala omwaka ogumu?

⁷Mukama alisiima endiga eza sseddume olukumi, oba emitwalo gyʼemigga gyʼamafuta? Mpeeyo omwana wange omubereberye olwʼebibi byange, nga mpaayo ekibala kyʼomubiri gwange olwʼekibi ekyʼemmeeme yange?

⁸Mukama akulaze, ggwe omuntu, ekirungi kyʼoteekwa okukola. Kaakano, Mukama kiki kyʼakwetaaza, okuggyako okukola ebyʼensonga, okuba nʼekisa era nʼokutambulira mu buwombeefu ne Katonda wo.”

⁸

⁹“Wuliriza, Mukama akoowoola ekibuga mu ddoboozi eryʼomwanguka, kya magezi ddala okutya erinnya lye, nʼokussaayo omwoyo eri okukangavvula nʼeri oyo akangavvula.

¹⁰Nnyinza okwerabira ebyʼobugagga bye mwefunira, mmwe ennyumba erina obutali butuukirivu, erina nʼekigera ekitatuuka ekyʼomuzizo?

¹¹Nnyinza okusonyiwa omuntu alina ebigera ebitatuuse, alina ensawo ezʼebipimo ebyʼobulimba?

¹²Abagagga baakyo bakambwe nʼabatuuze baamu balimba nʼennimi zaabwe tezoogera mazima.

¹³Nange kyenvudde ntandika okukuzikiriza, nkumalewo olwʼebibi byo.

¹⁴Onoolyanga, naye nʼotokutta, era olubuto lwo lulisigala lutokota nga lukubanja. Oligezaako okukuŋŋaanya, weeterekere, naye tolibaako na kimu kyʼotereka kubanga byonna ndibiwaayo eri ekitala.

¹⁵Olisiga naye tolikungula, oligezaako okusogola emizeeyituuni weggyiremu amafuta naye tolifuna mafuta gamala kusaabako, olisogola emizabbibu naye toliggyamu kyakunywa.

¹⁶Olwʼokuba ngʼokolera ku biragiro bya Omuli nʼogoberera nʼebikolwa byonna ebyʼennyumba ya Akabu nʼogoberera nʼemizizo gyabwe, kyendiva nkufuula ekifulukwa, nʼabantu bo bonna babeere ekyʼokuduulirwa era olibaako ekivume kyʼamawanga.”