Nekkemiya 6:1-19 LGCB2014 - Bible AI

¹Awo Sanubalaati, ne Tobiya ne Gesemu Omuwalabu nʼabalabe baffe abalala bwe baawulira nga nzimbye bbugwe era nga tewali mabanga gaasigalamu, newaakubadde nga twali tetunateekamu nzigi mu miryango,

²Sanubalaati ne Gesemu ne bampeereza obubaka nti, “Jjangu tusisinkane mu kyalo ekimu ekyʼomu lusenyi lwa Ono.”

²Naye ekigendererwa kyabwe kyali kundeetako kabi.

³Kyennava mbatumira ababaka okubategeeza nti, “Nnina omulimu munene, siisobole kuserengeta gye muli. Lwaki ndeka omulimu ne nzija okubasisinkana?”

⁴Ne baweereza obubaka bwe bumu emirundi ena, buli mulundi ne mbaddangamu mu ngeri yʼemu.

⁵Awo Sanubalaati nʼantumira omuddu we omulundi ogwokutaano nʼebbaluwa etaali nsibe mu mukono gwe,

⁶ngʼerimu ebigambo bino nti,

⁶“Tuwulidde mu mawanga, era ne Gesemu akirinako obukakafu, nga ggwe nʼAbayudaaya, mweteeseteese okujeema era kyemuvudde muzimba bbugwe, era nʼolugambo luyitayita nga ggwe olina enteekateeka eyʼokufuuka kabaka waabwe.

⁷Kigambibwa nga walonda bannabbi mu Yerusaalemi okukulangiririra nti, ‘Mu Yuda mulimu kabaka.’ Noolwekyo obubaka obwo nga tebunatwalibwa eri kabaka, jjangu tukkiriziganye ku nsonga eyo.”

⁸Ne muweereza obubaka nga ŋŋamba nti, “Tewabanga kigambo bwe kityo ku byoyogedde; ogunja bigunje okuva mu mutima gwo.”

⁹Bonna baali bagezaako okututiisatiisa, nga balowooza nti, “Emikono gyabwe girinafuwa omulimu ne gulema okuggwa.” Naye ne nsaba nti, “Ayi Katonda, nyweza emikono gyaffe.”

¹⁰Olunaku olumu ne ŋŋenda mu nnyumba ya Semaaya mutabani wa Deraaya, muzzukulu wa Meketaberi; yali yeesibidde mu nnyumba, nʼaŋŋamba nti, “Tusisinkane mu nnyumba ya Katonda, mu yeekaalu munda, tuggalewo enzigi za yeekaalu, kubanga bajja okukutta, ekiro kino bajja kukutta.”

¹¹Naye ne nziramu nti, “Omusajja nga nze nnyinza okudduka? Kiki ekitwala omusajja afaanana nga nze[10] mu yeekaalu okuwonya obulamu bwange? Sijja kugenda yo.”

¹²Ne nkizuula nga Katonda yali tamutumye, naye yali antegeeza ebigambo ebyo kubanga Tobiya ne Sanubalaati baamugulirira.

¹³Bamugulirira okuntiisatiisa nʼokunkozesa ekyo nnyonoone, balyoke boonoone erinnya lyange nga banjogerako ebigambo ebya swakaba.

¹⁴Ayi Katonda wange ojjukire Tobiya ne Sanubalaati olwʼebikolwa ebyo, era ojjukire ne Nowadiya nnabbi omukazi ne bannabbi abalala abaagezaako okuntiisatiisa.

¹⁵Bbugwe nʼaggwa okukola ku lunaku olwʼamakumi abiri mu etaano mu mwezi ogwa Eruli, mu nnaku amakumi ataano mu bbiri.

¹⁶Abalabe baffe bonna bwe baakiwulira, amawanga gonna agaali gatwetoolodde ne bamulaba, ne batya era ne baggwaamu omwoyo, kubanga baalaba ngʼomulimu gwakolebwa olwʼokubeerwa kwa Katonda waffe.

¹⁷Ate era mu biro ebyo abakungu ba Yuda baaweerezanga ebbaluwa eri Tobiya. Tobiya nʼaziddangamu.

¹⁸Bangi ku bo mu Yuda abaamulayirira, kubanga yali mukoddomi wa Sekaniya mutabani wa Ala, ate nga ne mutabani we Yekokanani yali awasizza muwala wa Mesullamu mutabani wa Berekiya.

¹⁹Baamuwaanawaananga mu maaso gange, nʼoluvannyuma ne bamutegeeza bye nayogeranga. Tobiya nʼaweerezanga ebbaluwa okuntiisatiisa.