Okubikkulirwa 22:1-21 LGCB2014 - Bible AI

¹Awo malayika nʼandaga omugga ogwʼamazzi agʼobulamu agamasamasa ngʼendabirwamu, nga gukulukuta okuva mu ntebe eyʼobwakabaka eya Katonda, nʼeyʼOmwana gwʼEndiga,

²nga gukulukutira wakati mu luguudo olunene. Ku mbalama zombi ezʼomugga kwaliko emiti egyʼobulamu, gumu ku buli ludda, egibala ebibala ekkumi nʼebibiri era nga buli mwezi kubeerako ebibala ebyʼengeri endala; nʼamakoola gaagwo nga gakozesebwa ngʼeddagala okuwonya amawanga.

³Mu kibuga ekyo tewalibaayo kikolimo nate. Entebe eyʼobwakabaka eya Katonda nʼeyʼOmwana gwʼEndiga ziribeera eyo, nʼabaddu be balimuweereza,

⁴era banaalabanga amaaso ge, nʼerinnya lye liriwandiikibwa mu byenyi byabwe.

⁵Teribaayo kiro, noolwekyo ettaala oba enjuba tebiryetaagibwa, kubanga Mukama Katonda yʼanaabaakiranga era banaafuganga emirembe nʼemirembe.

⁶Awo malayika nʼaŋŋamba nti, “Ebigambo bino bituufu, bya mazima. Era Katonda wʼemyoyo gya bannabbi, atumye malayika we okulaga abaddu be ebyo ebiteekwa okubaawo amangu.”

⁷“Era laba, nzija mangu. Alina omukisa oyo akwata ebigambo byʼobunnabbi ebiri mu kitabo kino.”

⁸Nze Yokaana nalaba era ne mpulira ebintu ebyo. Era bwe nabiraba ne mbiwulira ne ngwa wansi okusinza malayika oyo eyabindaga;

⁹kyokka ye nʼaŋŋamba nti, “Tokola kintu ekyo kubanga nange ndi muddu nga ggwe era nga baganda bo bannabbi bwe bali, awamu nʼabo bonna abakwata ebigambo ebiwandiikiddwa mu kitabo kino. Ssinza Katonda.”

¹⁰Awo nʼaŋŋamba nti, “Ebyo byʼowandiise ebyʼobunnabbi tobikuuma nga bya kyama kubanga biri kumpi okutuukirira.

¹¹Era ekiseera ekyo bwe kirituuka, buli akola ebitali bya butuukirivu alyeyongera okukola ebitali bya butuukirivu, era nʼomugwagwa alyeyongera okugwagwawala, kyokka abatuukirivu balyeyongera okuba abatuukirivu, nʼabatukuvu balyeyongera okuba abatukuvu.

¹²“Laba, nzija mangu nsasule buli omu ngʼebikolwa bye bwe biri.

¹³Nze Alufa era nze Omega, Owoolubereberye era Asembayo, Entandikwa era Enkomerero.

¹⁴“Balina omukisa abo abayoza ebyambalo byabwe, baliweebwa olukusa okuyingira mu miryango gyʼekibuga ne balya ne ku bibala ebiva ku muti ogwʼobulamu.

¹⁵Ebweru wʼekibuga yʼebeera embwa, nʼabalogo, nʼabenzi, nʼabassi, nʼabasinza bakatonda abalala nʼabo bonna abaagala era abakola ebyʼobulimba.

¹⁶“Nze Yesu, owʼomu kikolo era owʼomu lulyo lwa Dawudi, ntumye malayika wange gye muli okubuulira Ekkanisa ebigambo bino. Nze Mmunyeenye eyaka eyʼEnkya.”

¹⁷Omwoyo nʼOmugole boogera nti, “Jjangu.” Na buli awulira ayogere nti, “Jjangu.” Buli alumwa ennyonta ajje, buli ayagala ajje anywe ku mazzi agʼobulamu agʼobuwa.

¹⁸Ntegeeza buli omu awulira ebigambo ebyʼobunnabbi ebiri mu kitabo: Omuntu yenna alibyongerako, Katonda alimwongerako ebibonoobono ebiwandiikiddwa mu kitabo kino.

¹⁹Era omuntu yenna alikendeeza ku bigambo byʼobunnabbi ebiri mu kitabo kino, Mukama alimuggyako omugabo gwe ku muti ogwʼobulamu ne mu kibuga ekyo ekitukuvu ekiwandiikiddwako mu kitabo kino.

²⁰Oyo ayogedde ebintu bino agamba nti, “Weewaawo nzija mangu!” Amiina! Jjangu Mukama waffe Yesu!

²¹Ekisa kya Mukama waffe Yesu Kristo kibeerenga ne bonna. Amiina.