Okubikkulirwa 1:1-20 LGCB2014 - Bible AI

¹Okubikkulirwa kwa Yesu Kristo, Katonda kwe yamuwa okulaga abaddu be ebyo ebiteekwa okubaawo amangu. Kristo yakimanyisa ngʼatuma malayika we eri omuweereza we Yokaana

²eyategeeza ekigambo kya Katonda nʼobujulirwa bwa Yesu Kristo ku byonna bye yalaba.

³Alina omukisa oyo asoma nʼabo abawulira ebigambo byʼobunnabbi buno, ne beekuuma ebiwandiikiddwa, kubanga ekiseera kiri kiweddeyo.

⁴Nze Yokaana mpandiikira Ekkanisa omusanvu eziri mu Asiya. Mbagaliza ekisa nʼemirembe ebiva eri Katonda oyo aliwo, era eyaliwo era alibaawo; nʼebiva eri emyoyo omusanvu egiri mu maaso gʼentebe ye eyʼobwakabaka,[1]

⁵era nʼokuva eri Yesu Kristo omujulirwa omwesigwa. Oyo ye yasooka okuzuukira mu bafu, era yʼafuga bakabaka abʼomu nsi; oyo yatwagala, era ye yatuggya mu bibi byaffe nʼomusaayi gwe,

⁶nʼatufuula obwakabaka bwʼobwakabona bwa Katonda, Kitaawe. Ekitiibwa nʼobuyinza bibeerenga eri oyo emirembe nʼemirembe. Amiina.

⁷Laba, ajja nʼebire, na buli liiso lirimulaba, nʼabaamufumita balimulaba, era nʼamawanga gonna ku nsi galimukungubagira. Weewaawo. Amiina!

⁸“Nze Alufa ne Omega,”[2] bwʼayogera Mukama Katonda, “oyo aliwo, eyabaawo era alikomawo, Ayinzabyonna.”

⁹Nze muganda wammwe Yokaana, abonaabonera awamu nammwe mu bwakabaka ne mu kugumiikiriza ebiri mu Yesu, nnali ku kizinga ekiyitibwa Patumo, olwʼekigambo kya Katonda era nʼokujulira ebya Yesu.

¹⁰Nnali mu mwoyo ku lunaku lwa Mukama waffe,[3] ne mpulira eddoboozi eryʼomwanguka emabega wange, eryavuga ngʼeryʼakagombe,

¹¹nga ligamba nti, “Byʼolaba, biwandiike mu kitabo, okiweereze eri Ekkanisa omusanvu: Ekkanisa eyʼomu Efeso, nʼeyʼomu Sumuna, nʼeyʼomu Perugamo, nʼeyʼomu Suwatira, nʼeyʼomu Saadi, nʼeyʼomu Firaderufiya nʼeyʼomu Lawodikiya.”

¹²Ne nkyuka okulaba eyali ayogera nange, ne ndaba ebikondo byʼettaala ebya zaabu musanvu.

¹³Era wakati mu byo ne ndabamu omuntu ⓐ “eyali ngʼOmwana wʼOmuntu” eyali ayambadde ekyambalo ekiwanvu ekikoma ku bigere, nga yeesibye mu kifuba olukoba olwa zaabu.

¹⁴Omutwe gwe nʼenviiri ze byali byeru ngʼebyoya byʼendiga ebyeru, era nga bifaanana ngʼomuzira, nʼamaaso ge nga gali ngʼennimi zʼomuliro.

¹⁵Ebigere bye byali ngʼekikomo ekizigule ekyakaayakana mu muliro nʼeddoboozi lye nga liyira ngʼamazzi amangi.

¹⁶Yali akutte emmunyeenye musanvu mu mukono gwe ogwa ddyo era ngʼalina ekitala ekyogi ekyʼobwogi obubiri[4] mu kamwa ke; nʼekyenyi kye nga kiri ngʼenjuba eyakaayakana mu maanyi gaayo.

¹⁷Bwe namulaba, ne ngwa wansi ku bigere bye ne mba ngʼafudde, kyokka ye nʼanteekako omukono gwe ogwa ddyo nʼaŋŋamba nti, “Totya. Nze Owoolubereberye era Owenkomerero,

¹⁸era omulamu. Nnali nfudde naye kaakano ndi mulamu emirembe gyonna, era nnina ebisumuluzo ebyʼokufa nʼamagombe.

¹⁹“Kale wandiika ebyo byʼolabye ebiriwo nʼebyo ebinaatera okubaawo oluvannyuma lwʼebyo ebiriwo.

²⁰Ka nkubuulire amakulu gʼemmunyeenye omusanvu zʼolabye mu mukono gwange ogwa ddyo, era nʼebikondo ebyʼettaala ebya zaabu omusanvu. Emmunyeenye omusanvu be bamalayika bʼEkkanisa omusanvu, ate ebikondo byʼettaala eza zaabu omusanvu ze Kkanisa omusanvu.”