Okubala 30:1-16 LGCB2014 - Bible AI

¹Musa nʼagamba abakulembeze bʼebika byʼabaana ba Isirayiri nti, “Kino Mukama Katonda kyʼalagidde:

²ⓒ Omusajja bwʼaneeyamanga eri Mukama Katonda, oba bwʼanaalayiranga okutuukiriza ekisuubizo kye, ekigambo kye ekyo taakimenyengawo, naye anaakolanga nga bwʼanaabanga asuubizza.

³“Omukazi omuvubuka anaabeeranga akyasula mu maka ga kitaawe, bwʼaneeyamanga eri Mukama Katonda, oba bwʼanaalayiranga okutuukiriza ekisuubizo kye, kale, obweyamo bwe bwonna nʼebyo byʼanaabanga asuubizza binaasigalanga nga bwe biri.

⁴Naye kitaawe bwʼanaakiteegerangako, nʼamuziyiza, kale, tewaabengawo nʼekimu ku ebyo byʼanaabanga asuubizza ebinaasigalanga nga bwe biri.

⁵Naye kitaawe bwʼanaamugaananga ku lunaku lwʼanaakiwulira, tewaabengawo ku bweyamo bwe newaakubadde bye yalayira bye yasuubiza ebinaatuukirizibwanga, Mukama Katonda anaabimusonyiwanga, kubanga kitaawe abimuziyizza.

⁶“Bwʼanaafumbirwanga ngʼamaze okweyama ngʼawaddeyo nʼebisuubizo nga tamaze kwerowooza,

⁷bba nʼabiwulirako, naye nʼatabaako kyʼayogera; kale, obweyamo bwʼomukazi oyo nʼebisuubizo bye, bye yalagira okubituukiriza, binaasigalanga nga bwe biri.

⁸Naye singa bba bwʼamala okubiwulirako nʼamuziyiza, olwo obweyamo bwʼomukazi oyo nʼebyo byonna bye yasuubiza nga teyeerowozezza, biba bifudde, era Mukama Katonda anaasonyiwanga omukazi oyo.

⁹“Obweyamo nʼebisuubizo bwe binaakolebwanga nnamwandu oba omukazi eyayawukanira ddala ne bba mu bufumbo, binaasigalanga nga bwe biri.

¹⁰“Omukazi ali mu bufumbo ngʼabeera wamu ne bba mu maka gaabwe, bwʼaneeyamanga oba nʼasuubiriza ku kirayiro ngʼalibaako byʼatuukiriza,

¹¹bba nʼabiwulirako, naye nʼatabaako kyʼagamba mukazi we, nʼatamuziyiza; kale, obweyamo bwʼomukazi oyo bwonna bunaasigalangawo, ne buli kimu kyonna kye yasuubiza ne yeerayirira, binaasigalangawo.

¹²Naye bba bwʼanaabanga abiwuliddeko, kyokka nʼabidibya nʼabisazaamu, olwo tewaabengawo bweyamo oba ebisuubizo ebyava mu kamwa kʼomukazi, ebinaasigalangawo, era Mukama Katonda anaabimusonyiwanga.

¹³Bba anaayinzanga okukakasa oba okudibya obweyamo bwonna mukazi we bwʼanaabanga akoze nʼebisuubizo byonna byʼanaabanga yeerayiridde ebirimu nʼokwerumya nʼokwefiiriza.

¹⁴Naye bba bwʼataabengako ne kyabyogerako nga kyʼajje abiwulire, olwo omukazi anaabanga akakasizza obweyamo bwe bwonna nʼebisuubizo bye yeerayirira. Bba anaabikakasanga bwʼataabengako kyʼategeeza mukazi we bwʼanaabanga yaakamala okubiwulirako.

¹⁵Naye bwe wanaayitangawo ennaku ngʼamaze okubiwulirako, oluvannyuma nʼalyoka abidibya, yʼanaavunaanyizibwanga ku bitatuukiridde mu bweyamo bwʼomukazi oyo.”

¹⁶Ago ge mateeka Mukama Katonda ge yalagira Musa aganaakwatanga ku musajja ne mukazi we, era ne kitaawe wʼomuwala ne muwala we anaabanga akyali omuvubuka ngʼakyasula mu nju ya kitaawe.