Okubala 14:1-45 LGCB2014 - Bible AI

¹Ekiro ekyo abantu bonna mu kibiina ne bayimusa amaloboozi gaabwe ne bakaaba nʼeddoboozi eryʼomwanguka.

²Abaana ba Isirayiri bonna ne beemulugunyiza Musa ne Alooni; abantu bonna awamu mu kibiina ne babagamba nti, “Singa twafiira mu nsi yʼe Misiri! Oba singa twafiira mu ddungu muno!

³Lwaki Mukama atutwala mu nsi eyo, tutuuke eyo tulyoke tuttibwe nʼekitala? Abakazi baffe nʼabaana baffe bagenda kunyagibwa. Okuddayo mu Misiri si kye kinaasingako?”

⁴Ne boogeraganya nti, “Ka twerondere omukulembeze tuddeyo mu Misiri.”

⁵Awo Musa ne Alooni ne bavuunama wansi mu maaso gʼekibiina kyonna ekyʼabaana ba Isirayiri abaali bakuŋŋaanidde awo.

⁶Yoswa mutabani wa Nuuni ne Kalebu mutabani wa Yefune, abaali mu abo abaagenda okuketta ensi, ne bayuzaayuza engoye zaabwe[10],

⁷ne bagamba ekibiina kyonna ekyʼabaana ba Isirayiri nti, “Ensi gye twayitaayitamu okugiketta, nsi nnungi nnyo.

⁸Mukama Katonda bwʼaliba atusanyukidde, alitukulembera nʼatutuusa mu nsi eyo, ensi ekulukuta amata nʼomubisi gwʼenjuki, era agenda kugituwa.

⁹ⓜ Kyokka temujeemera Mukama Katonda, era nʼabantu bʼomu nsi omwo temubatya, kubanga kuliba kumenya mu jjenje kkalu; tebakyalina abakuuma, ate nga Mukama Katonda ali wamu naffe. Temubatya.”

¹⁰Naye abantu bonna mu kibiina ne bateesa okubakuba mayinja. Awo ekitiibwa kya Mukama Katonda ne kirabikira eri abaana ba Isirayiri bonna mu Weema ya Mukama eyʼOkukuŋŋaanirangamu.

¹¹Mukama nʼagamba Musa nti, “Abantu bano balinnyooma kutuusa ddi? Balikomya ddi obutanzikiririzaamu, newaakubadde nga nakola ebyamagero mu bubonero bwe nakolera mu bo?

¹²Nzija kubaboola mbazikirize ne kawumpuli, mbasaanyeewo; naye nzija kukuggyamu ggwe eggwanga eriribasinga abo obukulu nʼamaanyi.”

¹³Naye Musa nʼagamba Mukama Katonda nti, “Ebyo Abamisiri bagenda kubiwulira! Kubanga abantu bano wabaggya mu nsi yʼAbamisiri nʼobuyinza obwʼamaanyi amangi.

¹⁴Bajja kubuulirako ku bantu abʼomu nsi muno. Baamala dda okukiwulira nga ggwe, Ayi Mukama, obeera wakati mu bantu bano, era nga, Ayi Mukama Katonda, mulabagana nabo amaaso nʼamaaso, era ngʼekire kyo kibeera nabo buli kiseera, era ngʼobakulemberera mu mpagi eyʼekire emisana ne mu mpagi eyʼomuliro ekiro.

¹⁵Singa abantu bano obatta bonna omulundi gumu, amawanga agawulidde obututumufu bwo gagenda kugamba nti,

¹⁶‘Kubanga Mukama Katonda yali tasobola kuyingiza bantu bano mu nsi gye yabasuubiza ngʼagibalayirira; kyeyava abattira mu ddungu.’

¹⁷“Ne kaakano nkwegayirira oyoleke obuyinza bwo, Ayi Mukama nga bwe buli obusukkirivu nga bwe wasuubiza nti,

¹⁸‘Mukama Katonda alwawo okusunguwala, era ajjudde okwagala okutaggwaawo, era asonyiwa ekibi nʼobujeemu. Naye era asingiddwa omusango tamuleka nga tabonerezebbwa; abonereza abaana olwʼebibi bya bakadde baabwe okutuuka ku mulembe ogwokusatu nʼogwokuna.’

¹⁹Ngʼokwagala kwe okungi okutaggwaawo bwe kuli, nsaba osonyiwe abantu bano ekibi kyʼabwe, nga bwʼozze obasonyiwa kasookedde bava mu Misiri nʼokutuusa leero.”

²⁰Awo Mukama Katonda nʼaddamu nti, “Mbasonyiye nga bwʼonsabye.

²¹Naye nno mu mazima ddala nga bwe ndi omulamu, era ngʼekitiibwa kya Mukama Katonda bwe kijjuza ensi yonna,

²²tewalibaawo nʼomu ku bantu abaalaba ekitiibwa kyange nʼobubonero obwʼebyamagero bwe nakolera e Misiri ne mu ddungu, naye ne batagondera ddoboozi lyange wabula ne bangezesa nga bankema emirundi kkumi,

²³tewalibaawo nʼomu ku bo aliraba ku nsi eyo gye nalayirira bajjajjaabwe ne mbasuubiza okugibawa. Tewalibaawo nʼomu ku bo abannyoomye aligirabako.

