Okubikkulirwa 13:1-18 LGCB2014 - Bible AI

¹Awo ne ndaba ekisolo ekikambwe nga kiva mu nnyanja, nga kirina emitwe musanvu nʼamayembe kkumi era nga kirina engule kkumi ku mayembe gaakyo, era ku buli mutwe nga kuwandiikiddwako amannya agavvoola Katonda.

²Ekisolo ekyo kye nalaba kyali kifaanana ngʼengo naye ngʼebigere byakyo biri ngʼebyʼeddubu, kyokka ngʼakamwa kaakyo kali ngʼakʼempologoma. Ogusota ne guwa ekisolo ekyo amaanyi gaagwo awamu nʼentebe yaakyo eyʼobufuzi era nʼobuyinza bungi.

³Awo ogumu ku mitwe gyagwo gwali gufumitiddwa nga gufunye ekiwundu ekyali kigenda okugutta, naye ekiwundu ekyali kigenda okugutta ne kiwona. Ensi yonna ne yeewuunya era abantu ne bagoberera ekisolo ekyo.

⁴Ne basinza ogusota olwʼokuwa ekisolo ekikambwe obuyinza obwenkaniddaawo, era nʼekisolo ne bakisinza, nga bagamba nti, “Ani akisinga amaanyi era ani ayinza okulwana nakyo?”

⁵Awo ekisolo ne kikkirizibwa okwogera ebintu ebyʼokwegulumiza nʼebyʼobuvvoozi era ne kiweebwa nʼobuyinza okumala emyezi amakumi ana mu ebiri.

⁶Ekisolo ne kitandika okuvvoola Katonda nʼobutayogera birungi ku linnya lye, ne ku kifo kye mwʼabeera, ne kivuma nʼabo ababeera mu ggulu.

⁷Ne kiweebwa obuyinza okulwanyisa abatukuvu nʼokubawangula era nʼokufuga buli kika, na buli ggwanga, na buli lulimi, na buli nsi.

⁸Era abantu bonna abaaliwo okuva ku kutondebwa kwʼensi, abatawandiikiddwa mu kitabo ekyʼObulamu ekyʼOmwana gwʼEndiga eyattibwa balisinza ekisolo ekyo.

⁹Alina amatu awulire.

¹⁰Buli owʼokutwalibwa mu busibe wa kusiba. Era buli owʼokuttibwa nʼekitala, wa kuttibwa na kitala. Kubanga awo okugumiikiriza nʼokukkiriza kwʼabatukuvu we kutegeererwa.

¹¹Awo ne ndyoka ndaba ekisolo ekikambwe ekirala nga kiva mu ttaka, nga kirina amayembe abiri agali ngʼagʼakaliga akato naye ngʼeddoboozi lyakyo liri ngʼeryʼogusota.

¹²Ekisolo ekyo ne kikozesa obuyinza obwa kiri ekyasooka ekyalina ekiwundu ekyawonyezebwa era ekyasinzibwa ensi yonna.

¹³Ne kikola ebyamagero ebyewuunyisa, gamba ngʼokuwandula ennimi ezʼomuliro ku nsi nga ziva mu bbanga nga buli omu alaba.

¹⁴Olwʼokuweebwa obuyinza okukola ebyamagero ebyo mu linnya lyʼekisolo kiri ekyasooka, abantu bangi baalimbibwalimbibwa. Ekisolo ekyo ne kiragira abantu abʼoku nsi okukola ekifaananyi ekyʼekisolo kiri ekyasooka ekyalina ekiwundu ekyʼekitala ekyawona.

¹⁵Ekisolo ekyo ne kiweebwa okufuuwa omukka ogwʼobulamu mu kifaananyi kyʼekisolo ekyo kyogere, era ekifaananyi ekyo ne kittisa abantu bangi abaagaana okukisinza.

¹⁶Awo ekisolo ne kiragira bonna, abakulu nʼabato, abagagga nʼabaavu, abʼeddembe nʼabaddu, bateekebweko akabonero ku mukono ogwa ddyo oba mu kyenyi,

¹⁷nga tewali nʼomu akkirizibwa okugula oba okutunda ekintu kyonna, nga talina kabonero akʼerinnya lyʼekisolo ekyo oba ennamba yaakyo.

¹⁸Ekyo kyetaaga amagezi: abo abasobola okutegeera amakulu gʼomuwendo guno babale ennamba eri ku kisolo kubanga gwe muwendo gwʼomuntu. Omuwendo ogwo guli lukaaga mu nkaaga mu mukaaga.