Okubala 3:1-51 LGCB2014 - Bible AI

¹Kuno kwe kuzaala kwa Alooni nʼokwa Musa mu biseera Mukama mwe yayogerera ne Musa ku Lusozi Sinaayi.

²ⓒ Gano ge mannya ga batabani ba Alooni: Nadabu, omubereberye, ne Abiku, ne Eriyazaali, ne Isamaali.

³Ago ge mannya ga batabani ba Alooni, abaafukibwako amafuta agʼomuzeeyituuni okuba bakabona, era abaayawulibwa okuweereza mu mulimu gwʼobwakabona.

⁴ⓓ Naye nno Nadabu ne Abiku baatondokera mu maaso ga Mukama ne bafa, kubanga baayokya ekiweebwayo eri Mukama Katonda nʼomuliro ogutakkirizibwa nga bali mu ddungu lyʼe Sinaayi. Tebaalina baana; bwe batyo, Eriyazaali ne Isamaali ne basigala nga be bokka abaaweerezanga nga bakabona ebbanga lyonna kitaabwe Alooni lye yamala nga mulamu.

⁵Awo Mukama Katonda nʼagamba Musa nti,

⁶“Leeta abʼomu kika kya Leevi[2] obakwase Alooni kabona bamuweerezenga.

⁷Banaamukoleranga emirimu era ne baweereza nʼekibiina kyonna awali Eweema ya Mukama eyʼOkukuŋŋaanirangamu, nga bakola emirimu awali Eweema ya Mukama.

⁸Banaalabiriranga ebintu byonna ebyʼomu Weema ya Mukama eyʼOkukuŋŋaanirangamu, ne bakola emirimu gyʼomu Weema ya Mukama nga batuukiriza ebyo byonna ebivunaanyizibwa abaana ba Isirayiri.

⁹Abaleevi onoobawanga eri Alooni ne batabani be; baweereddwa ddala Alooni nga baggyibwa mu baana ba Isirayiri.

¹⁰Onoolonda Alooni ne batabani be okubeera bakabona; naye bwe wanaabangawo omuntu omulala yenna nʼasembera awatukuvu, anaafanga.”

¹¹Mukama Katonda nʼayongera okugamba Musa nti,

¹²“Laba, neetwalidde Abaleevi nga mbaggya mu baana ba Isirayiri mu kifo kyʼabaana ababereberye abazaalibwa abakazi mu baana ba Isirayiri. Abaleevi banaabanga bange,

¹³ⓔ kubanga byonna ebizaalibwa ebibereberye byange. Bwe natta ebibereberye byonna mu nsi yʼe Misiri neeyawulira ebibereberye byonna mu Isirayiri okubeeranga ebyange, abantu nʼebisolo. Nze Mukama Katonda.”

¹⁴Awo Mukama Katonda nʼagamba Musa mu ddungu lyʼe Sinaayi nti,

¹⁵“Bala Abaleevi bonna mu mpya zaabwe ne mu bika byabwe[3]. Bala buli mwana mulenzi owʼomwezi ogumu nʼokusingawo.”

¹⁶Bwʼatyo Musa nʼababala nga Mukama Katonda bwe yamulagira, ngʼekigambo kya Mukama bwe kyali.

¹⁷Gano ge mannya ga batabani ba Leevi: Gerusoni, ne Kokasi, ne Merali.

¹⁸Gano ge mannya gʼabatabani ba Gerusoni ngʼempya zaabwe bwe zaali:

¹⁸Libuni ne Simeeyi.

¹⁹Bano be batabani ba Kokasi ngʼempya zaabwe bwe zaali:

¹⁹Amulaamu, ne Izukali ne Kebbulooni, ne Wuziyeeri.

²⁰Bano be batabani ba Merali ngʼempya zaabwe bwe zaali: Ebyo bye bika byʼAbaleevi ngʼempya za bakitaabwe bwe zaali.

²⁰Makuli ne Musi.

²¹Mu Gerusoni mwe mwava oluggya lwa Abalibuni nʼoluggya lwa Abasimeeyi; ezo nga zʼempya za Abagerusoni.

²²Abaana aboobulenzi okuva ku wʼomwezi ogumu ogwʼobukulu nʼokusingawo abaabalibwa baali kasanvu mu ebikumi bitaano (7,500).

²³Abʼomu Gerusoni nga baakusiisiranga ku ludda olwʼebugwanjuba emmanju wa Weema ya Mukama.

²⁴Omukulembeze wʼempya za Abagerusoni yali Eriyasaafu mutabani wa Laeri.

²⁵Abagerusoni be banaabanga nʼobuvunaanyizibwa obwʼokulabirira Eweema ya Mukama eyʼOkukuŋŋaanirangamu, nga balabirira ebigibikkako nʼeggigi eryʼomu mulyango oguyingira mu Weema,

²⁶nʼentimbe ezʼomu luggya, nʼentimbe ezʼomu mizigo egiggulira ku luggya okwebungulula Weema nʼekyoto. Era banaalabiriranga nʼemiguwa awamu nʼebintu byonna ebinaakozesebwanga ku mirimu egyo.

²⁷Mu Kokasi mwe mwava oluggya lwa Abamulaamu, nʼoluggya lwa Abayizukaali, nʼoluggya lwa Abakebbulooni, nʼoluggya lwa Abawuziyeeri; ezo zʼempya za Abakokasi.

