Nekkemiya 1:1-11 LGCB2014 - Bible AI

¹Ebigambo bya Nekkemiya mutabani wa Kakaliya: Awo mu mwezi gwa Kisuleevu mu mwaka ogwʼamakumi abiri[1] bwe nnali nga ndi mu lubiri mu kibuga ekikulu ekya Susani,[2]

²Kanani, omu ku baganda bange, nʼajja nʼabamu ku basajja okuva mu Yuda, ne mubuuza ku bikwata ku kitundu kya Bayudaaya ekyasigalawo, ne ku bifa mu Yerusaalemi.

³Ne bantegeeza nti, “Abaawaŋŋangusibwa abaddayo mu ssaza[3] bali mu kabi kanene ne mu nnaku nnyingi; bbugwe wa Yerusaalemi yamenyebwa, era ne wankaaki waakyo yayokebwa omuliro.”

⁴Awo bwe nawulira ebigambo ebyo, ne ntuula wansi ne nkaaba, ne mmala ebiro nga nnakuwadde, nga nsiiba era nga nsaba mu maaso ga Katonda wʼeggulu.

⁵Ne njogera nti,

⁵“Ayi Mukama Katonda wʼeggulu, Katonda omukulu owʼentiisa, akuuma endagaano ye, era ayagala abo abagondera amateeka ge.

⁶Ozibule amaaso go, otege okutu okuwulira okusaba kwʼomuddu wo kwe nsaba mu maaso go emisana nʼekiro ku lwa baddu bo abantu ba Isirayiri. Njatula ebibi bye twakola, ffe Abayisirayiri, nga nange nʼennyumba ya kitange mwe tuli.

⁷Twasobya mu maaso go, ne tutagoberera mateeka go nʼebiragiro byo bye watuma omuddu wo Musa.”

⁸ⓐ “Jjukira ebiragiro bye wawa omuddu wo Musa, ngʼoyogera nti, Bwe mutaabeerenga beesigwa, ndibasaasaanya mu mawanga,

⁹ⓑ naye bwe mulikyuka ne mukomawo gye ndi, ne mugondera amateeka gange, abantu bammwe abaawaŋŋangusibwa ne bwe banaabeeranga ku nkomerero yʼeggulu, ndibakuŋŋaanyayo ne mbaleeta mu kifo kye neeroboza okubeerangamu Erinnya lyange.”

¹⁰Abo be baddu bo era be bantu bo be wanunula nʼamaanyi go amangi era nʼomukono gwo ogwʼamaanyi.

¹¹Ayi Mukama, otege okutu eri okusaba kwʼomuddu wo nʼeri okusaba kwʼabaddu bo abatya erinnya lyo. Omuddu wo omusobozese okulaba ekisa mu maaso gʼomusajja ono.

¹¹Ebiro ebyo nnali musenero wa kabaka.