Okubala 11:1-35 LGCB2014 - Bible AI

¹Awo abantu ne beemulugunya olwʼebizibu byabwe nga ne Mukama awulira; bwe yabawulira obusungu bwe ne bubuubuuka. Omuliro ne guva eri Mukama ne gwakira mu bo, ne gwokya ebitundu ebimu ebyali bikomererayo ebyʼolusiisira lwabwe.

²Abantu ne bakaabirira Musa; Musa nʼasaba Mukama, omuliro ne guzikira.

³Ekifo ekyo ne kituumibwa erinnya Tabera, kubanga omuliro ogwava eri Mukama gwabaakiramu.

⁴Abagwira abaali beetabudde mu baana ba Isirayiri ne baluluunkanira ebyokulya; nʼabaana ba Isirayiri nabo ne bongera okukaaba nga bwe bagamba nti, “Singa nno tufuna ku nnyama ne tulyako!

⁵Tukyajjukira ebyennyanja bye twalyanga mu Misiri nga tewali na kye tubisasulidde, ne wujju nʼensujju, nʼenderema nʼobutungulu ne katungulukyumu nʼebyokuliira.

⁶Naye kaakano nʼokwoya emmere kutuweddemu, buli we tukuba eriiso tulaba mmaanu eno!”

⁷ⓚ Emmaanu yafaanananga ngʼensigo za koliyanda, nga nʼekifaananyi kyayo kiri ngʼekya bideriamu.

⁸Abantu baagendanga ne bagikuŋŋaanya ne bagiseera ku lubengo oba ne bagisekulira mu binu, ne bagifumba mu ntamu oba ne bakolamu bukeeke. Nga mu kamwa ebanga ekoleddwa nʼamafuta ga zeyituuni.

⁹Omusulo bwe gwagwanga mu lusiisira ekiro nʼemmaanu nayo nʼegwa nagwo.

¹⁰Musa nʼawulira abantu aba buli luggya nga bakaaba, buli omu ngʼakaabira mu muzigo gwʼeweema ye; obusungu bwa Mukama Katonda ne bubuubuuka nnyo, ne Musa nʼasoberwa nʼanyiikaala.

¹¹Musa nʼagamba Mukama Katonda nti, “Lwaki oleetedde omuddu wo obuzibu buno? Nkoze ki ekitakusanyusizza ne kikuleetera okwetikka omugugu gwʼabantu bano bonna?

¹²Nze nali olubuto omwali abantu bano bonna? Nze nabazaala? Lwaki oŋŋamba okubasitula mu mikono gyange ngʼomulezi wʼabaana bwʼasitula omwana omuwere mbatwale mu nsi gye wabasuubiza ngʼogirayirira bajjajjaabwe?

¹³Ennyama abantu bano bonna gye banaalya nnaagiggya wa? Kubanga baneetayirira nga bankaabirira nti, ‘Tuwe ennyama tulye!’

¹⁴Sisobola kusitula bantu bano bonna bwʼomu kubanga obuzito bwabwe buyinza okummenya nga ndi nzekka.

¹⁵Obanga bwʼotyo bwʼojja okumpisa, ate nga bulijjo ondaga ekisa kyo, kale nno nzitiraawo kaakano oleme kundeka ne neereetera okwezikiriza.”

¹⁶Mukama nʼagamba Musa nti, “Nfunira abasajja nsanvu mu bakulu ba Isirayiri bʼomanyi nga be bakulu bʼabantu era nga be bakulembeze baabwe obaleete ku Weema ya Mukama eyʼOkukuŋŋaanirangamu, bayimirire awo naawe.

¹⁷Nzija kukka awo njogere naawe; era nzija kutoola ku mwoyo oguli mu ggwe ngubateekemu, balyokenga bakusitulireko omugugu gwʼabantu oleme kugwetikkanga wekka.

¹⁸“Abantu bagambe nti, ‘Mwetukuze nga mwetegekera olunaku lwʼenkya, lwe mujja okulya ennyama. Kubanga Mukama Katonda yabawulira nga mumukaabirira bwe muti nti, “Singa tufunye ku nnyama ne tulyako! Bwe twali mu Misiri twali bulungi!” Noolwekyo Mukama ajja kubawa ennyama mugirye.

