Nakkumu 1:1-15 LGCB2014 - Bible AI

¹ⓐ Kuno kwe kwolesebwa Katonda kwe yalaga Nakkumu, Omwerukoosi okukwata ku bibambulira ebyali bijjira Nineeve.

²Katonda wa buggya era Mukama awalana eggwanga. Mukama awalana eggwanga era ajudde ekiruyi. Mukama yeesasuza ku balabe be era aterekera abamuwakanya obusungu bwe.

³Mukama tatera kusunguwala, ate nga wa maanyi mangi era tayinza nʼakatono butabonereza oyo gwe gusinze. Ekkubo lye liri mu mpewo eyʼakazimu ne mu kibuyaga, nʼebire ye nfuufu yʼebigere bye.

⁴Akangavvula ennyanja nʼagikaza era akaza emigga gyonna, ennimiro ezʼomu Basani zikala, olusozi Kalumeeri lwonna lukayuse, nʼebimuli bya Lebanooni biwotose.

⁵Ensozi zikankanira mu maaso ga Katonda, obusozi ne busaanuuka, ettaka ne lyatikayatika mu maaso ge, ensi nʼekankana nʼabantu bonna abagirimu.

⁶Ani ayinza okuyimirira mu maaso ge ngʼasunguwadde? Ani ayinza okugumira obusungu bwe obwʼamaanyi? Ekiruyi kye kibuubuuka ngʼomuliro, nʼenjazi nʼeziyatikayatika.

⁶

⁷Mukama mulungi, kiddukiro mu kiseera ekyʼokulabiramu ennaku, era alabirira abo bonna abamwesiga.

⁸Naye alisaanyaawo abalabe be mu mataba amazibu, ekizikiza kiribawondera.

⁸

⁹Buli kye mwekobaana okukola Mukama, alikikomya. Akabi tekalijja mulundi gwakubiri.

¹⁰Kubanga baliba ngʼamaggwa agakwataganye, era nga batamidde, balyoke bookebwe omuliro ngʼekisambu ekikalu.

¹¹Mu ggwe Nineeve muvuddemu omuntu alowooza akabi era ateesa ebibi ku Mukama.

¹²Bwʼati bwʼayogera Mukama nti, “Newaakubadde nga balina be bakolagana nabo bangi, ate nga bangi, balizikirizibwa ne baggwaawo. Newaakubadde nga mbabonereza mmwe abantu bange, siriddayo kukikola nate.

¹³Kaakano nzija kumenya ekikoligo kyabwe nkibaggyeko era nʼebibasibye nnaabikutulakutula.”

¹³

¹⁴Kino Mukama kyalagidde ekikwata ku Nineeve: “Erinnya lyo terikyayala nate. Ndizikiriza ekifaananyi ekyole nʼekifaananyi ekisaanuuse ebiri mu masabo gʼabakatonda bo; ndisima entaana yo kubanga oyinze obugwagwa.”

¹⁴

¹⁵ⓑ Yimusa amaaso, tunula ku nsozi, laba, ebigere ebirungi ebyʼoyo aleese amawulire amalungi, alangirira emirembe. Ggwe Yuda kwata embaga zo entukuvu, era otuukirize obweyamo bwo; omubi kaakano takyakulumba, azikiririzibbwa ddala, tolimulaba nate.