²⁸Abaana aboobulenzi okuva ku wʼomwezi ogumu ogwʼobukulu nʼokusingawo abaabalibwa baali kanaana mu lukaaga[4] (8,600). Abakokasi be baweebwa obuvunaanyizibwa okulabiriranga awatukuvu.

²⁹Abʼomu Kokasi nga baakusiisiranga ku ludda olwʼobukiikaddyo obwa Weema ya Mukama.

³⁰Omukulembeze wʼempya za Abakokasi yali Erizafani mutabani wa Wuziyeeri.

³¹Abakokasi be baabanga nʼobuvunaanyizibwa okulabirira Essanduuko eyʼEndagaano, nʼemmeeza, nʼekikondo kyʼettaala, nʼebyoto, nʼebintu ebyʼomu watukuvu ebikozesebwa mu kuweereza, nʼeggigi; nʼemirimu gyonna egyekuusa ku buweereza obwo.

³²Eriyazaali mutabani wa Alooni kabona ye yalondebwa okuba omukulu wʼabakulembeze ba Abaleevi, era nʼokulabirira abo abaaweerezanga mu watukuvu.

³³Mu Merali mwe mwava oluggya lwa Abamakuli nʼoluggya lwa Abamusi; ezo nga ze mpya za Abamerali.

³⁴Abaana aboobulenzi okuva ku wʼomwezi ogumu nʼokusingawo abaabalibwa baali kakaaga mu ebikumi bibiri (6,200).

³⁵Omukulembeze wʼempya za Abamerali yali Zuliyeeri mutabani wa Abikayiri; Abamerali nga baakusiisiranga ku bukiikaddyo obwa Weema ya Mukama.

³⁶Be baavunaanyizibwanga emikiikiro, nʼempagi, nʼebikondo, nʼebikwata ku Weema ya Mukama byonna nʼebyekuusa ku mirimu gyayo.

³⁷Okwo baagattangako empagi zonna ezeebunguludde oluggya nʼentobo zaazo, nʼenkondo za Weema nʼemiguwa.

³⁸Musa ne Alooni ne batabani baabwe baasiisiranga ku ludda olwʼebuvanjuba olwa Weema ya Mukama, okwolekera enjuba gyʼeva mu maaso ga Weema ya Mukama eyʼOkukuŋŋaanirangamu. Baavunaanyizibwanga okulabirira awatukuvu ku lwʼabaana ba Isirayiri. Omuntu omulala yenna eyasembereranga awatukuvu, ngʼateekwa kufa.

³⁹Omuwendo gwonna ogwʼAbaleevi abaabalibwa ngʼempya zaabwe bwe zaali, nga mwe muli abaana aboobulenzi okuva ku wʼomwezi ogumu nʼokusingawo, nga Mukama Katonda bwe yalagira Musa ne Alooni, baali emitwalo ebiri mu enkumi bbiri (22,000).

⁴⁰Mukama Katonda nʼagamba Musa nti, “Bala abaana ba Isirayiri bonna aboobulenzi ababereberye okuva ku mwana owʼomwezi ogumu nʼokusingawo okole olukalala lwʼamannya gaabwe gonna.

⁴¹Era ojja kunfunira Abaleevi mu kifo kyʼababereberye abʼabaana ba Isirayiri, era onfunire nʼente ezʼAbaleevi mu kifo kyʼente ezʼabaana ba Isirayiri embereberye. Nze Mukama Katonda.”

⁴²Awo Musa nʼabala abaana ba Isirayiri ababereberye nga Mukama Katonda bwe yamulagira.

⁴³Okugatta awamu abaana aboobulenzi ababereberye bonna okuva ku wʼomwezi ogumu nʼokusingawo abaabalibwa, nga nʼamannya gaabwe gawandiikiddwa ku lukalala, baali emitwalo ebiri mu enkumi bbiri mu ebikumi bibiri mu nsanvu mu basatu.

⁴⁴Awo Mukama Katonda nʼagamba Musa nti,

⁴⁵“Nfunira Abaleevi badde mu kifo kyʼabaana ba Isirayiri ababereberye, nʼente zʼAbaleevi zidde mu kifo kyʼente zʼabaana ba Isirayiri, era Abaleevi banaabanga bange. Nze Mukama Katonda.

⁴⁶Okununula ababereberye abʼabaana ba Isirayiri ebikumi ebibiri mu ensanvu mu abasatu abasukkirira ku muwendo gwʼAbaleevi abasajja,

⁴⁷onoddiranga gulaamu amakumi ataano mu ttaano ku buli omu, ngʼogeraageranyiza ku gulaamu kkumi nʼemu eyʼawatukuvu nga bwʼeri, ye sekeri[5] eyʼobuzito ze gulaamu kkumi nʼemu nʼekitundu.

⁴⁸Ensimbi ezʼokununula abaana ba Isirayiri abasukkiriramu oziwanga Alooni ne batabani be.”

⁴⁹Bwʼatyo Musa nʼasolooza ensimbi ezʼokwenunula ku abo abaasukkirira ku muwendo gwʼabo abaanunulibwa Abaleevi.

⁵⁰Yasolooza ku babereberye abʼabaana ba Isirayiri effeeza eyʼobuzito obwa kilo kkumi na ttaano nʼekitundu, ngʼengeraageranya ya sekeri yʼawatukuvu bwʼeri.

⁵¹Musa nʼaddira ensimbi ezʼokwenunula nʼaziwa Alooni ne batabani be, ngʼekigambo kya Mukama bwe kyali, nga Mukama Katonda bwe yalagira Musa.