Okubala 13:1-33 LGCB2014 - Bible AI

¹Awo Mukama Katonda nʼagamba Musa nti,

²“Tuma abasajja bagende bakette beetegereze ensi ya Kanani gye ŋŋenda okuwa abaana ba Isirayiri. Mu buli kika kya bajjajja ojja kulondamu omusajja omu ku bakulembeze baakyo.”

³Bwʼatyo Musa nʼabatuma okuva mu ddungu lya Palani, ngʼekiragiro kya Mukama Katonda bwe kyali. Bonna baali bakulembeze ba baana ba Isirayiri.

⁴Amannya gaabwe ge gano:

⁴Eyava mu kika kya Lewubeeni yali Semuwa mutabani wa Zakula.

⁵Eyava mu kika kya Simyoni yali Safati mutabani wa Koli.

⁵

⁶Eyava mu kika kya Yuda yali Kalebu mutabani wa Yefune.

⁶

⁷Eyava mu kika kya Isakaali yali Igali mutabani wa Yusufu.

⁷

⁸Eyava mu kika kya Efulayimu yali Koseya mutabani wa Nuuni.

⁸

⁹Eyava mu kika kya Benyamini yali Paluti mutabani wa Lafu.

⁹

¹⁰Eyava mu kika kya Zebbulooni yali Gadyeri mutabani wa Sodi.

¹⁰

¹¹Eyava mu kika kya Manase, kyʼekika kya Yusufu, yali Gaadi mutabani wa Susi.

¹¹

¹²Eyava mu kika kya Ddaani yali Ammiyeri mutabani wa Gemali.

¹²

¹³Eyava mu kika kya Aseri yali Sesula mutabani wa Mikaeri.

¹³

¹⁴Eyava mu kika kya Nafutaali yali Nakabi mutabani wa Vofesi.

¹⁴

¹⁵Eyava mu kika kya Gaadi yali Geweri mutabani wa Maki.

¹⁶Ago ge mannya agʼabasajja Musa be yatuma okugenda okuketta nʼokwetegereza ensi eyo. Musa yali atuumye Koseya mutabani wa Nuuni erinnya Yoswa.

¹⁷Musa nʼabatuma okuketta nʼokwetegereza ensi ya Kanani, nʼabagamba nti, “Mwambuke nga muyita mu Negebu muggukire mu nsi eyʼensozi.

¹⁸Mwetegerezenga ensi nga bwʼefaanana, nʼabantu baamu nga bwe bali, obanga ba maanyi oba banafu, obanga bangi oba batono.

¹⁹Mulyetegereza obanga ensi mwe babeera nnungi oba mbi. Era muliraba ebibuga byabwe obanga tebiriiko bisenge bya bbugwe oba byetooloddwa bigo.

²⁰Mulikebera okulaba obanga ensi yaabwe ngimu oba nkalu, era obanga erimu emiti mingi oba temuli. Mwenywezanga ne muleetayo ku bibala ebyʼomu nsi eyo.” Ekyo kye kyali ekiseera ezabbibu nga zaakatandika okwengera.

²¹Awo ne bambuka ne beetegereza ensi okuva mu ddungu lya Zini okutuuka e Lekobu okumpi nʼawayingirirwa mu Kamasi.

²²Ne bambuka mu Negebu ne batuuka e Kebbulooni, era wano Akimaani ne Sesayi ne Talumaayi abazzukulu ba Anaki nga we babeera. Kebbulooni bwe kyamala okuzimbibwa waayitawo emyaka musanvu ne Zowani ekyʼomu Misiri nakyo ne kiryoka kizimbibwa.

²³Ne batuuka mu kiwonvu ekiyitibwa Esukoli[9] ne batemamu ettabi limu eryaliko ekirimba kimu ekya zabbibu, abantu babiri ne bakireetera ku musituliro. Era ne baleeta ne ku makomamawanga ne ku ttiini.

²⁴Ekifo ekyo ne kiyitibwa Ekiwonvu kya Esukoli, olwʼekirimba ekyo abaana ba Isirayiri kye baatemamu.

²⁵Awo nga wayiseewo ennaku amakumi ana ne bakomawo nga bamaze okuketta ensi.

²⁶Ne bajja eri Musa ne Alooni e Kadesi mu ddungu lya Palani. Ne babakomezaawo obubaka nʼeri ekibiina kyonna, era ne babanjulira ebibala bye baggya mu nsi eyo.

²⁷Ne bategeeza Musa nti, “Twatuuka mu nsi gye watutumamu: ekulukuta amata nʼomubisi gwʼenjuki, ejjudde ebirungi ebyereere, era bino bye bibala byamu.

²⁸Naye nno abantu ababeera mu nsi omwo ba maanyi, nʼebibuga byabwe binene nnyo era byetooloddwako ebigo. Ate nʼekirala twalabaayo nʼabazzukulu ba Anaki.

²⁹Abamaleki babeera mu Negebu mu bukiikaddyo; Abakiiti nʼAbayebusi, nʼAbamoli babeera mu nsi eyʼensozi; nʼAbakanani ne babeera okumpi nʼennyanja ne ku lubalama lwʼomugga Yoludaani.”

³⁰Awo Kalebu nʼasirisa abantu awali Musa nʼagamba nti, “Twambukirewo kaakano tutwale ensi eyo, kubanga ndaba nga tusobola okugiwangula.”

³¹Kyokka abaagenda ne Kalebu okuketta ne baddamu nti, “Abantu bali tetubasobola, batusinga amaanyi.”

³²Bwe batyo ne babunya mu baana ba Isirayiri alipoota etaali nnungi ngʼefa ku nsi gye baali bagenze okuketta; nga bagamba nti, “Ensi gye twayitaayitamu nga tugiketta tesobola na kuliisa bantu baayo abagituulamu; ate nʼabantu bonna be twalabamu baali ba kiwago.

³³Twalabayo nʼAbanefisi, abazzukulu ba Anaki abava mu Banefiri. Bwe twetunulako nga tuli ngʼobwacaaka, era nabo nga bwe batulaba bwe batyo.”