²⁴Naye olwokubanga omuweereza wange Kalebu alina omwoyo ogwʼenjawulo era ngʼangoberera nʼomutima gwe gwonna, ndimuleeta mu nsi gye yatumibwamu, nʼezzadde lye lirigirya.

²⁵Kale nno olwokubanga Abamaleki nʼAbakanani babeera mu biwonvu; enkya muddeeko emabega, musitule mutambule nga mwolekera eddungu nga mukutte ekkubo eriraga ku Nnyanja Emyufu.”

²⁶Mukama Katonda nʼagamba Musa ne Alooni nti,

²⁷“Ekibiina kino ekibi kirituusa ddi nga kinneemulugunyiza? Mpulidde okutolotooma kwʼabaana ba Isirayiri nga banneemulugunyiza.

²⁸Bategeeze nti, ‘Mukama agambye nti, Nga bwe ndi omulamu, bwʼayogera Mukama Katonda, ebyo bye mpulidde nga mwogera, nange bye ndibakola.

²⁹ⓝ Mulifiira mu ddungu muno nʼemirambo gyammwe mwe girisigala; mwenna abawezezza emyaka amakumi abiri nʼokusingawo egyʼobukulu nga bwe mwamala okubalibwa, abanneemulugunyiza.

³⁰Tewaliba nʼomu ku bo aliyingira mu nsi gye neelayirira nti Ge galibeera amaka gammwe, okuggyako Kalebu mutabani wa Yefune ne Yoswa mutabani wa Nuuni.

³¹Naye abaana bammwe abato, be mwogeddeko nti Balifuulibwa omunyago, ndibayingiza mu nsi eyo gye mugaanye ne beeyagalira omwo.

³²Naye mmwe, emirambo gyammwe girisigala mu ddungu muno mwe girigwa.

³³ⓞ Mmwe olwʼobutabeera beesigwa, abaana bammwe balimala emyaka amakumi ana mu ddungu nga bwe balunda ebisibo byabwe okutuusa omulambo gwʼoyo alisembayo okufa lwe guliziikibwa mu ddungu muno.

³⁴Nga bwe mwamala ennaku amakumi ana nga muketta ensi eri, bwe mutyo bwe mujja okumala emyaka amakumi ana mu ddungu, nga buli lumu ku nnaku ezo muvaamu mwaka gumu gumu; muboneebone olwʼebibi byammwe, mulyoke mutegeere obuzibu obwʼokunneesimbamu.

³⁵Nze, Mukama Katonda, nkyogedde; ddala ddala ekyo ndikikola ku kibiina kyonna ekyʼabantu bano aboonoonyi abeegasse awamu okunjolekera. Tebagenda kuva mu ddungu lino, bonna mwe balifiira.’ ”

³⁶Abasajja abo Musa be yatuma okuketta ensi ne bakomawo ne beemulugunyiza ekibiina kya bantu bonna nga babaleetedde obubaka obutaali bulungi ku nsi eri, era ne babubunyisa mu bantu,

³⁷abasajja abo abaaleeta obubaka obutaali bulungi ne babubunyisa mu bantu kawumpuli nʼabattira awo mu maaso ga Mukama Katonda.

³⁸Mu basajja bonna abaatumibwa okuketta ensi, Yoswa mutabani wa Nuuni ne Kalebu mutabani wa Yefune be bokka abaasigalawo nga balamu.

³⁹Musa nʼategeeza abaana ba Isirayiri bonna ebigambo ebyo, ne bakungubaga nnyo.

⁴⁰Enkeera mu makya ne bambuka mu nsi eyʼensozi. Ne boogera nti, “Twayonoona, naye nga bwe tuli wano tujja kwambuka tuyingire mu nsi Mukama Katonda gye yatusuubiza.”

⁴¹Naye Musa nʼabagamba nti, “Lwaki munyooma ekiragiro kya Mukama Katonda? Ebyo bye mutegeka tebiyinza kutuukiririra.

⁴²Temwambuka kubanga Mukama Katonda tali nammwe. Abalabe bammwe bajja kubawangula.

⁴³Kubanga Abamaleki nʼAbakanani bajja kuboolekera. Olwokubanga mwekyusizza ne muva ku Mukama Katonda, tajja kubeera nammwe, ekitala kijja kubatta.”

⁴⁴Naye era bo ne beesigula ne bambuka mu nsi eyʼensozi, newaakubadde nga Musa teyagenda nabo era nga nʼessanduuko eyʼendagaano yasigala mu lusiisira.

⁴⁵Awo Abamaleki nʼAbakanani abaabeeranga mu nsi eyo eyʼensozi ne bakkirira ne babalumba ne babakubira ddala okubatuusa e Koluma.