¹⁹Temugenda kugirya mu lunaku lumu, oba mu nnaku bbiri, oba mu nnaku ttaano, oba mu nnaku kkumi, oba nnaku abiri;

²⁰naye kumala mwezi mulambirira, okutuusa lwʼerifulumira mu nnyindo zammwe nʼebanyiwa, kubanga mwesamudde Mukama Katonda abeera mu mmwe, ne mumukaabirira nga mugamba nti, “Mu Misiri twaviirayo ki?” ’ ”

²¹Musa nʼagamba nti, “Abantu bano mwe ndi bawera omuwendo gwa mitwalo nkaaga abatambuza ebigere, naawe ogamba nti, ‘Nzija kubawa ennyama gye banaalya okumala omwezi mulamba!’

²²Ebisolo ebiri mu biraalo ne mu bisibo bwe binattibwa binaabamala? Nantiki ebyennyanja byonna ebyʼomu nnyanja bwe binaavubibwa ne bibaweebwa, binaabamala?”

²³Mukama nʼagamba Musa nti, “Omukono gwa Mukama Katonda guyimpawadde? Kaakano ojja kulaba obanga ekigambo kyange kye nkugambye kinaatuukirira oba tekiituukirire.”

²⁴Awo Musa nʼafuluma nʼategeeza abantu ebigambo bya Mukama Katonda; nʼakuŋŋaanya abasajja nsanvu mu bakulembeze bʼabantu nʼabayimiriza okumpi ne Weema ya Mukama.

²⁵Awo Mukama Katonda nʼakkira mu kire nʼayogera ne Musa, nʼaddira ku mwoyo ogwali mu Musa nʼagussa mu bakulembeze ensanvu. Omwoyo bwe baagufuna ne batandika okutegeeza obunnabbi, kyokka tebaddayo nate kukikola.

²⁶Waaliwo abasajja babiri nga bayitibwa Eridaadi ne Medadi, baali babaliddwa ku bakulembeze ensanvu, naye bo ne basigala mu lusiisira, ne batagenda ku Weema ya Mukama; nabo baafuna omwoyo, era ne bategeeza obunnabbi mu lusiisira.

²⁷Omuvubuka nʼadduka nʼagenda ategeeza Musa nti, “Eridaadi ne Medadi bategeeza obunnabbi mu lusiisira.”

²⁸Awo Yoswa mutabani wa Nuuni, omuweereza wa Musa gwe yali yeerondedde ngʼakyali muvubuka nʼagamba nti, “Mukama wange Musa, baziyize.”

²⁹Naye Musa nʼamugamba nti, “Okwatiddwa obuggya ku lwange? Kyandibadde kirungi singa abantu ba Mukama bonna bannabbi, ne Mukama Katonda nʼabawa omwoyo gwe!”

³⁰Musa nʼabakulembeze ba Isirayiri ne baddayo mu lusiisira.

³¹Awo empewo nʼeva eri Mukama Katonda nʼereeta obugubi nga buva mu nnyanja ne bugwa okwebungulula olusiisira nga bukoze entuumo nga ya mita emu okuva ku ttaka, nga bujjuza ebbanga lya lugendo lwa lunaku lumu ku ludda olumu olwʼolusiisira nʼolugendo lwa lunaku lumu ku ludda olulala.

³²Ku lunaku olwo ne ku lunaku olwaddirira abantu ne bakuŋŋaanya obugubi emisana nʼekiro. Tewali yakuŋŋaanya buzito bwakka wansi wa kilo lukumi; ne babwanika buli wantu mu lusiisira.

³³Naye ennyama yali ekyali mu mannyo gaabwe nga tebannaba kugirya, obusungu bwa Mukama Katonda ne bubuubuukira abantu nʼabaleetera kawumpuli owʼamaanyi ennyo.

³⁴Noolwekyo ekifo ekyo kyekyava kituumibwa Kiberosukatava, kubanga awo we baaziika abantu abaalina omulugube.

³⁵Abantu bwe baava e Kiberosukatava ne batambula okutuuka e Kazerosi ne babeera awo.