Mikka 7:1-20 LGCB2014 - Bible AI

¹Ddala zinsanze nze. Ndi ngʼomuntu akungula ebibala okuva mu bifo ebyʼenjawulo ebyʼennimiro yʼemizabbibu; tewali kirimba kya mizabbibu kulyako, wadde emizeeyituuni egisooka okwengera gye njagala ennyo.

²Abantu abatya Katonda, baweddewo mu nsi; tewali nʼomu mulongoofu asigaddewo. Bonna banoonya okuyiwa omusaayi, buli omu anoonya okutega muganda we ekitimba.

³Emikono gyabwe gyombi mikugu mu kukola ebibi; omufuzi asaba ebirabo, nʼomulamuzi alya enguzi, nʼabʼamaanyi mu nsi, beekolera kye baagala nga basala enkwe.

⁴Mu abo bonna asingamu obulungi, afaanana ngʼomweramannyo; asingamu ku mazima yʼasinga olukomera lwʼamaggwa obubi. Naye olunaku lwʼabakuumi bammwe lutuuse, era kino kye kiseera ekyʼokutabukatabuka.

⁵Tewesiga muntu nʼomu, wadde mukwano gwo, newaakubadde mukazi wo, Weegendereze byʼoyogera.

⁶Kubanga omulenzi agaya kitaawe, nʼomuwala alwanyisa nnyina, muka mwana nʼalwanyisa nnyazaala we. Abalabe bʼomuntu, bantu be, abʼomu nju ye bennyini.

⁷Naye nze nnindirira Mukama nga nnina essuubi, nnindirira Katonda Omulokozi wange; Katonda wange anampulira.

⁷

⁸Tonjeeyereza ggwe omulabe wange, kubanga wadde ngudde, nnaayimuka. Ne bwe naatuula mu kizikiza, Mukama anaabeera ekitangaala kyange.

⁹Nnaagumikirizanga Mukama bwʼanaabanga ambonereza, kubanga nnyonoonye mu maaso ge, okutuusa lwʼalimpolereza, nʼanziza buggya. Alindeeta mu kitangaala, era ndiraba obutuukirivu bwe.

¹⁰Olwo omulabe wange alikiraba, nʼaswala, oyo eyanjeeyerezanga ngʼagamba nti, “Ali ludda wa Mukama Katonda wo?” Ndisanyuka ngʼagudde, era alirinnyirirwa ngʼebitoomi ebyʼomu nguudo.

¹¹Olunaku olwʼokuzimba bbugwe wo lulituuka, olunaku olwʼokugaziya ensalo yo.

¹²Mu biro ebyo abantu balijja gyʼoli nga bava mu Bwasuli ne mu bibuga byʼe Misiri, nʼokuva e Misiri okutuuka ku mugga Fulaati, nʼokuva ku nnyanja emu okutuuka ku nnyanja endala, nʼokuva ku lusozi olumu okutuuka ku lusozi olulala.

¹³Ensi erifuuka matongo, olwʼebikolwa byʼabantu abagibeeramu.

¹⁴Lunda abantu bo nʼomuggo gwo, ekisibo kye weeroboza, ababeera bokka mu kibira mu malundiro amagimu. Baleke baliire mu Basani ne Gireyaadi, nga mu biseera ebyʼedda.

¹⁴

¹⁵Nga bwe kyali mu nnaku ze mwaviiramu mu Misiri, nzija kubalaga ebikulu ebyʼekitalo.

¹⁵

¹⁶Amawanga galikiraba ne gakwatibwa ensonyi, ne gamalibwamu amaanyi. Abantu baago balikwata ku mimwa gyabwe nʼamatu gaabwe ne gaziba.

¹⁷Balirya enfuufu ngʼomusota, ngʼebisolo ebyewalula. Balifuluma obunnya bwabwe nga bakankana ne bakyuka okudda eri Mukama Katonda waffe, ne babatya.

¹⁸Katonda ki omulala ali nga ggwe, asonyiwa ekibi era nʼasonyiwa ebyonoono byabo abaasigalawo ku bantu be? Obusungu bwe tebubeerera emirembe gyonna, naye asanyukira okusaasira.

¹⁹Alikyuka nʼatukwatirwa ekisa nate; alirinnyirira ebibi byaffe, nʼasuula ebyonoono byaffe byonna mu buziba bwʼennyanja.

²⁰Olikola ebyʼamazima bye wasuubiza Yakobo, nʼebyekisa bye wasuubiza Ibulayimu, nga bwe weeyama eri bajjajjaffe okuva mu nnaku ezʼedda.