Okubala 23:1-30 LGCB2014 - Bible AI

¹Balamu nʼagamba Balaki nti, “Nkolera wano ebyoto musanvu, era onfunire ne sseddume zʼente musanvu, nʼendiga ennume musanvu.”

²Balaki nʼakola nga Balamu bwe yamugamba; bombi Balaki ne Balamu ne bawaayo ente emu nʼendiga ennume emu ku buli kyoto.

³Balamu nʼagamba Balaki nti, “Beera wano awali ekiweebwayo kyo nze njire nga nzirako wabbali. Oboolyawo nga Mukama anajja nʼansisinkana. Buli kyonna kyʼanambikkulira nnaakikutegeeza.” Nʼalaga waggulu ku lusozi awatali bimera.

⁴Katonda nʼasisinkana Balamu; Balamu nʼamugamba nti, “Nteeseteese ebyoto musanvu, era ku buli kyoto mpeereddeko ente ya sseddume emu nʼendiga ennume emu.”

⁵Mukama Katonda nʼassa ebigambo mu kamwa ka Balamu nʼamugamba nti, “Ddayo eri Balaki omutuuseeko obubaka buno.”

⁶Nʼaddayo gye yali, nʼamusanga ngʼayimiridde awali ekiweebwayo kye, nʼabakungu bonna aba Mowaabu.

⁷Balamu nʼalagula nti,

⁷“Balaki ye yanzigya mu Alamu, kabaka wa Mowaabu yanzigya mu nsozi zʼebuvanjuba. Nʼaŋŋamba nti, ‘Jjangu onkolimiririre Yakobo; jjangu oboole Isirayiri.’

⁸Nnyinza okukolimira abo Mukama Katonda batakolimidde? Nnyinza okuboola abo Mukama Katonda baatabodde?

⁹Mbalaba okuva ku ntikko ezʼenjazi mbalengera nga nsinziira ku nsozi. Ndaba abantu abeeyawuddeko abateerowooza kuba ngʼerimu ku mawanga.

¹⁰Ani ayinza okubala enfuufu ya Yakobo, oba okubala ekitundu ekyokuna ekya Isirayiri? Leka nfe okufa okwʼomutuukirivu, nʼenkomerero yange ebeere ngʼeyaabwe!”

¹¹Balaki nʼagamba Balamu nti, “Onkoze ki kino? Nakuyita kujja kukolimira balabe bange, naye obwʼedda bwonna obadde obasabira mukisa!”

¹²Nʼaddamu nti, “Tekiŋŋwanidde kwogera ekyo Mukama Katonda kyʼatadde mu kamwa kange?”

¹³Balaki nʼamugamba nti, “Jjangu tugende mu kifo ekirala wʼonoolabira abaana ba Isirayiri; ojja kulabako kitundu butundu so si bonna. Kale nno sinziira awo obankolimiririre.”

¹⁴Nʼamutwala mu nnimiro ya Zofimu, ku ntikko ya Pisuga, nʼazimbira eyo ebyoto musanvu nʼawaayo sseddume wʼente emu nʼendiga ennume emu ku buli kyoto.

¹⁵Balamu nʼagamba Balaki nti, “Beera wano awali ebiweebwayo byo, nze ŋŋende musisinkane wali.”

¹⁶Mukama Katonda nʼasisinkana Balamu, nʼateeka obubaka mu kamwa ke, ngʼagamba nti, “Ddayo eri Balaki omuwe obubaka obwo.”

¹⁷Nʼaddayo gyʼali nʼamusanga ngʼayimiridde awali ekiweebwayo, ngʼali nʼabakungu ba Mowaabu. Balaki nʼamubuuza nti, “Mukama Katonda agambye ki?”

¹⁸Bwʼatyo nʼalagula nti, “Golokoka, Balaki, owulirize; mpulira, mutabani wa Zipoli.

¹⁹Katonda si muntu, nti ayinza okulimba, oba nti mwana wa bantu nti akyusakyusa ebigambo bye. Ayogera nʼatakola? Asuubiza nʼatatuukiriza?

²⁰Mpeereddwa ekiragiro okusaba omukisa; agabye omukisa, era siyinza kukikyusa.”

²⁰

²¹“Tewali kibi kirabiddwa mu Yakobo, tewali kubonaabona kulabise mu Isirayiri. Mukama Katonda waabwe ali nabo; eddoboozi lya kabaka eryʼomwanguka liri wakati mu bo.

²²Katonda ye yabaggya mu Misiri, balina amaanyi ngʼaga sseddume eyʼomu nsiko.

²³Tewali bulogo ku Yakobo, tewali bulaguzi ku Isirayiri. Kiryogerwako ku Yakobo ne ku Isirayiri nti, ‘Mulabe Katonda kyʼakoze!’

²⁴Abantu basituka ngʼempologoma enkazi, beezuukusa ngʼempologoma ensajja etaweera okutuusa ngʼeridde omuyiggo gwayo nʼenywa omusaayi gwʼebyo byʼesse.”

²⁵Balaki nʼagamba Balamu nti, “Tobakolimira wadde okubasabira omukisa nʼakamu!”

²⁶Balamu nʼaddamu nti, “Saakutegeezezza nti kinsaanidde okukola ekyo kyonna Mukama Katonda kyʼanaagamba?”

²⁷Balaki nʼagamba Balamu nti, “Jjangu, nkutwale mu kifo ekirala, oboolyawo Mukama Katonda anakkiriza obankoliimiririre ngʼosinziira awo.”

²⁸Balaki nʼatwala Balamu ku ntikko yʼolusozi Peoli, olwolekedde eddungu.

²⁹Balamu nʼagamba Balaki nti, “Nzimbira wano ebyoto musanvu, era onfunireyo wano ente za sseddume musanvu nʼendiga ennume musanvu.”

³⁰Balaki nʼakola nga Balamu bwe yamusaba, nʼawaayo sseddume yʼente emu nʼendiga ennume emu ku buli kyoto.