Nakkumu 2:1-13 LGCB2014 - Bible AI

¹Nineeve, olumbiddwa omulabe; kuuma ekigo, Kuuma ekkubo, weesibire ddala onywere mu kiwato, kuŋŋaanya amaanyi go gonna.

²Kubanga Mukama alizzaawo ekitiibwa kya Yakobo, kibe ngʼekitiibwa kya Isirayiri, newaakubadde ngʼabazikiriza baabasaanyawo, ne boonoona emizabbibu gyabwe.

³Engabo zʼeggye erikutabadde zonna myufu nʼengoye ze bambadde nazo bwe zityo. Amagaali gʼebyuuma gamasamasa ku lunaku lwe gategekebwa, era nʼamafumu gagalulwa mu ngeri eyʼentiisa!

⁴Amagaali gʼabalwanyi gatayira mu nguudo, gadda eno nʼeri, galabika ngʼemimuli egyaka, gamyansa ngʼeggulu.

⁴

⁵Omuduumizi bwʼayita abalwanyi be bajja bagwirana. Badduka mbiro ku bbugwe wʼe kibuga we beetegekera okwerwanako.

⁶Enzigi ezʼomugga zigguddwawo, amazzi ne gasaanyaawo olubiri.

⁷Etteeka lyayisibwa ku kibuga nti kiriwaŋŋangusibwa, abaddu abakazi bakungubaga ngʼamayiba, nga bwe beekuba mu bifuba.

⁸Abʼomu Nineeve bafaanana ngʼekidiba ekyʼamazzi agakalira. Wadde nga babakoowoola nti, “Muyimirire, muyimirire!” bo beeyongerayo bweyongezi.

⁹Ffeeza yaakyo temugirekaawo, ne zaabu nayo mugitwalire ddala, omunyago teguggwaayo, ebyʼobugagga byakyo ebitabalika ebirungi ddala.

¹⁰Ekibuga kisigadde kyangaala! Abantu bonna emitima gibeewanise, emibiri gibakankana, amaviivi gabakubagana, basiiwuuse ne mu maaso.

¹⁰

¹¹Eri ludda wa empuku yʼempologoma, ekifo we ziriisiza empologoma zaazo ento, empologoma ensajja, nʼenkazi, nʼento we zaatambuliranga nga tewali kizikanga?

¹²Empologoma ensajja yayigganga ennyama yʼabaana ebamala, nʼenkazi nʼezittira eyaazo, nʼejjuza empuku nʼomuyiggo, ne mu bisulo ne mujjula ennyama;

¹²

¹³“Laba nze Mukama owʼEggye nkwolekedde, era ndyokya amagaali go gonna ne ganyooka, nʼekitala kirizikiriza empologoma zo ento. Era tolifuna munyago mulala nate ku nsi, nʼeddoboozi lyʼababaka bo teririddayo kuwulirwa.”