Okubala 12:1-16 LGCB2014 - Bible AI

¹Awo Miryamu ne Alooni ne boogera nga bawakanya Musa olwʼomukazi Omukuusi gwe yali awasizza, kubanga yali awasizza Mukuusi.

²Ne bagamba nti, “Naye ddala Mukama bwe yayogeranga yayitanga mu Musa yekka? Mu ffe namwo teyayogereramu?” Mukama Katonda nʼabiwulira.

³Naye nno, Musa yali musajja muwombeefu nnyo, nga muteefu okusinga abantu bonna abaali ku nsi.

⁴Amangwago Mukama nʼayogera ne Musa, ne Alooni ne Miryamu nʼabagamba nti, “Mujje, mwensatule, mu Weema ya Mukama eyʼOkukuŋŋaanirangamu.” Bonsatule ne bagenda.

⁵Mukama Katonda nʼakkira mu mpagi eyʼekire, nʼayimirira ku mulyango gwa Weema nʼayita Alooni ne Miryamu. Bombi bwe baasembera

⁶nʼabagamba nti, “Muwulirize ebigambo byange:

⁶Mu mmwe bwe mubaamu nnabbi wa Mukama Katonda, Nneeraga gyʼali mu kulabikirwa, oba njogera naye mu birooto.

⁷ⓛ Naye ekyo si bwe kiri ku muddu wange Musa; mu nju yange yonna, muntu mwesigwa.

⁸Bwe mba njogera naye tutunulagana maaso na maaso, njogera butereevu so si mu ngero; alaba ekifaananyi kya Mukama Katonda. Kale, lwaki temwatidde okuwakanya omuddu wange Musa?”

⁹Obusungu bwa Mukama Katonda ne bubabuubuukira, nʼabaviira.

¹⁰Ekire bwe kyasituka okuva ku Weema, era laba, Miryamu nʼagengewala, nʼatukula ngʼomuzira. Alooni nʼamukyukira nʼalaba ngʼagengewadde;

¹¹nʼagamba Musa nti, “Nkwegayirira, mukama wange, oleme kututeekako kibi kino kye tukoze mu busirusiru bwaffe.

¹²Tomuleka omubiri gwe okufaanana ngʼogwʼomwana omuwere azaalibwa ngʼali ngʼafudde, ngʼomubiri gwe guweddemu ensa.”

¹³Musa nʼakaabirira Mukama ngʼagamba nti, “Ayi Katonda, nkwegayirira omuwonye.”

¹⁴Mukama Katonda nʼaddamu Musa nti, “Singa kitaawe amuwandidde amalusu mu maaso, teyandibadde muswavu okumala ennaku musanvu? Kale mumusibire ebweru wʼolusiisira okumala ennaku musanvu; bwe zinaggwaako ayinza okukomezebwawo.”

¹⁵Bwʼatyo Miryamu nʼasibirwa ebweru wʼolusiisira okumala ennaku musanvu; abantu ne batasitula kutambula okutuusa Miryamu lwe yakomezebwawo.

¹⁶Ebyo bwe byaggwa abantu ne basitula okuva e Kazerosi ne batambula okutuusa lwe baasiisira mu ddungu lya Palani.