Nekkemiya 8:1-18 LGCB2014 - Bible AI

¹Awo mu mwezi ogwʼomusanvu, abantu bonna nga bassa kimu ne bakuŋŋaanira mu kifo ekigazi ekyali mu maaso gʼOmulyango gwʼAmazzi. Ne bagamba Ezera omuwandiisi, okuleeta Ekitabo kyʼAmateeka ga Musa, Mukama ge yalagira Isirayiri.

²Ku lunaku olwʼolubereberye olwʼomwezi ogwʼomusanvu, Ezera kabona nʼaleeta Ekitabo kyʼAmateeka mu maaso gʼekibiina ekyalimu abasajja nʼabakazi nʼabalala abaali basobola okutegeera.

³Nʼakisomera mu kifo ekigazi mu maaso gʼOmulyango gwʼAmazzi mu ddoboozi eryʼomwanguka, okuva ku makya okutuusa essaawa mukaaga ezʼomu tuntu, mu maaso gʼabasajja nʼabakazi nʼabalala abasobola okutegeera. Abantu bonna ne batega amatu okuwulira ebyava mu Kitabo kyʼAmateeka.

⁴Ezera omuwandiisi nʼayimirira ku kituuti ekyʼembaawo kye baazimbira omukolo ogwo. Mattisiya, ne Sema, ne Anaya, ne Uliya, ne Kirukiya ne Maaseya be baamuliraana ku mukono gwe ogwa ddyo, ate Pedaya, ne Misayeri, ne Malukiya, ne Kasimu, ne Kasubaddana, ne Zekkaliya ne Mesullamu be baamuliraana ku mukono gwe ogwa kkono.

⁵Awo Ezera nʼabikkula ekitabo, abantu bonna nga bamutunuulidde kubanga ekifo we yali ayimiridde kyali waggulu wʼabantu bonna, era bwe yali ngʼayanjuluza ekitabo, abantu bonna ne bayimirira.

⁶Ezera ne yeebaza Mukama Katonda omukulu; abantu bonna ne bayimusa emikono gyabwe ne baddamu nti, “Amiina! Amiina!” Ne bavuunama amaaso gaabwe ku ttaka ne basinza Mukama.

⁷Yesuwa, ne Baani, ne Serebiya, ne Yamini, ne Akkubu, ne Sabbesayi, ne Kodiya, ne Masseya, ne Kerita, ne Azaliya, ne Yozabadi, ne Kanani ne Peraya, Abaleevi ne bannyonnyola abantu Amateeka, abantu nga bayimiridde mu bifo byabwe.

⁸Ne basoma mu Kitabo kyʼAmateeka ga Katonda, nga bataputa, era nga bannyonnyola amakulu, abantu bategeere ebyasomebwa.

⁹Naye Nekkemiya owessaza, ne Ezera kabona era omuwandiisi, nʼAbaleevi abaali bayigiriza abantu, ne bagamba abantu bonna nti, “Olunaku lwa leero lutukuvu eri Mukama Katonda wammwe; temunakuwala so temukaaba.”

¹⁰Nekkemiya nʼabagamba nti, “Mugende mulye ebyassava, munywe nʼebiwoomerera, muweerezeeko nʼabo abatalina kye bateeseteese. Leero lunaku lutukuvu eri Mukama, temunakuwala, kubanga essanyu eriva eri Mukama ge maanyi gammwe.”

¹¹Awo Abaleevi ne bakkakkanya abantu bonna, nga boogera nti, “Mubeere bakkakkamu kubanga leero lunaku lutukuvu. Temunakuwala.”

¹²Oluvannyuma abantu bonna ne beddirayo ewaabwe ne balya ne banywa ne baweerezaako ne bannaabwe abatalina kyakulya, era ne basanyuka nnyo, kubanga baategeera amakulu gʼebigambo ebyabategeezebwa.

¹³Ku lunaku olwokubiri olwʼomwezi ogwo, abakulu bʼennyumba awamu ne bakabona nʼAbaleevi, ne bakuŋŋaanira eri Ezera omuwandiisi okusoma nʼokutegeera ebigambo byʼAmateeka.

¹⁴ⓗ Ne basanga mu byawandiikibwa mu Mateeka, Mukama ge yalagira Musa, nga Abayisirayiri baali bateekwa okusulanga mu weema mu biseera ebyʼembaga eyʼomwezi ogwʼomusanvu,

¹⁵ⓘ era nga kibagwanidde okubunyisa amawulire ago nʼokulangirira mu bibuga byabwe byonna ne mu Yerusaalemi, nga boogera nti, “Mugende mu nsozi mukuŋŋaanye amatabi agʼemizeeyituuni nʼago agʼemizeeyituuni egyʼomu nsiko, nʼagʼemikadasi,[11] nʼagʼenkindu, nʼagʼemiti emirala egirina ebikoola ebingi okuzimba weema nga bwe kyawandiikibwa.”

¹⁶Awo abantu ne bagenda ne bagaleeta ne beezimbira weema, abamu ku busolya bwabwe, ne mu mpya zaabwe, ne mu luggya lwʼennyumba ya Katonda, ne mu kibangirizi okuliraana Omulyango gwʼAmazzi, ne mu kibangirizi okuliraana Omulyango gwa Efulayimu.

¹⁷Awo ekibiina kyonna ekyakomawo okuva mu buwaŋŋanguse, ne beezimbira weema ne babeera omwo; kubanga okuva mu biro bya Yesuwa[12] mutabani wa Nuuni okutuusa ku lunaku olwo, Abayisirayiri baali tebakwatanga kiseera ekyo bwe batyo. Ne basanyuka nnyo nnyini.

¹⁸Buli lunaku, Ezera nʼasomanga mu Kitabo kyʼAmateeka ga Katonda okuva ku lunaku olwasooka okutuusa ku lunaku olwasembayo. Ne bakwata embaga okumala ennaku musanvu, ne ku lunaku olwʼomunaana, ne bakola olukuŋŋaana, ngʼekiragiro bwe kiri.