Okubikkulirwa 15:1-8 LGCB2014 - Bible AI

¹Awo ne ndaba akabonero akalala mu ggulu akʼamaanyi era nga ka kitalo bamalayika omusanvu nga balina ebibonoobono musanvu, olwo ekiruyi kya Katonda kiryoke kituukirire.

²Awo ne ndaba ekifaanana ngʼennyanja etangalijja ngʼeri ngʼendabirwamu erimu omuliro, era ku nnyanja eyo kwali kuyimiriddeko abo abaali bawangudde ekisolo nʼekifaananyi kyakyo awamu nʼakabonero akʼomuwendo gwakyo, nga bakutte ennanga Katonda ze yabawa.

³Baali bayimba oluyimba lwa Musa omuddu wa Katonda, nʼoluyimba lwʼOmwana gwʼEndiga nga lugamba nti,

³“Ebikolwa byo bikulu era bya kyewuunyo, ayi Mukama Katonda Ayinzabyonna. Amakubo go matukuvu era ga mazima, ayi ggwe Kabaka wa mawanga.

⁴Ani ataakutye Ayi Mukama, nʼatagulumiza linnya lyo? Ggwe wekka gwe Mutukuvu, amawanga gonna galijja ne gasinziza mu maaso go, Kubanga ebikolwa byo ebyʼobutuukirivu birabise.”

⁵Oluvannyuma lwʼebyo, ne ndaba Yeekaalu ngʼeggaddwawo, lye kkuŋŋaaniro lyʼobujulirwa mu ggulu.

⁶Awo bamalayika omusanvu abaalina ebibonoobono omusanvu ne bafuluma mu Yeekaalu nga bambadde engoye eza linena ennyonjo nga zimasamasa era nga beesibye mu bifuba byabwe enkoba eza zaabu.

⁷Ekimu ku biramu ebina ne kiwa bamalayika omusanvu ebibya musanvu ebya zaabu nga bijjudde ekiruyi kya Katonda omulamu era abeera omulamu emirembe nʼemirembe.

⁸Awo Yeekaalu nʼejjula omukka ogwava mu kitiibwa kya Katonda nʼemu maanyi ge, so tewaali muntu nʼomu eyayinza okuyingira mu Yeekaalu okutuusa ebibonoobono omusanvu ebya bamalayika omusanvu lwe byatuukirira.