Nekkemiya 2:1-20 LGCB2014 - Bible AI

¹Awo mu mwezi gwa Nisani mu mwaka ogwʼamakumi abiri ku mulembe gwa Kabaka Alutagizerugizi[4], nga bamuleetedde wayini, ne nzirira wayini ne muwa kabaka. Nnali sinakuwalirangako mu maaso ge.

²Kabaka nʼambuuza nti, “Kiki ekikunakuwazizza otyo ngʼomulwadde? Kino si kigambo kirala wabula obuyinike obwʼomu mutima.”

²Ne ntya nnyo,

³ⓒ naye ne ŋŋamba kabaka nti, “Kabaka abeere omulamu emirembe gyonna. Lwaki sinakuwala ngʼekibuga bajjajjange gye baaziikibwa kizise, nga ne wankaaki waakyo yayokebwa omuliro?”

⁴Kabaka nʼambuuza nti, “Kiki kyʼoyagala?” Awo ne nsaba eri Katonda wʼeggulu,

⁵nʼoluvannyuma ne nziramu kabaka nti, “Kabaka bwʼanasiima, era omuddu wo bwʼanaalaba ekisa mu maaso go, ansindike ŋŋende mu Yuda, mu kibuga bajjajjange gye baaziikibwa, nkiddaabirize.”

⁶Awo kabaka, ne mukyala we ngʼamuli ku lusegere, nʼambuuza nti, “Olugendo lwo luliba lwa nnaku meka, era olidda ddi?” Kabaka nʼasiima okuntuma, ne neegerera ekiseera.

⁷Ne nsaba kabaka nti, “Kabaka bwʼanaasiima, awandiikire abaamasaza abali emitala wʼomugga Fulaati ebbaluwa, ntambule mirembe okutuuka mu Yuda.

⁸Ate era nsaba ebbaluwa gye nnaatwalira Asafu omukuumi wʼekibira kya kabaka, ampe emiti gye ndikolamu embaawo ezʼokubajjamu enzigi za yeekaalu, nʼeza wankaaki wa bbugwe wʼekibuga, nʼekifo we nnaabeeranga.” Olwʼomukono gwa Katonda wange ogwali nange, kabaka nʼampa bye namusaba.

⁹Awo ne ndaga eri abaamasaza abaali emitala wʼomugga Fulaati ne mbakwasa ebbaluwa eziva ewa kabaka. Kabaka yampa abakungu bʼeggye nʼabeebagala embalaasi okumperekerako.

¹⁰Naye Sanubalaati[5] Omukoloni ne Tobiya omukungu Omwamoni bwe baakiwulira, ne banyiiga nnyo bwe baamanya nga waliwo omuntu afuddeyo ku mbeera yʼabaana ba Isirayiri.

¹¹Ne ntuuka e Yerusaalemi, ne mbeerayo ennaku ssatu,

¹²ne ngolokoka mu kiro ne ntambulatambula nʼabamu ku basajja, naye ne sibuulira muntu nʼomu ku ebyo Katonda wange bye yali atadde ku mutima gwange okukolera Yerusaalemi. Twagenda nʼensolo emu yokka gye nnali neebagadde.

¹³Ekiro ekyo ne mpita mu Mulyango ogwʼomu Kiwonvu[6] ne njolekera Oluzzi olwʼOmusege, nʼOmulyango ogwʼObusa,[7] ne ŋŋenda nga neetegereza bbugwe wa Yerusaalemi eyali amenyeddwa, ne wankaaki waakyo eyayokebwa omuliro.

¹⁴Nʼoluvannyuma ne neyongerayo eri Omulyango ogwʼOluzzi nʼeri Ekidiba kya Kabaka, naye ensolo yange nʼeteyinza kuyitawo.

¹⁵Kyennava nserengeta mu kiwonvu ekiro nga ŋŋenda neetegereza bbugwe. Bwe namaliriza ne nkyuka ne nkomawo nga mpitira mu Mulyango ogwʼomu Kiwonvu.

¹⁶Abakungu tebaamanya gye nnali ndaze newaakubadde kye nnali nkola; era nnali sinnabuulirako Bayudaaya newaakubadde bakabona, newaakubadde abakungu newaakubadde abakulu, nʼabalala abaali bateekwa okukola omulimu.

¹⁷Awo ne mbagamba nti, “Mulaba akabi ke tulimu; Yerusaalemi kizise, ne wankaaki waakyo ayokeddwa omuliro. Mujje tuddaabirize bbugwe wa Yerusaalemi tuve mu buswavu bwe tulimu.”

¹⁸Ne mbategeeza omukono gwa Katonda ogwʼekisa bye gwali gunkoledde, ne kabaka bye yaŋŋamba. Ne baddamu nti, “Tugolokoke tutandike okuzimba.”

¹⁸Era ne batandika omulimu.

¹⁹Naye Sanubalaati Omukoloni, ne Tobiya omukungu Omwamoni ne Gesemu Omuwalabu bwe baakiwulira ne batunyooma nʼokutusekerera ne batusekerera. Ne batubuuza nti, “Kiki kye mukola? Mwagala kujeemera kabaka?”

²⁰Ne mbaddamu nti, “Katonda wʼeggulu alituyamba okukituukiriza, era ffe abaddu be tulitandika okuzimba, naye mmwe temulina mugabo newaakubadde obusika newaakubadde ekijjukizo mu Yerusaalemi.”