Okubikkulirwa 12:1-18 LGCB2014 - Bible AI

¹Ne wabaawo ekyewuunyo ekinene mu ggulu. Ne ndaba omukazi ngʼayambadde enjuba nʼomwezi nga guli wansi wa bigere bye, ngʼalina engule eyaliko emmunyeenye kkumi na bbiri ku mutwe gwe.

²Yali lubuto era ngʼakaaba ngʼalumwa okuzaala.

³Awo ne ndaba ekyewuunyo ekirala mu ggulu, era laba, ogusota ogumyufu nga gulina emitwe musanvu nʼamayembe kkumi era nga ku mitwe egyo kuliko engule musanvu.

⁴Ku mukira gwʼogusota kwali kuwalulirwako ekitundu ekimu ekyokusatu ekyʼemmunyeenye zonna eziri waggulu mu ggulu, ne guzisuula wansi ku nsi. Ne guyimirira mu maaso gʼomukazi oyo, anaatera okuzaala nga gulindirira okulya omwana we nga yaakazaalibwa.

⁵Omukazi nʼazaala omwana owoobulenzi eyali agenda okufuga amawanga gonna nʼomuggo ogwʼekyuma, amangwago nʼakwakulibwa nʼatwalibwa eri Katonda ku ntebe ye eyʼobwakabaka.

⁶Omukazi nʼaddukira mu ddungu eyali ekifo Katonda gye yategeka okumulabirira okumala ennaku Lukumi mu bibiri mu nkaaga.

⁷Ne wabaawo olutalo mu ggulu. Mikayiri ne bamalayika abʼomu kibinja kye ne balwanyisa ogusota nʼeggye lya bamalayika baagwo.

⁸Ogusota ne guwangulwa era ne gusindiikirizibwa okuva mu ggulu.

⁹Ogusota ogwo ogwʼamaanyi, era gwe gusota ogwʼedda oguyitibwa Setaani Omulimba, alimba ensi yonna, ne gusuulibwa wansi ku nsi nʼeggye lyagwo lyonna.

¹⁰Ne mpulira eddoboozi eryʼomwanguka mu ggulu nga ligamba nti, “Kaakano obulokozi bwa Katonda, nʼamaanyi ge nʼobwakabaka bwa Katonda waffe awamu nʼobuyinza bwa Kristo we bizze. Kubanga omuloopi eyaloopanga baganda baffe, eri Katonda waffe emisana nʼekiro, agobeddwa mu ggulu.

¹¹Ne bamuwangula olwʼomusaayi gwʼOmwana gwʼEndiga, nʼolwʼekigambo ekyʼobujulirwa bwabwe, ne bawaayo obulamu bwabwe nga tebatya na kufa.

¹²Noolwekyo ssanyuka ggwe eggulu, nammwe abalituulamu musanyuke. Naye mmwe ensi nʼennyanja zibasanze, kubanga Setaani asse gye muli ngʼalina obusungu bungi, ngʼamanyi nti asigazza akaseera katono.”

¹³Awo ogusota bwe gwalaba nga gusuuliddwa ku nsi ne guyigganya omukazi eyazaala omwana owoobulenzi.

¹⁴Naye omukazi nʼaweebwa ebiwaawaatiro bibiri ebinene ngʼebyʼempungu okubuuka agende mu ddungu mu kifo ekyamuteekerwateekerwa, gyʼalabiririrwa era gyʼakuumibwa, ogusota ne gutamukola kabi okumala ekiseera nʼekitundu kyʼekiseera.

¹⁵Ogusota ne guwandula amazzi mangi okuva mu kamwa kaagwo ne ganjaala ne gafuuka omugga nga galaga omukazi gye yali, nga gafuba okumuzikiriza.

¹⁶Naye ettaka ne liyamba omukazi bwe lyayasama ne limira omugga ogwo ogwayanjaala.

¹⁷Awo ogusota, nga gwonna gujjudde obusungu bungi, ne gugenda okulumba abaana bʼomukazi abalala, abo bonna abaali bakwata amateeka ga Katonda era nga bajulira Yesu.

¹⁸Ne guyimirira ku lubalama lwʼennyanja.